კაროლინ ბესეტ-კენედი მოდის ისტორიაში სამუდამოდ შევიდა, როგორც გასული საუკუნის 90-იანი წლების მინიმალიზმის დედოფალი. მიუხედავად იმისა, რომ კაროლინის ცხოვრება ხანმოკლე იყო, ის დღემდე უამრავი დიზაინერის შთაგონების წყაროა. იგი ყველაზე უკეთ გადმოსცემდა 1990-იანი წლების სულისკვეთებას და მისი სადა, უბრალო სამოსი ყოველთვის განსაკუთრებული ელეგანტურობით გამოირჩეოდა.
ქერათმიანი ლამაზმანი Calvin Klein-ის პუბლიცისტისა და ამერიკელი იურისტის, ჟურნალის გამომცემლისა და ჟურნალისტ ჯონ.ფ.კენედი უმცროსის მეუღლე გახლდათ. ჯონ კენედი უმცროსი იყო აშშ-ის ყოფილ პრეზიდენტ ჯონ კენედისა და გენიალურ ჟაკლინ კენედი ონასისის ვაჟი. დახვეწილი გემოვნებისა და საოცარი შარმის გამო, კაროლინს ხშირად ამსგავსებდნენ დედამთილს. ტრაგიკული ბედის გამო კი მას განუმეორებელ პრინცესა დაიანასთანაც აიგივებენ ხოლმე. ფაქტია, იგი ბევრისთვის სტილის ხატი და ეპოქის სახე გახდა.
კაროლინს არ უყვარდა აქცენტის გამახვილება ძვირადღირებულ ბრენდებზე. მის ჩაცმულობებზე ვერ შენიშნავდით დიდი ზომის ლოგოებსა და თვალშისაცემ დეტალებს. იშვიათად ნახავდით ბრჭყვიალა ან ძალიან ფერად სამოსში. მისი განუყრელი მეგობარი ჯინსის შარვალი იყო, რომელსაც იდეალურად უხამებდა თეთრ პერანგს. კაროლინის საყვარელი ფერები შავი და კრემისფერი გახლდათ. წვეულებებზე უმეტესწილად სწორედ შავ, სადა კაბებს ირგებდა ხოლმე. ოვალური სათვალეებისა და ბირკინის ტყავის ჩანთის გარეშე კი, თითქმის არსად დადიოდა. სამოსის მსგავსად, მაკიაჟსაც ბუნებრივს ანიჭებდა უპირატესობას. წითელი პომადა იყო ის ერთადერთი რამ, რითაც წვეულებისთვის თავს ილამაზებდა. მოდის სფეროს განსაკუთრებული ყურადღება კაროლინმა საკუთარი ქორწილის შემდეგ დაიმსახურა. მან სრულიად შეცვალა გოგონების წარმოდგენა პატარძლის ჩაცმულობაზე. ლამაზმანმა ნარცისო როდრიგესის ძალიან სადა კაბა, ყოველგვარი სამკაულისა და პომპეზური ვარცხნილობის გარეშე მოირგო, მისი მინიმალიზმი და სისადავე კი შეუდარებელი იყო. ამ დღიდან იგი პაპარაცების მუდმივი სამიზნე გახდა, რასთან შეგუებაც სიცოცხლის ბოლომდე უჭირდა. კაროლინ ბესეტ-კენედიმ შეძლო იმის დამტკიცება, რომ მდიდრული კაბებისა და ბრილიანტების ქონა უფრო მიმზიდველსა და სექსუალურს არ გაგხდის. თეთრი მაისური, ნაცვამი ჯინსი და ნამდვილი ღიმილი კი ყველაფერია, რათა სამყარომ შეგიყვაროს. თამამად შეიძლება ითქვას, რომ იგი საკუთარი ეპოქის ინტელექტუალური გარდერობის ოქროს სტანდარტია: არაფერი ბრწყინვალე, არაფერი აშკარა, არაფერი ძალიან ბევრი.
სამწუხაროდ, ეს განსაკუთრებული გოგონა 1999 წელს ავიაკატასტროფაში მეუღლესთან და დასთან ერთად დაიღუპა. იგი სულ რაღაც 33 წლის იყო, თუმცა მაინც მოახერხა მოდის კერპი გამხდარიყო და მისი სახელი მოდის სფეროში სამუდამოდ დამკვიდრებულიყო.
