რუბრიკა OK! მენეჯერის კიდევ ერთი გამორჩეული სტუმარი ანა თურმანიძეა, რომელიც უკვე 10 წელია ტურიზმის სფეროში, სასტუმროების მიმართულებით მუშაობს. მიაჩნია, რომ უწყვეტი, მიზნობრივი შრომა, დროის მენეჯმენტი და შეუპოვროპა, თითოეულ ადამიანს აძლევს ძალას არ გააჩეროს დაბრკოლებებმა და მიუხედავად დაღმავლობებისა, რომელიც გარდაუვალია, შეძლოს მიზნამდე მისვლა. მაშ ასე, გთავაზობთ ინტერვიუს, რომელიც უკეთ გაგაცნობთ ჩვენი რუბრიკის სტუმარს.
ანა, უპირველესად გაგვეცანით და გვიამბეთ თქვენი საქმიანობის შესახებ.
მოგესალმებით, მე გახლავართ ანა თურმანიძე, სასტუმრო „New Wave”-ის საოპერაციო მენეჯერი. სასტუმრო სფერო, გახლავთ მიმართულება, რომელიც უდიდესი კომფორტია ჩემთვის, პიროვნული თვისებებიდან გამომდინარე. სტუმრები, პარტნიორები, სასტუმროს შიდა მმართველობა, ტურიზმის სფეროს ტენდენციებისა და სიახლეების ეპიცენტრში ყოფნა არის ჩემი ცხოვრების და საქმიანობის განუყოფელი ნაწილი.
ყოველდღიურობა საკმაოდ აქტიური და საპასუხისმგებლოა. მიწევს განსხვავებული ტიპის საკითხებზე სწრაფი რეაგირება და გადაწყვეტილების მიღება, რომელიც სტუმრის, კომპანიისა და თანამშრომლის ინტერესების მაქსიმალურ გათვალისწინებას მოითხოვს. სფერო იმდენად მგრძნობიარეა, რომ მუდმივად მიწევს ცვლილებების პულსზე გულისყურით დაკვირვება. ჩვენი სტუმრების არეალი წლიდან წლამდე ფართოვდება და უფრო მეტი ქვეყნის ბაზარს ვემსახურებით, რაც დიდი შრომისა და ერთიანი მიდგომის დამსახურებაა.
ჩემთვის ფრიად საინტერესოა პარტნიორული მიდგომის სპეციფიკა ევროპისა თუ აზიის ბაზრებისთვის. სტუმართა ინტერესებისა და სურვილების გათვალისწინებით ვზრუნავთ კმაყოფილებისა და მომსახურების ხარისხის მაქსიმალური ნიშნულის მისაღწევად.
სამიზნე აუდიტორიები განსხვავდება პროდუქტის მიხედვით და შესაბამისად გუნდში დელეგირებული ფუნქციები გვეხმარება ერთიანი შედეგის მიღწევაში.
თქვენი გამოცდილების შესახებაც რომ გვიამბოთ, ის რაც აქამდე გაიარეთ.
10 წლის განმავლობაში ტურიზმის მიმართულებით ვმუშაობ, ძირითადად სასტუმრო სფეროში. ჩემი კარიერის თითოეულ ეტაპზე იყო მნიშვნელოვანი გამოწვევები, პროექტები და გეგმები, რამაც გამზარდა და დიდი გამოცდილება შემძინა. ყველა სფეროს აქვს სპეციფიური და დარგობრივი განმასხვავებლები, რაც მეტად საინტერესოს ხდის თითოეულ მათგანს.
რას ურჩევდით ადამიანებს, რომლებიც ახლა იწყებენ გარკვეული კარიერული ნაბიჯების გადადგმას?
ჩემი ათწლიანი გამოცდილება მაძლევს იმის საშუალებას, რომ ხაზი გავუსვა რამდენიმე აუცილებელ პიროვნულ თვისებას: ეს გახლავთ უწყვეტი, მიზნობრივი შრომა, დროის მენეჯმენტი და შეუპოვროპა, რომელიც მოგცემთ ძალას არ გაგაჩეროთ დაბრკოლებებმა და მიუხედავად დაღმავლობებისა, რომელიც გარდაუვალია, შეძლოთ მიზნამდე მისვლა.
როგორ ფიქრობთ, რა არის ის მთავარი, რაც პირადად თქვენ კარიერულ წინსვლაში გეხმარებათ?
სწორედ ზემოხსენებული თვისებები გახლავთ, რაც შინაგან ძლიერებასა და პროფესიულ სიმტკიცეს მაძლევს, მათ შორის გახლავთ ინდუსტრიის თავისებურებებიდან გამომდინარე შეთვისებული მმართველობითი უნარები, საკითხების სიღრმისეული ცოდნა და გამოწვევების მიმართ ინტერესი, რომელიც ყოველი დღის პროგრესულ ცვლილებას გულისხმობს. ამასთანავე, როცა გუნდური შრომის ფასეულობა ხელმძღვანელი რგოლის წარმომადგენელს კარგად ესმის, იწყება სხვადასხვა მიმართულების კადრების პროფესიულ განვითარებაზე ზრუნვა, სატრენინგო ლექცია-სემინარების გზით კადრების ზრდა და ჯანსაღი ურთიერთანამშრომლობის ერთგულება.
როგორია თქვენი სამომავლო გეგმები?
სამომავლო გეგმებს რაც შეეხება, მიზნად ვისახავთ ახალი ბაზრების ათვისებასა და არსებულისთვის უკეთესი სერვისის შეთავაზებას. მმართველობით ნაწილში ინოვაციური მიდგომებისა და ეფექტური სისტემის შემოღებას, რომელიც საოპერაციო მოქნილობას მეტად კომფორტულს გახდის როგორც თანამშრომლისთვის, ასევე სტუმრისთვის. მასშტაბების გაზრდა გახლავთ მთავარი ნიშნული, რომლისთვისაც თითოეული დეპარტამენტის, თითოეული თანამშრომელი თავდაუზოგავად იბრძვის და ეს მაძლევს პროგრესის იმედს, რომელიც სასტუმრო „New Wave”-ს აქცევს ერთ-ერთ წამყვან ადგილად სტუმართმასპინძლობის სფეროში.
