28 ოქტომბერს მაიკლ დუგლასი ნიუ-იორკში, PAC NYC Icons of Culture გალას დაესწრო. ორი ოსკარისა და სამი ოქროს გლობუსის მფლობელ მსახიობს ღონისძიებაზე ქალიშვილი, კერისი ახლდა, რომელიც ამჟამად დედასთან, კეტრინ ზეტა-ჯონსთან ერთად ცხოვრობს. 22 წლის მსახიობს შავი, მბზინავი კაბა და შავი, დაბალქუსლიანი ფეხსაცმელი ეცვა.
გოგონამ ცოტა ხნის წინ ბრაუნის უნივერსიტეტი კინოსა და საერთაშორისო ურთიერთობების სპეციალობით დაამთავრა. კერისი შემოქმედებითი კარიერის განვითარებას გეგმავს.
„მე თეატრალურ გარემოში გავიზარდე, ამიტომ ასეთ საგანმანათლებლო, შემოქმედებით სივრცეში ბედნიერი ვარ. იმედი მაქვს, რომ ასე გაგრძელდება“ – აღნიშნა გოგონამ People-თან ინტერვიუში.
კერისის გარდა, 81 წლის დუგლასს და 56 წლის ზეტა-ჯონსს 25 წლის ვაჟი, დილანი ჰყავთ. მაიკლ დუგლასი ასევე 46 წლის კემერონის მამაა, რომელიც დიანდრა ლუკერთან პირველი ქორწინებიდან დაიბადა.
უმცროსი დის მსგავსად, კემერონმაც სამსახიობო დინასტიის გაგრძელება გადაწყვიტა. 2003 წელს მან მამასთან და ბაბუასთან, კირკ დუგლასთან ერთად დრამაში „ოჯახური ღირებულებები“ ითამაშა, შემდგომში კი კიდევ რამდენიმე პროექტში გამოჩნდა, თუმცა, 2009 წელს შემოქმედებითი გეგმების შეცვლა მოუწია – ის დიდი რაოდენობით ნარკოტიკების კონტრაბანდაში მონაწილეობისთვის დააკავეს და ხუთი წლით თავისუფლების აღკვეთა მიუსაჯეს.
ქეთრინი, მაიკლი, კემერონი და კერი
ციხეში ყოფნის დროს, ცნობილი მამის მემკვიდრემ რეაბილიტაციის კურსი გაიარა და მემუარების წიგნი – „გრძელი გზა სახლისკენ“ დაწერა, რომელშიც თავის ისტორია გულწრფელად მოყვა.
„მე მისით ძალიან ვამაყობ, არა მხოლოდ წიგნის გამო, არამედ იმიტომაც, რომ საკუთარი ცხოვრების მართვა შეძლო“ – თქვა მოგვიანებით მაიკლ დუგლასმა შვილის აღიარებისა და გამოჯანმრთელების შესახებ.
კამერონმა ნარკოდამოკიდებულებისგან თავის დაღწევა შეძლო და 2016 წელს, ციხიდან გამოსვლის შემდეგ, მონაწილეობა მიიღო ისეთ ფილმებში, როგორიცაა „გაქცეული“ (2021), „მეთვალყურეობის ქვეშ“ (2022), „ხალხმრავალი ოთახი“ (2023) და „მილიონერის თევზაობა“ (2025).
კემერონ დუგლასი მამასთან და ბაბუასთან ერთად
მაიკლ დუგლასის მეორე ვაჟმა, დილანმა ბრაუნის უნივერსიტეტი დაამთავრა, სადაც პოლიტიკურ მეცნიერებებს სწავლობდა, თუმცა ცოტა ხნის წინ გადაწყვიტა, მშობლების კვალს გაჰყოლოდა და მსახიობობა ეცადა. 2025 წელს მან პირველი მთავარი როლი მიიღო ფსიქოლოგიურ თრილერში „მე შენთვის მოვდივარ“.
ასევე დაგაინტერესებთ
#OK! “უბერებელი სიყვარული” – კეტრინ-ზეტა ჯონსის და მაიკლ დუგლასის გამოჩენა შვილთან ერთად
