ჯანსაღი კვება და ფიზიკური აქტივობა ადრეული ასაკიდან ჩემი ცხოვრების განუყოფელი ნაწილი იყო. დედაჩემი ყოველთვის ცდილობდა ჯანსაღი ცხოვრების წესის მნიშვნელობა აეხსნა ჩემთვის და შეეყვარებინა ისეთი პროდუქტები, რომლებიც განსაკუთრებით ბავშვობაში ყველასთვის უგემურია.
გარდატეხის ასაკში, მოულოდნელად, ჯანმრთელობა მკვეთრად გამიუარესდა. ხანგრძლივი კვლევების შემდეგ, დამიდგინდა ერთ-ერთი ავტოიმუნური დაავადება. მკურნალობის პროცესი საკმაოდ მძიმე გამოდგა, რადგან ძლიერი მედიკამენტები დამინიშნეს.
ბაკალავრიატზე, შოტლანდიაში, St Andrews‑ის უნივერსიტეტში, გამოცდები ჩავაბარე ეკონომიკისა და ფილოსოფიის ფაკულტეტზე. სწავლის პერიოდში, გამიმძაფრდა მედიკამენტებისგან გამოწვეული გვერდითი მოვლენები. დედაჩემმა დაიწყო მკურნალობის ალტერნატიული გზების აქტიური ძიება, რის მიმართაც მე ცოტა სკეპტიკური დამოკიდებულება მქონდა. გარკვეული პერიოდის შემდეგ, აღმოვაჩინეთ მეცნიერული კვლევებით გამყარებული ექსპერიმენტული დიეტა. შერჩეული დიეტის ფილოსოფია საკმაოდ მარტივად ჟღერდა: იმუნური სისტემის უჯრედების 70% ჩვენი კუჭ-ნაწლავის სისტემაშია. შესაბამისად, საკვებს, რომელსაც ჩვენ მივირთმევთ, ძალიან დიდი გავლენა აქვს ჩვენსავე ჯანმრთელობაზე. ასევე, ადამიანს შესაძლოა ჰქონდეს კონკრეტული საკვების აუტანლობა, რამაც სავარაუდოდ ორგანიზმში ანთებითი პროცესი გამოიწვიოს.
კვებაში ცვლილებების შეტანამ საგრძნობლად გამიუმჯობესა ყოველდღიური ცხოვრება, მაგრამ გარკვეულ ეტაპზე მივხვდი, რომ მხოლოდ დიეტით ვერ მივაღწევდი დასახულ მიზანს. ფიზიკური აქტივობა, საკმარისი რაოდენობის ძილი, ბუნებაში გატარებული დრო, სტრესის დაბალი დონე − ამ ყველაფრის დახმარებით მოვახერხე ჩემი ჯანმრთელობის გაუმჯობესება.
დატვირთული გრაფიკის მიუხედავად, ვახერხებდი დრო დამეთმო ამ აქტივობებისთვის. შედეგად, ენერგიის დონეც მომემატა და გავხდი უფრო პროდუქტიული.
გაოცებული ვიყავი სწორად შერჩეული საკვების დადებითი ეფექტით საკუთარ თავზე, რამაც მიბიძგა უფრო სიღრმისეულად მესწავლა ამ მიმართულებით. ძალიან დიდი სურვილი გამიჩნდა დავხმარებოდი ადამიანებს, რომლებსაც ჯანმრთელობის სხვადასხვა პრობლემა აწუხებდათ, თუმცა წარმოდგენაც კი არ ჰქონდათ, რომ სწორი კვება შეიძლებოდა ყოფილიყო გამოჯანმრთელების ეფექტური გზა.
ეკონომიკისა და ფილოსოფიის სწავლის პარალელურად, წავედი Cambridge-ის საზაფხულო სკოლაში, ნუტრიციოლოგიის საწყის კურსზე. ბაკალავრის დასრულების შემდეგ გადავწყვიტე გადამედგა საკმაოდ შრომატევადი ნაბიჯი და გამოცდები ჩამებარებინა ION ლონდონის უნივერსიტეტში, ნუტრიციოლოგიის 4-წლიან ფაკულტეტზე.
საქართველოში დავინახე ჯანსაღი საკვები პროდუქციის და ზოგადად, ჯანსაღი ცხოვრების წესის მნიშვნელობის ცნობიერების ნაკლებობა. „ლუმბას“ დაარსების მთავარი მიზეზი და მიზანი სწორედ ამ პრობლემების აღმოფხვრა იყო.
ფოტო: ანა მაისურაძე
