საქართველომ 2026 წლის „ოსკარზე“, საუკეთესო საერთაშორისო მხატვრული ფილმის ნომინაციაში რეჟისორ გიორგი სიხარულიძის „პანოპტიკონი“ წარადგინა. ამის შესახებ ინფორმაციას საქართველოს კინემატოგრაფიის ეროვნული ცენტრი ავრცელებს.
„ოსკარზე“ გასაგზავნი ფილმი 16 სექტემბერს, სპეციალური კომისიის წევრების მიერ ფარული კენჭისყრის საფუძველზე გამოვლინდა.
კინოცენტრის ორგანიზებით გამართულ კონკურსში საპროდიუსერო კომპანიებისგან წარდგენილი იყო ორი ფილმი:
„ტერცო მონდო“ (რეჟ. მერაბ კოკოჩაშვილი)
„პანოპტიკონი“ (რეჟ. გიორგი სიხარულიძე)
„პანოპტიკონი“ პროვოკაციული დრამაა, რომელიც იდენტობისა და თანამედროვე სამყაროში საკუთარი თავის ძიების საკითხებს იკვლევს. სიუჟეტის ცენტრში 16 წლის სანდროა (დათა ჩიჩუა), რომელიც რთულ ცხოვრებისეულ სიტუაციაში აღმოჩნდება. მამის გარეშე დარჩენილი სანდროს დედა საზღვარგარეთ მუშაობს, მოზარდი კი ცდილობს ცხოვრებაში თავისი ადგილი იპოვოს და საკუთარ გრძნობებსა და შეხედულებებში გაერკვეს. სანდროს ახალი მეგობრის დედის მიმართ ძლიერ ლტოლვას გრძნობს, რაც მის მდგომარეობას უფრო ართულებს. სანდრო ხვდება, რომ მორალური დილემების წინაშეა.
“პანოპტიკონი” საქართველოს, საფრანგეთის, იტალიისა და რუმინეთის ერთობლივი ნამუშევარია. ფილმში მთავარ როლებს დათა ჩაჩუა, ქეთევან შერვაშიძე, მალხაზ აბულაძე და ია სუხიტაშვილი ასრულებენ.
ქართველი კინემატოგრაფისტები 2023 წლის აგვისტოდან ეროვნულ კინოცენტრს ბოიკოტს უცხადებენ, ამიტომ ბევრმა რეჟისორმა „ოსკარზე” გასაგზავნი ფილმის შესარჩევ კონკურსში მონაწილეობაზე უარი თქვა.
როგორც წესი, შემოდგომაზე ყველა ქვეყანა „ოსკარზე“, საუკეთესო უცხოენოვანი ფილმის კატეგორიაში წარადგენს ერთ ფილმს, რის შემდეგაც შეერთებული შტატების კინოაკადემია არჩევს სურათებს „გრძელი სიისთვის“, ნახევარფინალისთვის და თებერვლის დასაწყისში ფინალურ ნომინანტებს აცხადებს. ასე რომ „პანოპტიკონმა“კიდევ ორი შერჩევა უნდა გაიაროს.
ამერიკული კინოაკადემიის ჯილდო საუკეთესო უცხოენოვანი ფილმისთვის ერთ-ერთი ჯილდოა ოსკარის კინოფესტივალზე, რომელიც ამერიკის შეერთებულ შტატებში ყოველწლიურად იმართება. ჯილდო გადაეცემა სრულმეტრაჟიან მხატვრულ ფილმს, რომელიც გადაღებულია შეერთებული შტატების საზღვრებს გარეთ, არა ინგლისურ ენაზე.
საქართველომ კატეგორიაში „საუკეთესო უცხოენოვანი ფილმი“ სულ 15 ფილმი წარადგინა. მათ შორის მხოლოდ ერთი ფილმი — „შეყვარებული კულინარის 1001 რეცეპტი“ (1996 წ.) იყო ნომინირებული ოსკარის ჯილდოზე.
