გაყიდვები, გავლენა და წარმატება… ქანი ვესტი ყველანაირ მოთხოვნას აკმაყოფილებს, რაც მას საუკუნის ერთ-ერთ ყველაზე გამორჩეულ არტისტად აქცევს. არ აქვს მნიშვნელობა ხართ თუ არა მისი თაყვანისმცემელი, დეკადის ერთ-ერთი ყველაზე ექსცენტრიული ალბომის ყურადღების გარეშე დატოვება ნამდვილად გაგიჭირდებათ.
მრავალფეროვანი კოლაბორაციებით, სტილის შეგრძნებითა და ურიცხვი ემოციებით სავსე პროექტის ერთ-ერთი ყველაზე ცხადი მოტივი მწუხარებაა. ქანიეს დედის, დონდა ვესტისადმი მიძღვნილი ალბომი მისი გარდაცვალების მიერ გამოწვეულ ტკივილს, ცხოვრებისეულ სირთულეებს, ქორწინებას, სასიყვარულო ურთიერთობებსა და პირად პრობლემებს ეხმიანება.
ამერიკელი ვარსკვლავის უკვე არაერთი მსოფლიო რეკოდსმენი პროექტი ერთ-ერთი ყველაზე პერსონალური და ამბიციური ალბომია, რაც კი რეპერს აქამდე შეუქმნია.
Donda-ში შესული 27-ივე სიმღერა ისევე როგორც მის დაუცველობას, პარალელურად მის სიძლიერეს გამოხატავს. კოლაბორატორი მუსიკოსების ინდივიდუალური სტილი კი ქანიეს არტისტულობის გენიალური პრეზენტაციაა.
იქიდან გამომდინარე, რომ Donda მეინსტრიმული რეპ მუსიკისგან რადიკალურად განსხვავდება, ბუნებრივია, ის ყველანაირი აუდიტორიისთვის არაა.
როგორც იტყვიან, სიმღერები ყურისთვის, და არა თვალისთვის იქმნება… ერთი შეხედვით, ალბომის მინიმალისტური გარეკანი არაფერზე მეტყველებს, ისევე როგორც Youtube-ის ოფიციალურ გვერდზე გამოქვეყნებული სიმღერები, რომლებიც სრულიად შავი ფონის საშუალებით მსმენელს შესაძლებლობას აძლევენ, მუსიკალური ხარისხით ტკბობა გარემოშემშლელი ფაქტორების გარეშე მიიღონ.
როგორც უკვე აღვნიშნეთ, ქანიეს ახალ, რიგით 10-ე სტუდიურ ალბომში, ისევე როგორც „ბალენსიაგას ბიბლიურ წყალდიდობაში”, შავი ფერი დომინირებდა. ალბათ, არ გაგიკვირდებათ, თუ რატომ აირჩია ახალი ალბომის პრეზენტაციისთვის ამერიკელმა რეპერმა სწორედ დემნა გვასალია.
შავი ფერი ავანტგარდული სტილის, ინდივიდუალურობისა და მინიმალისტურობის გამომხატველია, თუმცა, დასავლურ კულტურაში ის მწუხარებასთან, გლოვასთან და სინანულთან ასოცირდება. ამიტომაცაა, რომ ალბომში ამ ფერის დომინირებას კრიტიკოსების ერთმანეთისგან რადიკალურად განსხვავებული შეფასებები მოჰყვა.
საიდუმლოებებით მოცული იყო ისევე როგორც ალბომის დიზაინი, ასევე მისი პრეზენტაცია, ამიტომ თავისუფლად შეიძლება ითქვას, რომ ვესტისა და გვასალიას კოლაბორაცია ეგზომ წარმატებული აღმოჩნდა…
ფოტოზე: ქანიე ვესტი და დემნა გვასალია
Donda-სთვის შექმნილი თითოეული Listening Party მოიცავდა ბიბლიურ თემებს, რომლებიც გაფორმებული იყო გალობის მსგავსი მუსიკალური ხმოვანი ეფექტებით. ერთ-ერთ პრეზენტაციაზე მაყურებელმა ქანიე ვესტთან ერთად მისი შვილების დედა კიმ კარდაშიანი იხილა, რომელიც სცენაზე საპატარძლო კაბით გამოჩნდა, “ბალენსიაგას“ უახლესი Haute Couture კოლექციიდან.
როგორც ჩანს, ქანიე არ ხუმრობდა, როდესაც 2016 წელს Twitter-ზე დაწერა, რომ დემნას “ბალენსიაგადან” მოპარვას აპირებდა.
და მაინც, რა საერთო შეიძლება ჰქონდეთ ქართველ დიზაინერსა და ამერიკელ რეპერს გარდა იმისა, რომ ორივე არტისტი სპეციალიზირებულია ისეთი პროდუქციის შექმნაში, რომელსაც სილამაზის პოვნა “სიბნელეშიც” კი შეუძლია.
ფრანგული მოდის სახლის კრეატიული დირექტორის ინტერესმა ხელოვნური ინტელექტისა და შავი ფერის სამოსის მიმართ, ქანიე ვესტი განვლილი წლების მანძილზე არაერთხელ მოხიბლა, განსაკუთრებით მაშინ, როდესაც წყლით დატბორილ ამფითეატრში, „ბალენსიაგას“ 2020 წლის შემოდგომა/ზამთრის კოლექცია უზარმაზარი LED ეკრანების ფონზე იხილა.
დემნა გვასალია არის დიზაინერი, რომელიც გამოსახულების ძალას დიდი მასშტაბით იყენებს, ქანიე ვესტი კი, ქართველი შემოქმედის მსგავსად გრანდიოზული ვიზუალური ეფექტების მიმართ დიდი სიყვარულით გამოირჩევა, რაც მას ყველაზე “პერსონალური ფსიქოდრამების” ხელოვნების ნიმუშად ქცევაში ეხმარება.
მსგავსი ესთეტიკური და რევოლუციური ხედვის გარდა, ქანიე და დემნა თანამშრომლობისთვისაც ერთმანეთის მსგავსი იდეების მქონე პროფესიონალებს ირჩევენ. ალბათ, ბევრი ადამიანისთვის დღემდე უცნობია ის ფაქტი, რომ “ბალენსიაგას” 2020 წლის “აპოკალიფსური” შოუსა და Donda-ს პრეზენტაციის გრაფიკული დიზაინი ერთმა სამხატვრო ხელმძღვანელმა შექმნა.
მიუხედავად იმისა, რომ დემნასა და ქანიეს სამომავლო გეგმები ფართო მასებისთვის ჯერჯერობით უცნობია, პუბლიკა მათ შემდგომ კოლაბორაციას უკვე მოუთმენლად ელოდება.
