როგორ გავუმკლავდეთ სტრესს და ავიმაღლოთ განწყობა? უპირველესად განსაზღვრეთ, რატომ იმყოფებით ამა თუ იმ მდგომარეობაში, რამდენად მოგწონთ და კომფორტულად გრძნობთ თავს კონკრეტულ სიტუაციაში; რა გაბრაზებთ, გძაბავთ, გაწუხებთ და გაღიზიანებთ. ზოგიერთი სტრეს-ფაქტორის იდენტიფიცირება მარტივია. ჩვენს განწყობაზე გავლენას ყოველდღიური დაბრკოლებებიც ახდენს.
თქვენ სასარგებლოდ გამოიყენეთ ნებისმიერი ხერხი, რომელიც რელაქსაციაში დაგეხმარებათ. მაგალითად, იოგა, ბუნებაში სეირნობა, მასაჟი, ცეკვა, მუსიკა, ფილმი და სხვა. სტრესთან გამკლავებაში ეფექტურია ჯანსაღი ცხოვრების წესიც: მშვიდი ძილი, რეგულარული ვარჯიში, ვიტამინებითა და მინერალებით მდიდარი რაციონი. მაქსიმალურად შეამცირეთ დრო, რომელსაც კომპიუტერისა თუ ტელევიზორის ეკრანთან ატარებდით და გააკეთეთ საინფორმაციოს ფილტრი, რაც ჩვენს ყოველდღიურობაზე უარყოფით გავლენას ახდენს.
იმისათვის, რომ მეტნაკლებად დაგეხმაროთ და გარკვეული წვლილი ჩვენც შევიტანოთ თქვენი განწყობის ამაღლებაში, რამდენიმე საჭირო რჩევას მოგცემთ.
რეგულარული ვარჯიში, განსაკუთრებით კი იოგა, ძალიან კარგი გამოსავალია სტრესისგან თავის დასაღწევად. ეს არის სხეულზე ორიენტირებული ფსიქოთერაპია, რომელიც კუნთების მოდუნებას იწვევს, ამით კი პრობლემისგან ვთავისუფლდებით. ჩვენგან გამოდის ბრაზი, რომელიც ხშირ შემთხვევაში კუნთებშია ჩაკირული, ხოლო ბრაზის გამოსვლისთანავე ქრება ემოციაც.
თქვენ უკვე გსმენიათ იოგას მრავალი სარგებლის შესახებ, მაგრამ გარდა ფიზიკური ჯანმრთელობის მნიშვნელოვანი უპირატესობებისა, იოგამ დაამტკიცა, რომ სტრესის წინააღმდეგ ბრძოლაში მნიშვნელოვნად გეხმარებათ. იოგას მოყვარულები უკვე აფასებენ ამ ხელოვნების დამამშვიდებელ ღირსებებს. არ არის საჭირო იყოთ ექსპერტი, რათა მიხვდეთ რამდენად დიდ გავლენას ახდენს იოგა თქვენს სტრესულ დონეზე; თუნდაც მარტივ პოზაში მოკლევადიანი სესიის დროს, იგრძნობთ რამდენად მოქმედებს თქვენს გონებაზე და როგორ გათავისუფლებთ კუნთების ტკივილისგან, რომ აღარაფერი ვთქვათ სუნთქვის ბალანსსა და კონცენტრაციაზე.
ცურვა უპირველეს ყოვლისა ფიზიკური დატვირთვაა, რომლის შემდგომი დაღლილობა არის ჯანსაღი დაღლილობა და საბოლოო ჯამში, გვაძლევს განტვირთვის საშუალებას. წყალში ჩაძირული სხეული მისი მიწიერი წონის მხოლოდ მესამედს იწონის. სიმსუბუქის ეს შეგრძნება კი კარგია თქვენი სხეულისა და გონებისთვის, რადგან ამ დროს სიმძიმისა და შებოჭილობის ყველანაირი ნიშანწყალი ქრება და კუნთები დუნდება.
რაც შეეხება მასაჟს, ეს არის ფიზიოთერაპიის მეთოდი, რომელიც აჯანსაღებს და ალამაზებს ორგანიზმს, აღადგენს სხეულში ლიმფოდრენაჟს და სისხლის მიმოქცევას, დადებითად მოქმედებს ცენტრალურ ნერვულ სისტემაზე; აღადგენს ძვალ-სახსროვანი სისტემის ნორმალურ მუშაობას; ხსნის კუნთების სპაზმს და ხელს უწყობს სტრესისგან გათავისუფლებას. სტრესის დროს ასევე რეკომენდებულია შარკოს შხაპი გოგირდის წყლით. გოგირდის აბაზანების მიღებას აქვს უნიკალური თვისება − მინერალური წყლიდან გამომუშავდება სულფიდები, რომელიც ღრმად აღწევს კანში და ამდიდრებს უჯრედების სტრუქტურას. კიდევ ერთი იდეალური ვარიანტია რელაქს-მასაჟი სურნელოვანი ეთერზეთების გამოყენებით. 40-წუთიანი რელაქს-მასაჟი კეთდება მთლიან სხეულზე, სპეციალური დამამშვიდებელი ეთერზეთების გამოყენებით.
დარწმუნებული ვარ სასიამოვნო ფილმის ნახვა და წიგნის წაკითხვა განტვირთვის საშუალებებს შორის ნამდვილად ლიდერია. ამ დროს ჩვენ ვეშვებით სამყაროში, რომელიც ყოველდღიურ სტრესს გვავიწყებს. პულსის დაგდებითა და კუნთების მოდუნების წყალობით, ამ ორ აქტივობას შეუძლია ხელი შეუწყოს რელაქსაციას.
