ამბიცია, სიხარბე, ღალატი და მკვლელობა…
რიდლი სკოტის ყველაზე გახმაურებული კრიმინალური დრამა “გუჩის” დიდგვაროვანი ოჯახის ტრაგიკული ისტორიის შესახებ მოგვითხრობს… კლანის, რომელიც ამავე სახელწოდების მაღალი მოდის იტალიური ლეიბლის უკან დგას.
ფილმის სიუჟეტი 1978 წლის მილანში იწყება და 1990-იანი წლების შუა ხანებში სრულდება.
ინგლისელმა რეჟისორმა იტალიური ეპოქის სილამაზის სიღმისეულად აღსაქმელად სიუჟეტისადმი შესანიშნავად შერჩეული პოპ კულტურის გემოვნებიანი მიქსტურა შემოგვთავაზა.
House Of Gucci პატრიცია რეჯიანის ერთი ჩვეულებრივი სამუშაო დღით იწყება, რასაც მისი და მაურიციო გუჩის პირველი შეხვედრა მოყვება.
დიდგვაროვანი ოჯახის წევრის გაცნობით მოხიბლული პატრიცია გადაწყვეტს აწ უკვე საყვარელი მამაკაცის გული მოიგოს და გავლენიან პიროვნებაზე დაქორწინებით ცხოვრება კიდევ უფრო გაიმარტივოს.
უამრავი დაბრკოლების, წინააღმდეგობისა და უთანხმოების შემდეგ წყვილი ოჯახის შექმნას გადაწყვეტს.
“გუჩის” ოჯახი პატრიციას დახმარებით ცდილობს ბრენდის “სახელი და დიდება” დაუბრუნოს, თუმცა ახლობლებთან გამოწვეული მწვავე დაპირისპირების გამო მათი ურთიერთობა ჰარმონიულად ვეღარ გრძელდება და საბოლოოდ, განქორწინებით სრულდება.
ფილმის ყველაზე მძიმე მომენტი, რა თქმა უნდა, მაურიციო გუჩის მკვლელობაა, რომელიც 1995 წლის მარტში მისივე მეუღლის, პატირია რეჯიანის დავალებით მოხდა.
“გუჩის” ოჯახის საიდუმლოებებით მოცული ცხოვრების შესახებ საინტერესო დეტალების აღმოსაჩენად წინ სამი საათი გელოდებათ, თუმცა ჰოლივუდის საკულტო მსახიობების გენიალური შესრულების ფონზე დამერწმუნეთ, რომ 157 წუთი არაფრად მოგეჩვენებათ.
House Of Gucci-ის ქართული პრემიერა 2 დეკემბერს კავეა გალერეაში გაიმართა.
ფოტო: @Cavea Cinemas
პრემიერაზე მისულ მაყურებელს კინოთეატრში “გუჩის” სამოსითა და აქსესუარებით შექმნილი გალერეა დახვდა, რომელიც Phubber-მა სპეციალურად კინოპრემიერისთვის მოაწყო.
საღამოს მუსიკალურად რადიო NRJ Georgia აფორმებდა, სადაც ბაბი კირკიტაძემ ფილმის ოფიციალური საუნდტრეკები შეასრულა.
Key Communications-ისა და Travelfy-ის ინიციატივით კინოთეატრის დარბაზში მაყურებელს სკამქვეშ არაერთი მოულოდნელი საჩუქარი დახვდა, რომელშიც ერთ-ერთმა იღბლიანმა სტუმარმა მილანის საგზურიც კი აღმოაჩინა.
მრვალწლიანი კვლევის, მუშაობისა და მიღებული გამოცდილების შემდეგ თავისუფლად შეიძლება ითქვას, რომ ინგლისელმა ფილმისთვის საუკეთესო ქასთი შეარჩია და წლის ერთ-ერთი ყველაზე გახმაურებული კრიმინალური დრამა შექმნა, რომლის საშუალებითაც მაყურებელს “გუჩის” საგვარეულოს ბევრისთვის აქამდე უცნობი დეტალი გაანდო.
