OK! Health and Beauty Book-ის საპატიო სტუმარი მარინა ბერიძეა, რომელიც ყოველთვის მომხიბვლელად გამოიყურება. როგორია მისი ყოველდღიური რუტინა, თავის მოვლის რომელ პროდუქტებს იყენებს, როგორია მისი თვალით დანახული ლამაზი და ჯანმრთელი ადამიანი… ამ და სხვა საინტერესო შეკითხვებზე პასუხებს ინტერვიუში წაიკითხავთ.
ქალბატონო მარინა, გაგვიზიარეთ თქვენი ყოველდღიური რუტინა.
ბუნებით მოწესრიგებული ადამიანი ვარ, აქედან გამომდინარე, დილით ადრე ვდგები, შემდეგ ვიღებ შხაპს, ვუვლი თავს, ვსვამ ყავას… მთელი დღე საქმეში ვარ, სამსახურშიც და შინაც. ღამით გვიან ვიძინებ, ამიტომ ძალიან მიყვარს შუადღისას, დაახლოებით 5 საათისკენ ცოტა ხნით დაძინება, თუნდაც ნახევარი საათით, რითაც ვინაზღაურებ ენერგიას.
როგორია თქვენი კვების რაციონი? არის პროდუქტები, რომლებსაც ცდილობთ ხშირად მიირთვათ?
კვებას რაც შეეხება, არ მივირთმევ ბევრ საკვებს. ეს უკვე ჩვევაში გადამივიდა. მაქვს განსაზღვრული დროები. ძალიან მიყვარს ხაჭო, ასევე ხაჭო და არაჟანი ერთად. რასაკვირველია, ბოსტნეულიც, თუმცა ჩემთვის ასევე ძალიან მნიშვნელოვანია ხორციანი საკვების მიღება, კვირაში სამჯერ მაინც. თავს ვიკავებ ცომეულზე და ტკბილეულზე. შემოვიფარგლები მხოლოდ შავი შოკოლადით.
სპორტული აქტივობით ხომ არ ხართ დაკავებული?
ამ ეტაპზე არა, თუმცა მქონია პერიოდი, როდესაც ერთი წლის განმავლობაში აქტიურად დავდიოდი ბოტანიკურ ბაღში და ვვარჯიშობდი. ჩემს ორგანიზმს არაფერს ვაიძულებ. რისი გაკეთებაც მსურს, იმას ვაკეთებ. თუმცა შემოქმედებითად ვარ ძალიან დატვირთული. ეს მშველის და მინაზღაურებს ფიზიკური აქტივობების დანაკლისს.
გვესაუბრეთ თავის მოვლის პროდუქტებზე.
ძალიან აქტიური მომხმარებელი ვარ სოლარიუმის, იმიტომ, რომ მაბედნიერებს და კარგ გუნებაზე მაყენებს. აქედან გამომდინარე, მუდმივად რუჯი მაქვს. თავის მოვლის პროდუქტებს რაც შეეხება, ვიყენებ სახის მარტივ დამატენიანებელ კრემს, ტონალურს ძალიან მცირე რაოდენობით, ხოლო ტუჩსაცხს ტუჩისფერს. ასევე, ძალიან მიყვარს წამწამების ტუში. მხიარული ადამიანი ვარ და მგონია, რომ ეს არის ყველაფრის წამალი.
რამდენად ჩართული ხართ თანამედროვე ტექნოლოგიების განვითარებაში?
ჩემს თაობას საკმაოდ რთული პირობების გავლა მოუწია. დაახლოებით ორმოცდაათი წლის ვიყავი, როდესაც ახალი ტექნოლოგიები გამოჩნდა და აზარტულად ჩავერთე ამ პროცესებში. დიდ კომფორტს გვთავაზობს თანამედროვე ტექნოლოგიები, განსაკუთრებით მაშინ, როდესაც ძალიან ეჩქარება ადამიანს. თუმცა, მაინც მიმაჩნია, რომ არაფერი სჯობს ცოცხალ ურთიერთობებს.
ძალიან მიყვარს თანამედროვე ლიტერატურა, მხატვრობა, მუსიკა და ვცდილობ მუდმივად ვიყო ყველაფრის საქმის კურსში. ყველამ უნდა ვიცოდეთ, რა ხდება ჩვენ გარშემო და ზოგადად, სამყაროში.
თქვენი აზრით, როგორ გამოიყურება ლამაზი და ჯანმრთელი ადამიანი?
ლამაზი ადამიანი არის მოვლილი ადამიანი. დედაჩემი ყოველთვის ამბობდა, რომ არ არსებობენ უშნო ქალები − არსებობენ მოვლილი და მოუვლელი ქალბატონები. ყველა ქალმა 5 წუთი მაინც უნდა იფიქროს შინიდან გასვლამდე − სად მიდის, როგორ უნდა გამოიყურებოდეს და რა უნდა ჩაიცვას, იმიტომ, რომ სხვადასხვა ადგილას წასვლას შესაბამისი ჩაცმულობა ესაჭიროება. პირადად მე, თუნდაც ყოველი ეთერის წინ, არა 5-10 წუთით ადრე, არამედ დიდი ხნით ადრე ვიწყებ ფიქრს, რა უნდა ჩავიცვა და როგორ უნდა გამოვიყურებოდე.
