პოპ მუსიკის მეფედ აღიარებული მაიკლ ჯექსონის წინააღმდეგ სასამართლოში ახალი სარჩელი შეიტანეს. ხუთმა და-ძმამ კასიოების ოჯახიდან გარდაცვლილ მომღერალს ბრალი სექსუალური ხასიათის ძალადობასა და ფსიქოლოგიურ ზეწოლაში დასდო, რაც მათი თქმით, 25 წლის განმავლობაში გრძელდებოდა. ამის შესახებ გამოცემა Daily Mail-ი იუწყება.
პოლიციისთვის გადაცემული მასალების თანახმად, ჯექსონი, რომელიც ოჯახის უფროსთან, დომინიკ კასიოსთან მეგობრობდა, ბავშვებზე წლების განმავლობაში ფსიქოლოგიურ ზემოქმედებას ახორციელებდა, რათა შემდგომში მათზე სექსუალური ძალადობა მოეხდინა. მოსარჩელეთა განცხადებით, ძალადობის ფაქტები როგორც ნიუ-ჯერსიში მდებარე სახლში, ისე მომღერლის კალიფორნიულ რანჩო „ნევერლენდში“ ხდებოდა. ამასთან, უფროსი ძმა, ფრენკ კასიო დიდი ხნის განმავლობაში, მომღერლის პირად ასისტენტად მუშაობდა, მსგავსი სკანდალების დროს საჯაროდ იცავდა და მოგვიანებით, წიგნიც კი დაწერა – „ჩემი მეგობარი მაიკლი – ჩვეულებრივი მეგობრობა არაჩვეულებრივ ადამიანთან“.
წყაროს ინფორმაციით, თითოეული კასიო ფიქრობდა, რომ მომღერალი მხოლოდ მასზე ძალადობდა და მხოლოდ წლების შემდეგ გააცნობიერეს, რომ ყველას ერთი განსაცდელი აერთიანებდა.
„როდესაც ყველაფერი გააცნობიერეს, ეს მათთვის უზარმაზარ ტრავმად იქცა. მათი ისტორია შოკისმომგვრელია,“ – აღნიშნა წყარომ და დაამატა, რომ ბრალდებების სიმძიმის გამო, ახალი სარჩელი შეიძლება ჯექსონის ოჯახისათვის „კოშმარად“ იქცეს.
აღსანიშნავია, რომ ეს კასიოების ოჯახის პირველი სარჩელი არ არის. 2020 წელს, HBO-ს სკანდალური ფილმის –„Leaving Neverland“ („ნევერლენდის დატოვება“) გამოსვლის შემდეგ, მათ ანალოგიური ბრალდებები წამოაყენეს. მაშინ და-ძმებმა საქმის სასამართლოს გარეშე მოგვარების სანაცვლოდ, 13 მილიონი ფუნტი მიიღეს. თუმცა, კასიოების თქმით, იმ შეთანხმებას ზეწოლის გამო დათანხმდნენ და ახლა 160 მილიონ ფუნტს ითხოვენ.
შეგახსენებთ, რომ ფილმი „Leaving Neverland“ უეიდ რობსონისა და ჯეიმს სეიფჩაკის ჩვენებებზეა დაფუძნებული, რომლებმაც განაცხადეს, რომ ბავშვობის წლებში მაიკლ ჯექსონი მათზე ძალადობდა. ფილმმა საზოგადოების აღშფოთება გამოიწვია – ჯექსონის თაყვანისმცემლებმა რობსონი და სეიფჩაკი ცილისწამებაში დაადანაშაულეს, ხოლო მომღერლის ოჯახმა HBO-ის წინააღმდეგ სასამართლოში სარჩელი შეიტანა. მათი თქმით, არხმა მუსიკოსის რეპუტაციასა და ხსოვნას ჩრდილი მიაყენა.
მაიკლ ჯექსონს პედოფილიაში ბრალი პირველად 1993 წელს დასდეს. საუბარი 13 წლის ჯორდან ჩანდლერის მიმართ გარყვნილ ქმედებებს ეხებოდა. საქმე მაშინ დაიხურა, როდესაც ჯორდანის მამამ მაიკლისგან 23 მილიონი დოლარი მიიღო. 2003 წელს ჯექსონის წინააღმდეგ ბრალდება კიდევ რამდენიმე ადამიანმა, მათ შორის ყოფილმა თანამშრომლებმა და დამლაგებლებმა წამოაყენეს, თუმცა მოგვიანებით ყველა მათგანმა საკუთარ ჩვენებაზე უარი თქვა.
მაიკლ ჯექსონი 50 წლის ასაკში, პროპოფოლით გამოწვეული ინტოქსიკაციით გარდაიცვალა. „პოპის მეფის“ სიკვდილში დამნაშავედ მისი პირადი ექიმი ცნეს.
ასევე დაგაინტერესებთ
#OK! მაიკლ ჯექსონის როლს ფილმში მისი ძმის შვილი ჯაფარ ჯექსონი ითამაშებს
