მთიანი აჭარა განსაკუთრებულად ხიბლავს ვიზიტორებს. უნიკალური ლანდშაფტი, უამრავი ტონალობის მწვანე მცენარე, მკაცრი მთისა და მოალერსე ზღვის ჰაერი ერთად. წარმოგიდგენთ ახალ ადგილს, რომელიც სულ მალე მიიღებს სტუმრებს.
„კვირიკეს გორაკები“ − ეს არის სასტუმრო კომპლექსი, რომელიც „თაუერ გრუპის“ ერთ-ერთი პროექტი და „შატო კვირიკეს“ გაგრძელებაა. კომპლექსი მდებარეობს ზღვის დონიდან 1050 მეტრზე, კვირიკეს მთაზე, სოფელ კვირიკეში. პირველი ლოკაცია „შატო კვირიკედან“ 12 კილომეტრის დაშორებით. 1050 მეტრის სიმაღლეზე განლაგებულია თანამედროვედ აღჭურვილი, უახლესი სტანდარტის შესაბამისი 20 კოტეჯი. კოტეჯები განლაგებულია შუა ტყეში. თითოეულ კოტეჯს აქვს პანორამული ხედი, რომელიც იშლება დასავლეთ საქართველოსკენ: ბათუმი, შავი ზღვა, პალიასტომი.
კომპლექსის უპირატესობა ის გახლავთ, რომ მომხმარებელს 15-20 წუთში შეუძლია აღმოჩნდეს 1050 მეტრის სიმაღლეზე, იშვიათ რეკრეაციულ გარემოში, სადაც განლაგებულია უძველესი ნარგავები − 300-400-წლიანი ხეები და მათ შორის არის რამდენიმე 1000-წლიანი ურთხელი, რაც იშვიათი ჯიშის ხეა და საქართველოში რამდენიმეა. კომპლექსი მოიცავს რესტორანს, რომელიც მოემსახურება როგორც სასტუმროს მცხოვრებლებს, ისე სხვა სტუმრებსაც.
კომპლექსის მდებარეობიდან გამომდინარე, იგი ხელსაყრელია დასასვენებლად ზამთრის პერიოდშიც, რადგან აქ მუდმივად თოვლია, და იგეგმება, რომ იგი იქცეს როგორც საზაფხულო, ისე ზამთრის კურორტად.
კომპლექსში მიმდინარეობს სარემონტო სამუშაოები. კომპლექსის გაშვებას „თაუერ გრუპი“ სექტემბრიდან გეგმავს.
