ერთხელ დაიან ფონ ფურსტენბერგის გამონათქვამს წავაწყდი: „როდესაც ქალი საკუთარი თავის საუკეთესო მეგობარი ხდება, ყველაფერი გაცილებით იოლად მიდის“. რაღაც მსგავსი გამონათქვამი ახლდა ულამაზესი დაიანას ფოტოს ინსტაგრამზე. მართალია − რაც უნდა ბევრი მეგობარი გვყავდეს, როგორც უნდა გავურბოდეთ სიმარტოვეს, ჩვენი საუკეთესო მეგობარი ზუსტად რომ ჩვენი თავია და კარგი იქნება, ადრე თუ გვიან ამ რეალობას თვალებში შევხედოთ. საკუთარ თავთან კომფორტში ყოფნა გვაძლევს ძალას, კარგად ვაკეთოთ ყველა ის დანარჩენი რამ, რასაც ისედაც ვაკეთებთ და რისთვისაც ვცხოვრობთ ზოგადად. ნურავის მივცემთ საშუალებას, იფიქროს ან იმოქმედოს ჩვენ ნაცვლად, ჩვენ თავად უნდა ვიყოთ საკუთარი ცხოვრების შემოქმედნი. როცა ასე ხდება, გარდაუვალია ცხოვრება არ იყოს განსაკუთრებულად საინტერესო და სავსე.
ჩემს თავს თითქმის ყოველდღე ერთსა და იმავეს ვთხოვ − არ მომწყინდეს ის რუტინა, რომელშიც ვცდილობ ჩავაყენო საკუთარი თავი, რაც, შემიძლია ვთქვა, უკვე ალბათ 25 წელზე მეტია გრძელდება. საკუთარი თავის მოვლა მიყვარს, მიმაჩნია, რომ ჩვენი გარეგნობა ხშირად შინაგან განწყობას ასახავს. ბევრი დეტალია ქალისთვის განსაკუთრებით გასათვალისწინებელი, თუნდაც 40 წლის შემდეგ.
რამდენჯერ დაგვინახავს ცნობილი ადამიანები, მათ ირგვლივ ამტყდარი აჟიოტაჟი იმის გამო, რომ აგერ უკვე 55 წლის ასაკში კვლავ გოგოებივით არიან. ხომ არ გგონიათ, რომ ეს მხოლოდ ჰოლივუდის ვარსკვლავებს შეუძლიათ? არავითარ შემთხვევაში. გამოვიყურებოდეთ ჯეილოსავით, ყველას შეგვიძლია. მთავარია დავიწყოთ იმაზე ფიქრი, რომ საკუთარი თავის მოვლა და მოფრთხილება მისიაა, რომელიც ყველას გვაკისრია. ვფიქრობ, მაქვს თქვენთვის პატარა რჩევები, რომლებსაც აქვე ჩამოვწერ. იქნებ გამოგადგეთ და იქნებ რომელიღაც მაინც მოუხდეს ჩვენს ყოველდღიურობას:
თუკი დილით მოიწყინეთ, არ გაქვთ სურვილი წამოდგეთ და ცუდმა ფიქრებმა მოგიცვათ, არ დანებდეთ − სასწრაფოდ შემოუძახეთ თავს. წამოდექით და წყალი დალიეთ. წყალი ყველაფრის მკურნალია. ხშირად სტრესს ბევრი კვება და წონაში მატებაც იწვევს, ამიტომ უნდა გავიაზროთ, რომ რეალურად, არ გვჭირდება ბევრი კვება. თუ ბევრს მივირთმევთ, ეს მხოლოდ ჩვენი გაუმაძღარი ტვინის ბრალია. აი, გაუმაძღარი ტვინი კი სჯობს სხვა, უფრო სასარგებლო ამბებისკენ მივმართოთ.
40+ არაფერ შუაშია წონის კლების აუცილებლობასთან – წონის კონტროლი ყველა ასაკში მნიშვნელოვანია. წონაზე ამდენს იმიტომ გესაუბრებით, რომ თქვენც იცით და მეც, რამდენად მნიშვნელოვანია დღევანდელ დღეს ნორმალური კვება – როგორც სილამაზისთვის, ასევე ჯანმრთელობისთვის. ამიტომ გავუსწოროთ რეალობას თვალი და დავიწყოთ.
განტვირთვის დღეები ძალიან სასარგებლოა. არ არსებობს შემთხვევა, რომ ერთდღიან განტვირთვას და კვებაზე უარის თქმას ადამიანი მოეკლას. მეტიც − ხვალ დილით თქვენ გაცილებით მეტი ენერგია და საუკეთესო განწყობა გექნებათ. დალიეთ ბევრი წყალი, ისეირნეთ და გააკეთეთ ის, რისი გაკეთებაც დიდი ხანია გინდათ და გარკვეული მიზეზით გადადეთ.
