სამედიცინო სფეროში ესთეტიკური ქირურგია ერთი შეხედვით ძალიან მოთხოვნადი, მაგრამ ამავდროულად საპასუხისმგებლო პროფესიაა, რომელიც პირდაპირ კავშირშია ადამიანის ტრანსფორმაციასთან. ჩვენმა რესპონდენტმა, ქრისტი ჩალაძემ, შეუპოვრობითა და დიდი მონდომების წყალობით მიზანი რეალობად აქცია და წარმატებული ექიმი გახდა, რომელიც მუდმივად ორიენტირებულია პრაქტიკული უნარების განვითარებაზე. მისი ინდივიდუალური მიდგომები პაციენტებთან და მუშაობის დროს ინოვაციური მანიპულაციების გამოყენება ხაზს უსვამს კვალიფიციური, პროფესიული უნარ-ჩვევებით აღჭურვილი სპეციალისტის სახელს, რომელიც წლებთან ერთად უფრო და უფრო მოთხოვნადი ხდება. ჟურნალი OK! გთავაზობთ ინტერვიუს პლასტიკურ ქირურგთან, ქრისტი ჩალაძესთან, რომელმაც მკითხველს დაგროვილი გამოცდილება გაუზიარა და სამომავლო გეგმები გაანდო.
თავდაპირველად როდის და რატომ დაინტერესდით ესთეტიკური მედიცინით?
ზოგადად, შემოქმედი ადამიანი ვარ, ბავშვობიდან დაინტერესებული ვიყავი ხატვით, რამაც ხელი შეუწყო ჩემი სპეციფიკური გემოვნების ჩამოყალიბებას. უშუალოდ ესთეტიკური მედიცინით რეზიდენტურის პერიოდში დავინტერესდი, ამ დროს აქტიურად ვმუშაობდი ცხვირის პლასტიკაზე და ამ ყოველივემ განაპირობა ჩემი დიდი ინტერესი ესთეტიკური მედიცინის მიმართ. ამ სფეროში უკვე 12 წელია ვმოღვაწეობ, დამოუკიდებელ სამედიცინო საქმიანობას კი 8 წელია ვეწევი.
გვიამბეთ განვლილ გზაზე, რომელიც წარმატების მიღწევაში დაგეხმარათ.
განვლილი გზა საკმაოდ მტკივნეული და რთული იყო. ბევრი უძილო ღამე, კოლოსალური შრომა. ამავდროულად, ეს ყველაფერი სასიამოვნოც იყო, რადგან ეს გახლდათ გზა, რომელსაც მივყავდი ჩემი ოცნების ასრულებისკენ. ვამაყობდი იმით, რომ ჩართული ვიყავი აქტიურ სამედიცინო საქმიანობაში. ჩემ ირგვლივ იყო უამრავი პაციენტი, ვიღებდი დიდ ცოდნასა და გამოცდილებას. სწორედ ამ დაგროვილმა გამოცდილებამ მასწავლა სწორი მენეჯმენტი, პაციენტებთან პროფესიონალური ურთიერთობის ჩამოყალიბება, მათი მართვა და პასუხისმგებლობის მაღალი გრძნობა. ამასთანავე, მეტი პროფესიონალიზმი და თავდაჯერებულობა შემძინა.
როგორია პაციენტებთან მიდგომის თქვენეული პრინციპები და როგორ ინარჩუნებთ მათ ნდობას?
პაციენტებთან ურთიერთობაში ვარ ძალიან უშუალო და მეგობრული. ყოველთვის ვცდილობ დავაკმაყოფილო მათი თხოვნა და შესაბამისი სამედიცინო დახმარება გავუწიო. ეს ფაქტორები მეხმარება მათი ნდობის შენარჩუნებაში.
რა სირთულეებსა და გამოწვევებთანაა დაკავშირებული თქვენი პროფესია?
ამ პროფესიაში ყოფნა გამუდმებით მოითხოვს მოწოდების სიმაღლეზე დგომას, მუდმივ განვითარებას, უახლესი ტენდენციების ცოდნასა და დიდ ფსიქოლოგიურ გამძლეობას.
გვესაუბრეთ იმ განსაკუთრებულ და ინოვაციურ მეთოდებზე, რომლებსაც იყენებთ მუშაობის პროცესში.
საზოგადოებას ვთავაზობ ყველა იმ ინოვაციურ ტექნიკას, რაც დღესდღეობით თანამედროვე პლასტიკურ ქირურგიაში არსებობს. ეს არის ნაკლებტრავმული მიდგომები. მიყვარს უცხოელი კოლეგების გამოცდილების გაზიარება, საკუთარი ტექნიკის შექმნა, ამ ყველაფრის გაერთიანება და ჩემს პრაქტიკაში დანერგვა.
იყო პლასტიკური ქირურგი, ნიშნავს…
გქონდეს პასუხისმგებლობის მაღალი გრძნობა, მყარი ფსიქოლოგიური და ფიზიკური გამძლეობა. ქირურგობა მოითხოვს მუდმივ კონტაქტს პაციენტებთან. ასევე ყურადღებას, მიზანდასახულობასა და შრომისმოყვარეობას.
როგორია თქვენი სამომავლო გეგმები?
სამომავლო გეგმები დიდია. ვგეგმავ ჩავაბარო დოქტორანტურაზე, მიზანია აკადემიური ხარისხის ამაღლება. ასევე მაქვს დიდი სურვილი, მყავდეს სტუდენტები, რათა ჩემი ცოდნა და გამოცდილება მომავალ თაობას გავუზიარო.
ტექსტი: მაკუნა შავგულიძე
ფოტო: ალექსეი სეროვი
