„სილამაზის სალონ NM-ში შემოსული თითოეული ადამიანი აქედან კმაყოფილი უნდა გავიდეს, ეს არის ჩვენი მთავარი მიზანი“
მიაჩნია, რომ თუ ბავშვობის მისწრაფებებს ფეხდაფეხ გაჰყვები, აუცილებლად დადგება შენს ცხოვრებაში მომენტი, როცა ოცნებას ფრთებს შეასხამ, როცა იამაყებ საკუთარი მიღწევებით. ამბობს, რომ პატარაობიდანვე იყო გატაცებული სილამაზის სფეროთი, მაშინ როცა მისი თანატოლები ბურთის სათამაშოდ ეზოში გადიოდნენ, თავად თოჯინებით თამაშობდა და მოსწონდა მათთვის განსხვავებული თმის ვარცხნილობის გაკეთება. ოცნება აიხდინა და დღეს სილამაზის სალონის NM-ის მფლობელია, რომელიც ქობულეთში მდებარეობს და ორიენტირებულია მომხმარებლებს შეუქმნას სრული კომფორტი, შესთავაზოს მრავალფეროვანი სერვისი და ფეხი აუწყოს აღნიშნულ სფეროში არსებულ ტენდენციებს. როგორი იყო გზის დასაწყისი, რატომ უნდა გავაკეთოთ არჩევანი სალონ NM-ზე და როგორია წარმატების მისეული ფორმულა – გაიცანით სილამაზის სალონ NM-ის მფლობელი მარინა ანტონოსიანი OK! ბათუმის ფურცლებიდან.
გზის დასაწყისი…
16 წლისამ უკვე ექსპერიმენტების ჩატარება საკუთარ მეზობლებსა და ახლობლებზე დავიწყე. დღეს რომ ვფიქრობ, ამ ადამიანებს ნამდვილად დიდი მადლობა უნდა გადავუხადო, რადგან მათ განსაკუთრებული როლი ითამაშეს ჩემს პროფესიონალად ჩამოყალიბებაში.
რა არის თქვენი მთავარი მოტივატორი, რომელიც მოდუნების საშუალებას არ გაძლევთ?
ჩემთვის მთავარი ჩემი სალონის მომხმარებლები და ის ადამიანები არიან, ვინც ჩემს გუნდშია. ყოველი ახალი ფერის შექმნა, კმაყოფილი მომხმარებლის გაბრწყინებული თვალების დანახვა უდიდესი მოტივაციაა. ვერ მოვდუნდები, რადგან პასუხისმგებლობა მაქვს იმ ადამიანების მიმართ, ვისთან ერთადაც მიწევს მთელი დღის გატარება.
რა გამოარჩევს NM-ს სხვა სალონებისგან?
ამ კითხვაზე ერთი პასუხით ვერ შემოვიფარგლები. როგორც იცით სალონი NM არის ქობულეთში, სადაც სხვა დიდ ქალაქებთან შედარებით განსაკუთრებით უნდა მოერგო სეგმენტს და მათ მოთხოვნებს. სიამაყით შემიძლია ვთქვა, რომ ჩვენს სალონში მუშაობენ მხოლოდ პროფესიონალები და ეს ერთადერთი სილამაზის სალონია ქობულეთში, რომელშიც ჩვენს მომხმარებელს ყველა მომსახურების ერთ სივრცეში მიღება შეუძლია.
რა სერვისს სთავაზობთ მომხმარებელს?
ჩამონათვალი საკმაოდ მოცულობითია, რადგან როგორც უკვე აღვნიშნე, თითქმის ყველა სერვისი შეგვიძლია შევთავაზოთ მომხმარებელს, რასაც დიდ ქალაქებში არიან შეჩვეული, თან ძალიან მაღალ დონეზე.
თმის მოვლა (შეჭრა, შეღებვა, ვარცხნილობა…)
მანიკიური/პედიკიური
მასაჟი
ვიზაჟისტის მომსახურება
კოსმეტოლოგია და ა.შ.
მთავარი მიზეზი, სტანდარტი, რომელიც განსაკუთრებულ სანდოობას სძენს თქვენს სალონს…
მთავარი მიზეზი ჩვენი დამოკიდებულება და ის განწყობაა, რომლითაც ვხვდებით ჩვენს მომხმარებლებს, ყოველთვის ვცდილობთ დავადგინოთ მათი სურვილები და მოლოდინები. ჩვენს სალონში შემოსული ყველა ადამიანი აქედან კმაყოფილი უნდა გავიდეს, ეს არის ჩვენი მთავარი მიზანი.
იყო ძლიერი და წარმატებული ქალი ნიშნავს…
ამაყი ვარ იმით, რომ ამდენს მივაღწიე. დღეს უკვე შემიძლია ვთქვა, რომ ის ოცნება ამიხდა, რომელიც მქონდა. მაქვს სილამაზის სალონი, რომელსაც ჩემს პარტნიორთან ერთად ვმართავ. იყო ძლიერი ქალი, ნიშნავს დაისახო მიზანი და შეასრულო!
როგორია თანამედროვე ტენდენციები აღნიშნულ სფეროში და რამდენად ახერხებთ ფეხი აუწყოთ მათ?
ტენდენციები და მიდგომები ყველაფერში იცვლება, მათ შორის ამ სფეროშიც. აღსანიშნავი და საამაყოა ისიც, რომ ჩვენი პროფესიონალი გუნდის დამსახურებით ყოველთვის ფეხდაფეხ მივყვებით ახალ ტენდენციებს.
წარმატების თქვენეული ფორმულა…
წარმატება მოდის მაშინ, როცა გულით აკეთებ იმას, რაც გიყვარს… არ ვიცი სად ვიქნებოდი დღეს, რომ არა სილამაზის სფერო და ჩემს საყვარელ მომხმარებლებზე ზრუნვა.
ჟურნალისტი: ნანა აბულაძე,
ფოტოგრაფი: გიორგი კალანდაძე
