Variety-ის ცნობით, ამერიკელმა მსახიობმა მაკოლეი კალკინმა, რომელიც მაყურებელმა საკულტო ფილმში „მარტო სახლში“ შესრულებული როლით გაიცნო, განაცხადა, რომ შეთავაზების შემთხვევაში, მზადაა კევინ მაკალისტერის როლს დაუბრუნდეს, რომელმაც ცნობილი გახადა.
კალკინის სცენარში ქურდებს ზრდასრული კევინი ჩაანაცვლებს, რომელიც მარტოხელა მამაა, შვილთან პრობლემები აქვს და ახალი წლის წინა დღეს სახლში დაბრუნებას ცდილობს.
„მე ვითამაშებდი დაქვრივებულ ან განქორწინებულ კევინს, რომელიც შვილს მარტო ზრდის. ჩემი პერსონაჟი ბევრს მუშაობს და შვილს სათანადო ყურადღებას ვერ აქცევს, ამიტომ ის ბრაზდება, სახლში იკეტება და ყველგან ხაფანგებს აგებს, რომ მამა სახლში არ შეუშვას. კევინი ერთგვარად ქურდებს როლს უცვლის“ – განაცხადა 45 წლის მსახიობმა.
შეგახსენებთ, რომ „მარტო სახლში“-ს ორმა ფილმმა მაკოლეი კალკინი 1990-იანი წლების ერთ-ერთ ყველაზე ცნობად ვარსკვლავად აქცია. პირველმა ფილმმა 476 მილიონი დოლარი გამოიმუშავა, რითიც 1990 წლის მეორე ყველაზე შემოსავლიანი ფილმი გახდა. 1992 წელს ეკრანებზე „მარტო სახლში 2 – ნიუ-იორკში დაკარგული “ გამოვიდა.
არც კოლუმბუსს და არც კალკინს მონაწილეობა არ მიუღიათ „მარტო სახლში 3“-ის და „მარტო სახლში 4“ -ის გადაღებებში, რომლებიც ეკრანებზე 1977 წელს და 2002 წელს გამოვიდა.
პირველი ორი ფილმის რეჟისორმა, კრის კოლუმბუსმა „მარტო სახლშის“ ნებისმიერი რიმეიქი გამორიცხა. მას მიაჩნია, რომ 35 წლის წინანდელის გამეორება შეუძლებელია, ამიტომ ჯობია ყველაფერი ისე დატოვონ, როგორცაა.
ჯერჯერობით უცნობია შესთავაზა თუ არა კალკინმა თავისი იდეა 20th Century Studios-ს, რომელიც ფილმზე უფლებებს ფლობს. სავსებით შესაძლებელია, რომ კომპანია უკვე დაუკავშირდა კალკინს შესაძლო გაგრძელების სიუჟეტის განსახილველად.
ასევე დაგაინტერესებთ
#OK! კევინის მარტოობა დასრულდა – მაკოლეი კალკინი პირველად გახდა მამა
