OK! გაესაუბრა საქართველოში კერვის პირველი ონლაინკურსების შემქმნელ ნათელა აბაიშვილს. მან ინტერვიუში ისაუბრა თავისი გამოცდილების, განვლილი გზისა და სამომავლო გეგმების შესახებ. ქალბატონმა ნათელამ აღნიშნა, რომ კერვა მეტად მნიშვნელოვანი საქმიანობაა, რომლის შესწავლის სწორად დაწყება არის უმნიშვნელოვანესი, კარგი კურსის პოვნა კი საკმაოდ რთული გახლავთ. ვინაიდან კერვა საქართველოში ძალიან დიდი ხნის განმავლობაში მოძველებული და რთული მეთოდებით ისწავლებოდა, მან გადაწყვიტა ეს პროცესი გაემარტივებინა და ონლაინპლატფორმაზე გადასვლით ყველასთვის ხელმისაწვდომი გაეხადა.
გვიამბეთ იმის შესახებ, თუ როდის გახდა კერვა თქვენი მთავარი საქმიანობა.
მე ვმუშაობდი საქართველოს ეროვნულ სამხედრო აკადემიაში ამერიკელ მრჩევლებთან, ოფისის და რესურსების მენეჯერის/თარჯიმნის პოზიციაზე. ვინაიდან მე და ჩემს მეუღლეს ძალიან გვიყვარდა ძაღლები და მათზე ზრუნვა, ხშირად მოგვყავდა ისინი ჩვენთან. ერთ დღესაც, როდესაც მივხვდი, რომ ძაღლების მოვლა და მუშაობა ერთად ვერ ხერხდებოდა, სამსახურიდან წამოვედი, გარკვეული პერიოდის შემდეგ კი დავიწყე კერვის კურსებზე სიარული. ეს კურსები მეტად მოძველებული და რთული მეთოდების იყო, ამიტომ ვერანაირი ცოდნა ვერ მივიღე. თუმცა ამის შემდეგ ინგლისისა და აშშ-ის კერვის კურსებმა უდიდესი გამოცდილება შემძინა, რამაც გადამაწყვეტინა ქართველებისთვის კერვის სწავლება მეტად მარტივი მეთოდებით. ეს საქმიანობა მთელი ჩემი სამყაროა და ფაქტი, რომ ადამიანებს ჩემს ცოდნასა და გამოცდილებას ვუზიარებ, ძალიან მაბედნიერებს.
გვიამბეთ თქვენი საქმიანობის შესახებ.
როდესაც პანდემია დაიწყო, გადავწყვიტე ისეთი საქმიანობა წამომეწყო, რომელიც შინ მყოფ ქალბატონებს გაახალისებდა და დიდ სარგებელსაც მოუტანდა. სწორედ იმ პერიოდში საქართველოში პირველმა შევქმენი კერვის ონლაინკურსები. ვასწავლი კერვას − კონსტრუირებას, მოდელირებასა და ტექნოლოგიურ დამუშავებას. გარდა ამისა, ვასწავლი ქვილთინგს და პაჩვორკს − ეს ტექნიკა გამოიყენება როგორც ტანსაცმლის, ისე გადასაფარებლების, ბალიშების და ა.შ. შეკერვისას.
ამ ეტაპზე მსურველებს Facebook-პლატფორმის მეშვეობით ვასწავლი კერვას. სპეციალურ ჯგუფებს ვქმნი, სადაც ვტვირთავ ჩემ მიერ ჩაწერილ და დამონტაჟებულ ვიდეოგაკვეთილებს. აღსანიშნავია, რომ მსურველს, რომელიც სწავლის საფასურს გადაიხდის, მუდმივი წვდომა ექნება გაკვეთილებზე. ყოველივე ეს კი მისთვის სასურველ დროს მეცადინეობის შესაძლებლობას იძლევა.
კურსები წარმოდგენილია შემდეგი მიმართულებებით: ქალის ტანისამოსის კონსტრუირება, მოდელირება, ტექნოლოგიური დამუშავება; ბავშვის ტანისამოსის კონსტრუირება; ქვილთინგი, პაჩვორკი, აპლიკაცია; ჩანთების, ქუდების, საცურაო კოსტიუმებისა და აქსესუარების კერვა.
რა სახის კონტენტია წარმოდგენილი თქვენს YouTube-არხზე?
ჩემს YouTube-არხზე უკვე გამზადებული თარგების ვიდეოგაკვეთილებს ვათავსებ, რომელიც სრულიად უფასოა. მინდა აღვნიშნო, რომ ასეთი ტიპის გამზადებული თარგები საქართველოში ხელმისაწვდომი არ იყო, ვიდრე მე არ შემოვიტანე. ვინაიდან ყველამ, ვინც ახლა იწყებს კერვას, გამზადებული თარგებით უნდა დაიწყოს, მე ჩემს მოსწავლეებს და სხვა მსურველებსაც ვაძლევ საშუალებას შეიძინონ ისინი.
აღსანიშნავია, რომ პირველი კურსი არის უფასო, რომელიც მოსამზადებელი ხასიათისაა. მეორე კურსიდან კი ინტენსიურად იწყება კონსტრუირების, მოდელირებისა და ტექნოლოგიური დამუშავების შესწავლა.
გვესაუბრეთ თქვენი სამომავლო გეგმების შესახებ.
სამომავლო გეგმები მრავლად მაქვს. ასევე, მსურს ბავშვებს პირისპირ, ინგლისურ და ქართულ ენებზე კერვის გაკვეთილები ჩავუტარო. მეორე, ეს არის მორგებისა და მოდელირების კურსების მომზადება. ამასთან, ვფიქრობ მკერავის კლუბის გახსნას, სადაც მოვაწყობ სასიამოვნო გარემოს საკერავი მანქანებით და კერვისთვის საჭირო ყველა ინვენტარით. ნებისმიერი ადამიანი ჯავშნის გაფორმების შემდეგ შეძლებს მოსვლას და ამ სივრცის გამოყენებას. თუ რაიმე სირთულე ექნებათ მუშაობის პროცესში, ავუხსნი და მივცემ მათ იმ რჩევებს, რომლებსაც მუშაობის დროს გამოიყენებენ.
საკონტაქტო ინფორმაცია:
YouTube/Facebook/Instagram: Passion to Sew
ტექსტი: მარიამ მთივლიშვილი
ფოტო: ალექსეი სეროვი
