4 ივლისს დევიდ და ვიქტორია ბექჰემები ქორწინების 24 წლისთავს აღნიშნავენ. დევიდ და ვიქტორია ვარსკვლავურ წყვილთა იმ კატეგორიას მიეკუთვნებიან, რომელთა ურთიერთობამ ორ დეკადაზე მეტხანს გასტანა.
ალბათ გაგიკვირდებათ, მაგრამ ბექჰემების სიყვარულის ლეგენდარული ისტორია საქართველოში დაიწყო. თბილისის ერთ-ერთ სასტუმროში მყოფმა დევიდმა ამჟამინდელი მეუღლე ტელევიზორში გასულ მუსიკალურ კლიპში დაინახა და მისიც გაცნობაც სწორედ მაშინ განიზრახა.
1997 წლის საქველმოქმედო მატჩზე საბედისწერო შეხვედრის შემდეგ, Manchester United-ის იმდროინდელი ფეხბურთელი და Spice Girl-ის წევრი მსოფლიოს უცხოური გამოცემებისა და ტაბლოიდების ყურადღების ცენტრში გამუდმებით ხვდებოდნენ.
„პირველი სამი თვის განმავლობაში ყველაფერი შესანიშნავად გახლდათ, რადგან არავისთვის იყო ცნობილი, რომ ერთად ვიყავით. სწორედ ამიტომ, ძალიან გვიყვარდა საწყისი პერიოდი, რადგან ყველასგან უჩუმრად შეგვეძლო სიარული, მაქსიმალურად ვცდილობდით დრო ერთად გაგვეტარებინა. ჩვენი პირველი კოცნა რესტორნის ავტოსადგომზე იყო, ეს ჩვენი ცხოვრების გამორჩეული პერიოდი გახლდათ“, − განაცხადა დევიდ ბექჰემმა.
1997 წლის 4 მარტს წყვილმა საზოგადოებას პირველი შვილის დაბადება ამცნო. მათ ვაჟიშვილს ბრუკლინი დაარქვეს, რადგან სწორედ ნიუ-იორკის დასახლებაში ყოფნის დროს შეიტყვეს, რომ პირველ შვილს ელოდებოდნენ. „იყო დაქორწინებული ამდენი ხნის განმავლობაში, ძალიან დიდ შრომას მოითხოვს, რადგან ქორწინება ხშირად წლების გასვლის შემდეგ უფრო და უფრო რთულდება“, − განაცხადა დევიდმა ავსტრალიის სატელევიზიო შოუ The Sunday Project-ში საუბრისას. 1998 წლის იანვარში ყოფილმა ფეხბურთელმა ვიქტორიას ხელი სთხოვა, წყვილი კი 1999 წლის 4 ივლისს ირლანდიაში, Luttrellstown Castle-ში დაქორწინდა.
ქორწინების შემდეგ მათ მიერ შექმნილი Posh And Becks-ის ბრენდი ხშირად ხდებოდა წყვილის უსაფუძვლო კრიტიკის მიზეზი. საზოგადოების ნაწილი ფიქრობდა, რომ ბექჰემების იდეალური ოჯახი მოჩვენებითი იყო და მხოლოდ ბრენდის პიარსა და პოპულარიზაციაზე გახლდათ გათვლილი. რამდენად მართებული იყო პუბლიკის კრიტიკა უცნობია, თუმცა ფაქტია, რომ ვიქტორიასა და დევიდის ლეგენდარული ოჯახი წელს უკვე ქორწინების 21 წლისთავს აღნიშნავს.
ვიქტორიას განცხადებით, ცხოვრებაში ყველაზე მნიშვნელოვანი ოჯახური მთლიანობაა: „ჩვენ გაცნობიერებული გვაქვს ის, რომ ერთად უფრო ძლიერები ვიქნებით, ვიდრე ინდივიდუალურად. იქნებ არცერთი არ ვყოფილიყავით დღეს ამ პოზიციაზე, ამდენი წელიწადი ერთად რომ არ გვეცხოვრა? ეს ყველაფერი ოჯახის ერთგულებისა და გაერთიანების დამსახურებაა. საზოგადოება ხშირად ავრცელებდა ჩვენზე ათასგვარ სისულელეს, თუმცა ამ ყველაფერს მაქსიმალურად უგულველვყოფდით და ცხოვრებას ჩვეულ რიტმში, ნორმალური რეჟიმით ვაგრძელებდით“.
