პანდემიის კარჩაკეტილობისას ყველამ თავიდან აღმოაჩინა საკუთარი თავი. ზოგი ძაფებს, ყაისნაღს და ჩხირებს ეცა, ზოგმა ხატვა სცადა, ზოგმა კერვა. თეამ გადაწყვიტა საკუთარი თავი ქოთნების შექმნაში გამოეცადა. შეარჩია, თითქოსდა, მარტივი მასალა – ბეტონი. შეიძინა თითო ტომარა ცემენტი და ქვიშა და საქმეს შეუდგა:
„ყალიბებისთვის დავეძებდი ჯამებს, თან აუცილებლად ორი ერთმანეთთან თავსებადი უნდა ყოფილიყო – გარე და შიდა არესთვის. მაღაზიაში ეჭვისთვალით მიყურებდნენ, როდესაც სხვადასხვა ჯამებს ერთმანეთს ვაზომებდი და შემოქმედებითი მზერით ვაფასებდი“ – იცინის ახლა უკვე ფირმა „ბეტონას“ შემქმნელი, თეა კიკნაძე.
თუმცა, დასაწყისში სულაც არ ეცინებოდა და საქმეც არ გამოდგა ასეთი მარტივი, როგორც ეგონა. უამრავი წაკითხული მასალის და რჩევის მიუხედავად, თავად უნდა მიეგნო ბეტონის ზუსტი კონსტიტენციისთვის, რომელიც საშუალებას მისცემდა, ნაწარმი მდგრადი, ხოლო ზედაპირის ფაქტურა, სურვილისამებრ, ან ხაოიანი ან პრიალა გამოსულიყო. ბევრი ძიების შემდეგ მიაგნო თავის „განუმეორებელ“ ფორმულას, რომელიც ლავირების საშუალებას იძლევა.
მერე დაიწყო ფერით თამაში – ზოგი უბრალოდ დაფერა, ზოგს დაძველების ეფექტი შესძინა, ზოგიც ნახატებით მორთო. საბოლოო ჯამში – გართობა საქმედ გადაექცა. დღეს, თეა უკვე შეკვეთებს იღებს და მისი ნამუშევრები ბევრ ინტერიერს ამშვენებენ და რაც მთავარია, ადამიანების ცხოვრებაში ცოცხალი „მწვანე გარემო“ შემოაქვთ, რომელიც დახვეწილ სათავსოებში ბინადრობს.
„ბეტონნა“ კომპლექსური ესტეთიკაა…
