რუბრიკა OK! მენეჯერის სტუმარი კომპანია DRESSCODE-ის დამფუძნებელი პროფესიით ხელოვანი – ხათუნა დოჭვირია.
თვალებს აქეთ-იქით აცეცებს, ცოტას ნერვიულობს, თუმცა ბედნიერების ღიმილი მაინც დასთამაშებს სახეზე, გასახდელ ოთახში შედის და ირგებს კაბას, რომელზეც მთელი ცხოვრებაა ოცნებობს. შემდეგ საქორწილო კაბით მთავარ სივრცეში გამოდის, სადაც მისი საყვარელი ადამიანები ელოდებიან. არა, ეს კადრი რომანტიკული ფილმიდან არ არის, ჩვენი რესპონდენტი ამ სცენას თითქმის ყოველკვირა ხედავს და იმ პასუხისმგებლობას, რაც საქორწილო კაბის შექმნას თან ახლავს, წლებია უკვე კარგად იაზრებს. ჟურნალი OK! კიდევ ერთხელ გიამბობთ კომპანია DRESSCODE-ს შესახებ, რომელიც უკვე მეათე წელია ბაზარზე წარმატებით ოპერირებს და მომხმარებელს საქორწილო კაბების მრავალფეროვან არჩევანს სთავაზობს.
DRESSCODE-ს შექმნის ისტორია…
ხათუნა დოჭვირი: DRESSCODE შევქმენი მაშინ, როდესაც საქორწილო კაბის, განსხვავებული ქორწილის გადახდის კულტურა ყალიბდებოდა და წყვილების მხრიდან ხარისხის მოთხოვნა იზრდებოდა. ჩემი სურვილი და ბაზარზე არსებული მაშინდელი მოთხოვნები გადაიკვეთა. თავდაპირველად, ძალიან პატარა ფართი გვქონდა, სულ სამი თანამშრომელი ვიყავით. ჩემი მიზანი იყო, მომხმარებლისთვის ხარისხიანი პროდუქტი შემეთავაზებინა. 2017 წელს მოულოდნელად ლოკაციის ცვლილებამ მოგვიწია, ჩემი გუნდის დახმარებით ოპერატიულად მოვახერხეთ ახალ ფილიალში გადასვლა, რომელიც უკვე ორ სართულს აერთიანებს. პირველი სართული 6 ოთახისგან შედგება და ამითი უფრო დიდი კომფორტი შევუქმენით ჩვენს მომხმარებლებს.
როგორ ფიქრობთ, რა გამოარჩევს „დრესკოდს“ ბაზარზე?
ხარისხი! ეს ყოველივე კი ჩემი გუნდის დამსახურებაა. ხშირად ხდება, როცა პატარძალმა არ იცის რა სურს, ან მის სხეულს რომელი კაბა მიესადაგება, ამიტომ ჩვენი პროფესიონალი კადრებით დაკომპლექტებული გუნდი ზრუნავს იმაზე, რომ ყველა პატარძალმა თავისი გემოვნებისა და სტილის შესაბამისი კაბა შეარჩიოს. კაბის შერჩევის ცერემონიალი კი ზუსტად ისეთია, როგორც ფილმებში. პატარძლის თანმხლები პირები მთავარ დარბაზში ელოდებიან მას, რომელიც გასახდელი ოთახიდან პირდაპირ მთავარ სივრცეში გამოდის – პოდიუმზე, დიდი სარკის წინ ახდენს კაბის დემონსტრირებას. როდესაც ვხედავ პატარძლის ბედნიერ და კმაყოფილ სახეს, ეს არის ჩემთვის უდიდესი მოტივაცია. ამასთანავე, ეს უდიდესი პასუხისმგებლობაა. საქორწილო კაბა უნდა იყოს უნაკლო, უმაღლეს დონეზე შესრულებული და ზუსტად ისეთი, როგორიც მომხმარებელს სურს. აქ შეცდომების დაშვების უფლება არ გვაქვს.
აღსანიშნავია ისიც, რომ ჩვენ მომხმარებლები საზღვრებს გარეთაც გვყავს, რადგან აქტიურად ვთანამშრომლობთ უცხო ქვეყნის ბრენდებთან, რომლებიც ხშირად გვიწვევენ სხვადასხვა გამოფენასა თუ ღონისძიებებზე. „დრესკოდი“ სულ ცდილობს, ახალი ტრენდები გაითვალისწინოს.
რა არის საჭირო საკუთარი საქმის დასაწყებად?
ყველაზე მთავარია გიყვარდეთ ის, რასაც აკეთებთ. მნიშვნელოვანია, რომ წინასწარ კარგად განსაზღვროთ რისკები. ამ ათი წლის განმავლობაში ძალიან ბევრი მარცხი განვიცადე, მაგრამ არასოდეს დავნებებულვარ და არ მიფიქრია, რომ ფარ-ხმალი დამეყარა. ყველაფრის მიუხედავად, ჯიუტად ვაგრძელებდი ჩემი მიზნისკენ სწრაფვას და სწორედ ეს გახდა ჩემი წარმატების საწინდარიც.
სამომავლო გეგმები
ჩვენი ამჟამინდელი გეგმები საკმაოდ დიდი და მასშტაბურია. ახლო მომავალში კი ვაპირებთ მეორე ფილიალის გახსნას დასავლეთ საქართველოს რეგიონში.