კარგია გვახსოვდეს, რომ ძირითადი პროდუქტი, რომელიც ყველას ჰაერივით გვჭირდება, არის წყალი, და ის, ჩვენდა საბედნიეროდ, ყველასთვის ერთნაირად მოედინება ონკანებიდან. დილას 500 მლ-ით ვიწყებთ და აუცილებლად ვიღებთ 2 ლიტრს, კვებამდე 20-30 წუთით ადრე. ამ რჩევის ფასი არაფერია – წყალი ზუსტად ისაა, რაც ყველას ერთნაირად გვჭირდება.
16-18-საათიანი ინტერვალი. ეს გენიალური მიგნება იოშინორი ოსუმის ეკუთვნის. შიმშილი და მარხვა ერთმნიშვნელოვნად სასარგებლოა – ორგანიზმი ნამდვილად იწმინდება. ფაქტი დამოწმებულია ნობელის კომიტეტის მიერ. ამასთან, როგორც ოსუმის კოლეგები გვარწმუნებენ, ავტოფაგია ორგანიზმს ნაადრევი სიბერისგან იცავს. შესაძლოა, ასევე აახალგაზრდავებს ახალი უჯრედების შექმნის ხარჯზე, ორგანიზმიდან კი დაზიანებული ცილები და უჯრედშიდა ელემენტები გამოაქვს.
ეცადეთ დაიცვათ 16-საათიანი ინტერვალი. ამ დროს შეიძლება მხოლოდ წყალი და შავი ყავა. კვების დროს კი, რომლისთვისაც გვაქვს 6-8 საათი, შეიძლება იმ საკვების მიღება, რომელზეც შევთანხმდებით საკუთარ თავთან. დავიწყოთ საუზმე 12:00 ან 13:00 საათზე, ხოლო ვინც 18-საათიან ინტერვალს დაიცავთ, კვებას შესაბამისად 18:00 ან 19:00 საათზე შეწყვეტთ. ვინც 16-საათიან ინტერვალს ამჯობინებთ, საუზმეს 10:00-ზე დაიწყებთ და 8 საათი გექნებათ კვების რეჟიმის გადასანაწილებლად. მთავარია, არაფერი მიირთვათ ამ შუალედში. მოისვენოს თქვენმა ინსულინმა, იმუშაოს თქვენი ორგანიზმის მავნე უჯრედებისგან გაწმენდაზე.
მოძრაობა და ვარჯიში. მოძრაობის გარეშე არაფერი გამოვა. დილა იქნება თუ საღამო, გააკეთეთ ეს თქვენი თავისთვის და მომავლისთვის. პირადად მე, ფეხით სიარულს გირჩევთ, რადგან სუფთა ჰაერზე სეირნობა არის ის, რაც უამრავი დაავადებისგან იცავს ადამიანს და რაც მთავარია, ტვინისთვის არის #1 ვიტამინი. ჩამოტვირთეთ პეისერი და ეცადეთ 6000 ნაბიჯს არ ჩამოსცდეთ 24 საათში. ასევე, აკეთეთ ის ვარჯიშები, რომელიც სიამოვნებას განიჭებთ. რადგან ჯერ კიდევ არ ვიცით, როდის გაიღება სპორტული დარბაზები, უმჯობესია შინ გქონდეთ ადგილი, სადაც განმარტოვდებით და დღეში 30 წუთი ივარჯიშებთ. პრესის, ხელისა და ფეხის ვარჯიშები უამრავია YouTube-ზე. ინსტაგრამზე გაგაცნობთ იუტუბერს, რომლის ვარჯიშებიც ძალიან მომწონს.
ვისაც უნდა ეთქვა, არ დავიჯერებდი, მხოლოდ საკუთარი გამოცდილებით გეუბნებით, რომ პირადად მე 20-იანებში სულ სხვანაირი ვიყავი, გაცილებით სუსტი და უიმედო. ერთი, რისი მადლობელიც ვარ საკუთარი თავის, ყოველთვის ვიყავი დისციპლინირებული და სისტემური ადამიანი. ფიზიკური ვარჯიშიც 24 წლისამ დავიწყე. მას მერე, ათი წელი, შემიძლია ვთქვა, რომ დღე არ გამიცდენია და ეს ძალიან დამეხმარა − 46 წლის ვარ და თავს არაჩვეულებრივად ვგრძნობ.
40 წელს ზემოთ ცხოვრება ისეთივე საინტერესო და სიხარულით, ბედნიერებითა და უამრავი ინტერესით სავსეა, როგორც მანამდე. მეტიც – გაცილებით უკეთესიცაა. მთავარია გვჯეროდეს საკუთარი თავის, გვიყვარდეს ის და ყოველდღე ვუთხრათ სარკის წინ, როგორ გვიყვარს და ვზრუნავთ მასზე.
ჩვენში დაგროვილი ცოდნა და გამოცდილება ყველაზე დიდი საგანძურია, რაც გვაქვს ქალებს. ეს საიდუმლოებები უნდა მოვუყვეთ ერთმანეთს. როცა ქალი გადაწყვეტს, ეს აუცილებლად იქნება ასე. გავხდეთ უკეთესები, და ეს უნდა დავიწყოთ ახლა − ზუსტად ამ წუთიდან.
ნინო ჯიბლაძე
ჟურნალ OK!-ის მთავარი რედაქტორი
