ცინო ნაცვლიშვილი, ინჟინერ-ტექნოლოგი
ცინო, როგორია თქვენი თავის მოვლის ყოველდღიური რუტინა?
ყოველთვის დიდ ყურადღებას ვაქცევდი ჩემი ჩაცმის სტილსა და თავის მოვლას. მსურდა, მუდმივად სასურველი გარეგნობა მქონოდა, ამიტომ აქტიურად მივყვებოდი მოდის ტენდენციებს. ხშირად ვყიდულობდი ცნობილი ბრენდების სამოსს.
რაც შეეხება უშუალოდ თავის მოვლას, ყოველთვის დიდ ყურადღებას ვაქცევდი ჯანსაღ კვებას, რათა შემენარჩუნებინა გარეგნული და შინაგანი ჯანმრთელობა.
არასოდეს ვყოფილვარ კოსმეტოლოგებისა და სტილისტების ხშირი მომხმარებელი, თავად ვირჩევდი თუნდაც ვარცხნილობას. ასევე, დამოუკიდებლად ვუვლიდი საკუთარ სახის კანს.
თავის მოვლის თქვენეული მეთოდი ხომ არ გაქვთ?
დიახ, ნატურალური ყურძნის არყით ვასველებ ხოლმე ბამბას და შემდეგ ვიწმენდ სახეს. ამ რუტინის შემდეგ კი ვიტენიანებ დამატენიანებელი კრემით. ბებიაჩემისგან მახსოვს ეს რეცეპტი და ჩემს შემთხვევაში ძალიან კარგ შედეგს იძლევა.
როგორია თქვენი ჩაცმის სტილი?
გამოვარჩევდი კლასიკურ სტილს, თანამედროვეობასთან თანხვედრაში. რაც შეეხება ბრენდს, Escada მიყვარდა ყველაზე მეტად. ასევე მომწონს Calvin Klein-ი და Valentino. მთლიანობაში, მაინც ყველაფერს ვიცვამ, რაც მომწონს. მთავარია, თავი კომფორტულად ვიგრძნო. ხშირად ჩემეული დეტალებიც შემაქვს სამოსში.
ჩემ გარშემო ერთ-ერთი პირველი ვიყავი, ვინც შარვალი ჩაიცვა. თანაც ისეთი პროფესია მაქვს, შარვალში უფრო კომფორტულად ვიგრძენი თავი.
თქვენს საქმიანობაზეც გვიამბეთ.
პროფესიით ვარ ინჟინერ-ტექნოლოგი, გაერომ მაღიარა ექსპერტად. გარკვეული წლების განმავლობაში ვმუშაობდი განათლების ხარისხის ცენტრში, ასევე ექსპერტად. ვარ წიგნის ავტორი, რომელიც შეეხება ხილ-ბოსტნეულის გადამუშავების ტექნოლოგიას. ამ წიგნს სწავლობენ პროფესიულ და უმაღლეს სასწავლებლებში ტექნოლოგიურ ფაკულტეტზე. ამჟამად ვმუშაობ ჩემს მეორე წიგნზე, რომელიც იქნება კიდევ უფრო ვრცელი და სრულყოფილი ამ მიმართულებით. ძალიან მახარებს ფაქტი, რომ მაქვს საშუალება მომავალ თაობას დავუტოვო და გავუზიარო ის გამოცდილება და ცოდნა, რომელიც მთელი ამ წლების განმავლობაში დავაგროვე.
საწარმოში ვაკეთებთ მრავალი სახეობის საწებლებს, ჯემებს, მურაბებს. ვიყენებთ მხოლოდ და მხოლოდ საუკეთესო ხილ-ბოსტნეულს ფერმერებისგან, ვუზიარებთ ერთმანეთს ჩვენს ცოდნასა და გამოცდილებას − როგორც ძველს, ასევე თანამედროვე ინოვაციებს.
რას ეტყოდით საზოგადოებას?
მოგეხსენებათ, რომ გარემო-ფაქტორები მოქმედებს ჩვენს ჯანმრთელობაზე. ძალიან მაწუხებს არასათანადოდ მოვლილი გარემო, რომელზეც ზრუნვა თითოეული ჩვენგანის ვალია. შეძლებისდაგვარად მეტი დრო დავუთმოთ ბუნებაზე ზრუნვას. მომავალი თაობებისთვის ეს სასიცოცხლოდ მნიშვნელოვანია.
რას ურჩევდით ახალ თაობას?
ახალ თაობას ვურჩევდი, მეტი დრო დაუთმონ განათლებას, იკვებონ ჯანსაღად და სწორად. ჯანსაღი კვება − ჯანსაღი თაობა. უფრო მეტად უყვარდეთ ჩვენი სილამაზით გამორჩეული სამშობლო, ჩვენი დედაბუნება!
