გარდა იმისა, რომ ვქმნით ინოვაციურ პლატფორმებსა და მომსახურებებს, გამოვარჩევდი „ინოვაციური განათლების ცენტრსაც“ − მონტესორის საბავშვო ბაღს, რომელიც ლერი მილდიანთან ერთად დავაფუძნე. საბავშვო ბაღში დიდი ყურადღებაა გამახვილებული განათლებისა და ინოვაციების ერთმანეთთან ინტეგრირებაზე. ჩემთვის ეს საკითხი ძალზე მნიშვნელოვანია, ვინაიდან მიმაჩნია, რომ ქვეყნის განვითარების დონე განისაზღვრება მისივე მოსახლეობის განათლების ხარისხით. რაც შეეხება მონტესორის საბავშვო ბაღს, აქ ბავშვებისთვის მოწყობილია უნიკალური გარემო, რათა შეძლონ განვითარების საფეხურების სწრაფად გავლა, რომელიც პატარებს დაეხმარება დამოუკიდებლობის ხარისხის გაზრდაში.
სკოლამდელი ასაკის ადამიანისთვის ბაღი უმნიშვნელოვანესია, რადგან სწორედ მაშინ მისი ტვინი ყველაზე აქტიურად ვითარდება. მაგალითად, გავრცელებულია შეხედულება, რომ აბსოლუტური მუსიკალური სმენა თანდაყოლილი ნიჭია, რადგან მისი გამომუშავება შეუძლებელია ზრდასრულ ასაკში. თუმცა ჩინეთში ჩატარებული კვლევების მიხედვით დადგინდა, რომ ის აუცილებლად შეძენილია და სკოლამდელ ასაკში ყალიბდება. სწორედ ამიტომ, მნიშვნელოვანია გავიაზროთ სკოლამდელი ასაკის პრიორიტეტულობა და ბავშვებს მივცეთ მაქსიმალური განვითარების საშუალება, რადგან არავინ იცის, რის მიმართ გამოუვლინდება ნიჭი პატარა ადამიანს, თუ მას ამის შესაძლებლობას მივცემთ.
მარია მონტესორი ნამდვილად დიდი ინოვატორია. ჯერ კიდევ მე-19 საუკუნის ბოლოს, მან შექმნა დიდაქტიკური მასალა, რომელიც დღესაც საერთაშორისო მასშტაბით საუკეთესოდ მიიჩნევა. ის ბავშვებს აძლევს საშუალებას სწრაფად განავითარონ ისეთი უნარები, როგორებიცაა: მოტორიკა, კოორდინაცია, ანალიზი, მეტყველება, წერა, რაც საერთო ჯამში, მას კრეატიულსა და დამოუკიდებელს გახდის.
