ივლისის თვეში, ჟურნალ OK!-ის დამატება Health and Beauty Book-ია, რომლის მოწვეული რედაქტორი Voulez Vous-ს PR-ი და „ჩემი ცოლის დაქალების“ მსახიობი ნინო ნოდიაა. თამამად შემიძლია ვთქვა, რომ მკითხველისთვის ეს იქნება ერთ-ერთი საუკეთესო ნომერი, რაც აქამდე წაუკითხავს. მანამდე კი გთავაზობთ ინტერვიუს, რომელიც უფრო უკეთ გაგაცნობთ ყველასთვის საყვარელ ნინო (ზუზუ) ნოდიას.
გქონიათ თუ არა რედაქტორის ამპლუაში ყოფნის გამოცდილება და რამდენად საინტერესო აღმოჩნდა თქვენთვის OK! Health and Beauty Book-ზე მუშაობის პროცესი?
ძალიან მიყვარს, როდესაც ახალი გამოწვევების წინაშე აღმოვჩნდები ხოლმე და მთელი ჩემი ცხოვრება განებივრებული ვარ ასეთი სიტუაციებით. ძალიან ხშირად ამხდენია ის, რაზეც მიფიქრია და მიოცნებია.
სიმართლე გითხრათ, ყოველთვის მინდოდა მეთანამშრომლა ჟურნალთან და როდესაც ეს შემოთავაზება მივიღე OK! Magazine Georgia-სგან, კიდევ ერთხელ დავრწმუნდი იმაში, რომ ოცნებები ხორციელდება. სწორედაც რომ შემოქმედებითი სიცარიელის დროს მივიღე ეს შემოთავაზება და ნამდვილად ძალიან საინტერესო აღმოჩნდა ეს გამოწვევა ჩემთვის.
რას წაიკითხავს მკითხველი OK! Health and Beauty Book-ში?
მეორე დღესვე დავიწყე ჟურნალის კონცეფციაზე ფიქრი, რადგანაც ეს არის დაბეჭდილი ნივთი, რომელიც მთელი ცხოვრება დამრჩება. ძალიან ბევრი აზრი და იდეა მიტრიალებდა თავში ერთდროულად. რასაკვირველია, ყველა თემა დაკავშირებული უნდა ყოფილიყო სილამაზესთან და ჯანმრთელობასთან. ვინაიდან ჟურნალზე ერთჯერადად უნდა მემუშავა, მსურდა ყველაფერი ჩამეტია მასში. მინდოდა ამ წიგნში გამეერთიანებინა ჩემთვის მნიშვნელოვანი ადამიანები − როგორც ფართო საზოგადოებისთვის კარგად ნაცნობი, ასევე უცნობი სახეები. ვეცადე ცნობადი ადამიანები სულ სხვა კუთხით დამენახვებინა მკითხველისთვის, ასევე, ვეცადე ფართო საზოგადოებისთვის ნაკლებად ცნობილი ადამიანები წარმომეჩინა, რომლებიც ისეთი სფეროს წარმომადგენლები არიან, სადაც ჩემთვის ძალიან მნიშვნელოვანი და ლამაზი პროდუქტები იქმნება, რომლებიც საინტერესოა საკუთარი ესთეტიკის აღქმით და შემოქმედებით.
როგორ გამოიყურება თქვენი თვალით დანახული ლამაზი და ჯანმრთელი ადამიანი?
სილამაზე ჩემთვის ძალიან განზოგადებული ცნებაა, რადგან ადამიანი ან ნივთი იმ შემთხვევაში არის ლამაზი, თუ ჩემთვის რამდენიმე ძალიან მნიშვნელოვან კომპონენტს აკმაყოფილებს. ადამიანის შემთხვევაში, გარდა გარეგნული სილამაზისა, აუცილებელია იუმორის გრძნობა, ასევე უნდა იყოს მხიარული, ლაღი და პოზიტიური, რადგან ყველაფერი ეს ადამიანს ძალიან დიდ მიმზიდველობასა და მომხიბვლელობას ანიჭებს. ასევე, აუცილებელია თავისუფალი იყოს ბოღმისგან, შურისგან, ბოროტებისგან.
