თეატრის, კინოსა და მოდის მხატვარ სიმონ მაჩაბელთან უკვე არაერთხელ გვისაუბრია სხვადასხვა საინტერესო თემის შესახებ. ამჯერად კი ჩვენი მთავარი თემა Health and Beauty Book-ია, რომელიც ჩვენს რესპონდენტებს კიდევ უფრო სხვა კუთხით გვაცნობს. რა არის მისთვის სილამაზე, არსებობს თუ არა კონკრეტული კრიტერიუმები, რომლებიც სილამაზეს განსაზღვრავს, და კიდევ სხვა საინტერესო კითხვებზე პასუხებს სიმონთან ინტერვიუში წაიკითხავთ.
სიმონიკო, რა არის თქვენთვის სილამაზე? როგორ ფიქრობთ, არსებობს თუ არა კონკრეტული კრიტერიუმები, რომლებიც სილამაზეს განსაზღვრავს?
სილამაზე სიცოცხლის არსია. სილამაზეა სამყარო შენში და შენ ირგვლივ. სილამაზეს სიყვარული განსაზღვრავს.
თქვენი თავის მოვლის რუტინა გაგვიზიარეთ. გაქვთ თუ არა კონკრეტული მეთოდები, რომლებსაც ხშირად მიმართავთ?
არავითარი მეთოდები არ მაქვს. მით უმეტეს, რაიმე გამოცდილება, რომელსაც ამ კუთხით გაგიზიარებთ.
ვინ არის თქვენთვის სტილისა და სილამაზის სიმბოლო?
ასე, ცალკე აღებული პერსონაჟები ახლა არ მახსენდება. უფრო საინტერესო ჩემთვის ის თანამედროვე ადამიანები არიან, რომლებიც რაღაცნაირად, ამ მომენტში დამკვიდრებული სტილისა და გემოვნების ზღვარზე დადიან. სწორედ ისინი იქცევიან ხოლმე სიმბოლოებად და ცვლიან სტილს.
თქვენს საქმიანობაზე გვესაუბრეთ. ბოლო დროს რით ხართ დაკავებული?
უკვე წლებია ისე აეწყო, რომ შეიძლება რომელიღაც დადგმისათვის ვაკეთებდე კოსტიუმებს ან დეკორაციას. ამავე დროს, კინოსცენარზე ვმუშაობდე და ინტერიერს ვაფორმებდე. თუ პაუზა გამომიჩნდა, მუდამ ვცდილობ ხატვით შევავსო.
საიდან მოდის ინსპირაცია?
„ინსპირაცია“ რაღაც არ არის მშობლიური სიტყვა ჩემთვის და ის უკავშირდება ზედაპირულ დამოკიდებულებას ხელოვნებისადმი. ინსპირაცია ქართულ სინამდვილეში თითქოს ნიშნავს მოვლენებს, ნამუშევრებს და იდეებს, რომლებიც შენს კონკრეტულ ნამუშევარს ან „პროექტს“ განაპირობებს. ამ გაგებით, მე ყველგან ვცდილობ ვიპოვო რაღაც, რაც აირეკლება ჩემს ნამუშევარში.
