აქ მსურს მოგიყვეთ ისტორია, თუ როგორ შეიქმნა საქართველოში ყველაზე სწრაფად მზარდი პლატფორმა უნიკალური ნახვების მიხედვით − Sfero.ge.
დღეს Sfero.ge უკვე მონეტიზებული პლატფორმაა, რომელსაც 700 000-ზე მეტი უნიკალური ნახვა, 15000-ზე მეტი ვერიფიცირებული პროფილი და 190-ზე მეტი ლოიალური კომპანია ჰყავს.
როგორ დაიწყო პირველი ნეო-სოციალური ქსელის შექმნა, რომელიც მოიცავს მართვის სისტემებს და აერთიანებს სამ პროცესს ერთ სივრცეში: დასაქმებას, განათლებას და კარიერულ განვითარებას.
პლატფორმის იდეა დიდი ხნის წინ გამიჩნდა, როცა ჯერ კიდევ მესამე კურსის სტუდენტი ვიყავი ბიზნესის ადმინისტრირების ფაკულტეტზე. მაშინ მეწარმეობასა და HR-მენეჯმენტს ვსწავლობდი. ამ საგნების შესწავლისას მივხვდი, რომ არსებობდა შემდეგი პრობლემა: განათლების, დასაქმებისა და კარიერული ზრდის პროცესი არ იყო ერთმანეთთან დაკავშირებული, ყველა საქმეს ცალ-ცალკე ვაკეთებდით და საერთო ჯამში, დრო არაეფექტიანად იხარჯებოდა. გარდა ამისა, ვხედავდი უნიკალური ნიჭისა და უნარის მქონე ბევრ თანაკურსელს, რომელთაც სხვადასხვა რუტინული პროცესის გავლა სჭირდებოდათ მხოლოდ იმისათვის, რომ კომპანიებამდე მისულიყო მათ შესახებ ინფორმაცია. დავიწყე ფიქრი, თუ როგორ შეგვეძლო ამ პრობლემების მოგვარება და მივხვდი, რომ საჭირო იყო სრულიად ახალი, უნიკალური სოციალური ქსელის შექმნა, სადაც ყველა პროცესს ერთიან ციფრულ ეკოსისტემაში განვათავსებდით. ამგვარად მივიღებდით პროცესების მაქსიმალურად დაჩქარებას. დიდი ხნის განმავლობაში ვეძებდი ენთუზიასტებს, რომლებიც ჩემს იდეას გაიზიარებდნენ და ამყვებოდნენ. უცნაურია, რომ გარკვეული დროის შემდეგ, ვინც გაიზიარა ჩემი იდეა და მხარში დამიდგა, გახლდათ ჩემი ყოფილი დამსაქმებელი − ლერი მილდიანი.
უკვე სხვა სამსახურში ვმუშაობდი, როცა მასთან მივედი და მოვუყევი ჩემი ჩანაფიქრის შესახებ. ძალიან მოეწონა იდეა, მაშინვე აიტაცა და გადაწყვიტა, გამხდარიყო ჩემი პარტნიორი ამ საქმეში. ამის შემდეგ შევქმენით კომპანიის კულტურა, ფუნდამენტური პრინციპები, რომლის ირგვლივაც გავაერთიანეთ დეველოპერთა გუნდი და ენთუზიაზმით დავიწყეთ საქმის კეთება. პირველი 3 თვის განმავლობაში შევქმენით პლატფორმის დიზაინი. მთავარი ამოცანა იყო, Sfero.ge ყოფილიყო მარტივი პლატფორმა − იმდენად მარტივი და მინიმალისტური, რომ მისი გამოყენება ყველას შესძლებოდა.
ახლა ვმუშაობთ ახალი პლატფორმის დანერგვაზე. ეს არის საერთაშორისო მასშტაბით უნიკალური აპლიკაცია.
Clip Card − სავიზიტო ბარათი და კონტაქტების მართვის აპლიკაცია, რომელსაც გაციფრულება ახალ ეტაპზე გადაჰყავს.
აპლიკაცია მნიშვნელოვნად ამარტივებს სავიზიტო ბარათების შექმნას, რედაქტირებას, მიღებისა და გაზიარების პროცესებს და აერთიანებს მათ ერთ სივრცეში. იგი ასევე მოიცავს უამრავ ინოვაციურ გადაწყვეტას, მათ შორის:
უნიკალური საერთაშორისო მასშტაბით ჯგუფური გაზიარების სისტემა;
NFC-აქსესუარებისა და ტეგების ონლაინმაღაზია;
ელ.ფოსტის ხელმოწერა;
ვიდეოკონფერენციის ბარათი;
მრავალფუნქციური ვიდჯეტები;
QR-კოდის გამოტანის სისტემა, მაგალითად, სურათად, ეკრანის უკანა ფონად და ა.შ.
ამ აპლიკაციის ისტორიაც საინტერესოა: მაშინ ლერისთან ერთად ქარხნის საკითხებზე ვმუშაობდი, რის გამო 2018 წელს ევრაზიის შეფუთვების ფესტივალზე გავემგზავრეთ. როდესაც დავბრუნდით, აღმოვაჩინეთ, რომ ასობით სავიზიტო ბარათი გვქონდა, საკონტაქტო ინფორმაციით. სწორედ მაშინ მომაფიქრდა იდეა, შეგვექმნა უნიკალური სავიზიტო ბარათების სისტემა, რომელიც სრულად გარდაქმნიდა კონტაქტების გაცვლის სტანდარტულ პროცედურას, გაამარტივებდა და გააუმჯობესებდა მას.