ჯანმრთელ ადამიანს რაც შეეხება, აქ მნიშვნელოვანი ფაქტორი ფსიქიკაა. მიმაჩნია, რომ ჯანმრთელობის ნებისმიერ პრობლემას საღი გონების ადამიანი აუცილებლად გაუმკლავდება, იმიტომ, რომ ყველაფერი ჩვენი ტვინიდან მოდის. როდესაც გონება მომართულია პოზიტივისკენ, რაც უნდა მივირთვათ და როგორც უნდა ვივარჯიშოთ, არ იქნება ჯანმრთელობის საწინდარი. აქედან გამომდინარე, ბევრი კომპონენტისგან შედგება ჯანმრთელი ადამიანის ცნება.
როგორია თქვენი თავის მოვლის რუტინა?
კონკრეტული და პერმანენტული რუტინა არ მაქვს. ჩემი საქმიანობიდან გამომდინარე, ხშირად მიწევს მაკიაჟის გაკეთება, თუმცა ეს არანაირ დისკომფორტს არ მიქმნის, პირიქით − ყოველთვის ძალიან მიყვარდა თავის მოვლის პროდუქტები.
თავის მოვლის განსაკუთრებული მეთოდები არ მაქვს, არასოდეს ვყოფილვარ დიეტაზე, ძალიან მიყვარს წყალი, განსაკუთრებით − ბუნებრივი რესურსებიდან მოპოვებული. თუ თავისუფალი ვარ, სახის ნიღბებს ვიკეთებ. ხშირად მეგობრები ერთადაც ვიტარებთ ამ რიტუალებს.
თქვენს საქმიანობაზე გვიამბეთ. რა ადგილი უჭირავს თქვენს ცხოვრებაში Voulez Vous-ს და სერიალს „ჩემი ცოლის დაქალები“?
უკვე იმდენად ბევრი წელია, რაც ჩემი ყოველდღიურობა Voulez Vous-ს უკავშირდება, რომ ეს უკვე საქმიანობა კი არა, ჩემი ცხოვრების განუყოფელი ნაწილი გახდა. როდესაც Voulez Vous-ს ღონისძიებას ვგეგმავ, ვუყურებ, როგორც კომპანიის მომხმარებელი, და არა როგორც მისი PR. თამამად შემიძლია ვთქვა, რომ ჩვენი არც ერთი ღონისძიება ერთმანეთს არ ჰგავდა, ყოველთვის სხვადასხვა საინტერესო ლოკაციას ვთავაზობდი სტუმრებს, ახალ აქტივაციებს, საჩუქრებს. შესაბამისად, მუდამ ძალიან მრავალფეროვანი იყო.
გარდა ამისა, მაქვს ჩემი კომპანია, რომელიც ღონისძიებების მოწყობას უზრუნველყოფს. აქ უკვე ვითვალისწინებ დამკვეთის მოთხოვნებს − იქნება ეს კერძო დაბადების დღე, ქორწილი თუ სახელმწიფო ფორუმი. ყველას სხვადასხვა სურვილი აქვს, მაგრამ მუდამ ვცდილობ ჩემეული შემოქმედებითობა და სიახლე შევიტანო ღონისძიებებში.
რაც შეეხება სერიალს, ყოველთვის ძალიან მინდოდა, მონაწილეობა მიმეღო ფილმში ან სერიალში, და ეს შემოთავაზებაც ასე, სპონტანურად მივიღე. მაშინვე დავთანხმდი და დიდი სიამოვნებით ვაგრძელებ მუშაობას დღემდე. ვცდილობ, კარიკატურული და სახალისო იყოს ჩემი პერსონაჟი და უზომოდ მახარებს ფაქტი, რომ ამ სერიალის შემდეგ ძალიან დადებით ემოციებს ვიწვევ საზოგადოებაში.
ოჯახზეც მოგვიყევით.
ამდენი სამსახურის ფონზე, ყველაზე რთული და შრომატევადი აღმოჩნდა ჩემთვის, ვიყო დედა, მეუღლე, შვილი, მეგობარი… იმიტომ, რომ რასაც უნდა ვაკეთებდე, ჩემთვის ამოსავალი წერტილია ჩემი გარშემომყოფები და უახლოესი ადამიანები.
როგორ დაახასიათებდით საკუთარ თავს სამი სიტყვით?
ემოციური, ერთგული და პასუხისმგებლობიანი.
ტექსტი: ციაკო ღამბაშიძე
ფოტო: ალექსეი სეროვი
