პანდემიის დროს მოწოდებამ – ,,დარჩით სახლში’’ ბევრი მოყვარული კულინარი გამოავლინა. კულინარია ტრენდული ჰობი გახდა და ამას სოციალურმა ქსელებმაც შეუწყო ხელი. ინსტაგრამზე თუ Facebook-ზე არაერთი კულინარიული ბლოგი და ჯგუფი შეიქმნა, თითქოს ესე უფრო მარტივი გახდა საკუთარი შესაძლებლობების დემონსტრირება და კულინარიული შედევრების ერთმანეთთან გაზიარება. OK! გაგაცნობთ რამდენიმე კულინარიულ ბლოგს და მის შემქნელებს.
პირველ რიგში გაგვეცანით…. როდის დაინტერესდით კულინარიით?
„მე ვარ თეკლა მიქაბერიძე, 23 წლის. დავამთავრე „ჯიპას“ სოციალურ მეცნიერებათა ფაკულტეტი. ბავშვობიდან მე და ბებო ვამზადებდით ერთად სხვადასხვა კერძს, რაც დიდ სიამოვნებას მანიჭებდა. პანდემიის დროს, როცა ყველაფერი ჩაიკეტა, სპონტანურად გადავწყვიტე გამეკეთებინა კულინარიული ბლოგი, გასართობად, შემდეგ კი ეს ყველაფერი გადაიზარდა ჩემს ყოველდღიურ საქმიანობად. დროთა განმავლობაში მიზანი გამოიკვეთა − ყველა ადამიანს შეეძლოს გემრიელი კერძების მომზადება, განურჩევლად პროფესიისა. ცხადია, ყველას პირველსავე ჯერზე არ გამოგვივა, მაგრამ მიმაჩნია, რომ „შეცდომები მოსულა“ და სულაც არ არის სავალდებულო გქონდეს კულინარიული განათლება, რათა შექმნა ახალი და საინტერესო გემოები. თავიდანვე მინდოდა ხალხისთვის გამეცნო მსოფლიო კულინარია, რაც საკმაოდ რთული მისაღები აღმოჩნდა საზოგადოებისთვის, მაგრამ ყველაფრის მიუხედავად დღეს ვცდილობ ჯერ ინფორმაცია მივაწოდო ამა თუ იმ ინგრედიენტზე და შემდეგ განვათავსო რეცეპტი“.
თქვენი ბლოგი საინტერესოა არა მხოლოდ კულინარიული რეცეპტებით, არამედ სასარგებლო რჩევებითაც. რომელი უფრო აინტერესებს თქვენს გამომწერებს?
რჩევებს უფრო დიდი გამოხმაურება აქვს, რადგან საინტერესო, საჭირო და ინფორმაციულია. მომწონს სპონტანურობა და ყოველდღე ახალ-ახალ იდეებს ვტესტავ. IF არ არის მხოლოდ რეცეპტების გვერდი, ბევრ ახალ პროექტს ვგეგმავ და ერთ-ერთი პროდუქტიც მალე ჩაეშვება გაყიდვაში − IF-ის ორგანული სანელებლები, რომელიც ვფიქრობ, ძალიან წარმატებული იქნება.
რა არის კულინარია თქვენთვის?
ჩემთვის კულინარია არ მოიცავს მხოლოდ კერძებს. ეს არის ახალი გემოების აღმოჩენა და ერთგვარი რიტუალი: სხვადასხვა ადგილას წასვლა, განსხვავებული კერძების დაგემოვნება, ესთეტიკა და შემდეგ ამ ყველაფრის საზოგადოებამდე მიტანა.
https://www.facebook.com/if.foodblog
https://www.instagram.com/if.ge_/