2004 წელს ვიქტორია და დევიდი კიდევ ერთხელ გახდნენ მშობლები − მათ მეორე ვაჟიშვილი ლონდონში შეეძინათ. „ყოველთვის ნერვიულობ, როდესაც ბავშვები გყავს, მაგრამ ეს ყველაზე ლამაზი რამაა ამქვეყნად“, − განაცხადა საავადმყოფოდან გამოსულმა ფეხბურთელმა. მოგვიანებით, იმავე წელს, წყვილის ერთი შეხედვით უნაკლო ქორწინებას სენსაციურმა სიახლემ დიდი დარტყმა მიაყენა, როდესაც უცხოურმა გამოცემებმა მოულოდნელად დევიდისა და რებეკა ლუს რომანტიკული ურთიერთობის შესახებ ინფორმაცია გაავრცელეს.
ოჯახის პირადმა ცხოვრებამ საზოგადოებაში იმხელა ინტერესი გამოიწვია, რომ მათი „სასიყვარულო დრამა“ ქვეყანაში პრინცესა დაიანას გარდაცვალების შემდეგ უდიდეს ისტორიად მიიჩნევა. „ტყუილის თქმას არ ვაპირებ, ეს ნამდვილად რთული პერიოდი იყო ჩვენს ცხოვრებაში, არა მარტო ჩემთვის, არამედ მთელი ოჯახისთვის. თუმცა, გარკვეული დროის შემდეგ გავაანალიზე, რომ ხალხის უმეტესობას თავიანთი ღირებულებები აქვთ. ხშირად გიწევს იყო საკმაოდ კონტროლირებადი, რადგან ადამიანებს იმისი სჯერათ, რასაც კითხულობენ. როდესაც ყველაფერი გაყალბებულია, მაშინ ყოველივე ეს მართლაც შემაშფოთებელია… მე და დევიდს დასამტკიცებელი არაფერი გვაქვს, ერთმანეთის მიმართ დიდი სიყვარული უკეთეს პარტნიორებად და მშობლებად ჩამოყალიბებაში გვეხმარება“, − განაცხადა მომხდარიდან გარკვეული პერიოდის შემდეგ მომღერალმა.
2005 წელს დეივიდსა და ვიქტორიას მესამე ვაჟი − კრუზი, ხოლო 2011 წლის 10 ივლისს ბექჰემების კლანის პირველი ქალიშვილი შეეძინათ. „ჰარპერი ყველაზე ლამაზი გოგონაა, ვინც კი ოდესმე მინახავს. ის დროდადრო უფრო მიყვარდება, ბედნიერი ვარ და თავს კურთხეულად ვგრძნობ, რადგან ასეთი შვილები მყავს“, − განაცხადა ოთხი შვილის დედამ.
სპორტულ კარიერაში არსებული 20-წლიანი წარმატებული საქმიანობის შემდეგ, დეივიდ ბექჰემმა 2013 წელს ფეხბურთიდან ოფიციალურად წასვლა გადაწყვიტა. „ვერაფერი ჩაანაცვლებს იმ წლებსა და თამაშებს სრულად, რომლებიც მე ასე ძალიან მიყვარს, თუმცა ვგრძნობ, რომ ახალ თავგადასავალს ვიწყებ. ცხოვრებაში კარიერის გამო ბევრ რამეზე ვთქვი უარი, ახლა კი დროა, ამ ყველაფერს დავუბრუნდე“, − განმარტა წასვლის შემდეგ გაკეთებულ განცხადებაში ყოფილმა ფეხბურთელმა. ეს იყო წელი, როდესაც ბექჰემებმა ლონდონში დაბრუნება გადაწყვიტეს და ქვეყნის დასავლეთ ნაწილში მდიდრული სახლი იყიდეს. ვარსკვლავური წყვილი უკვე დიდი ხანია ღვინის ბიზნესშიცაა ჩართული. 2014 წელს ვიქტორია დიდი ბრიტანეთის ყველაზე წარმატებულ ანტრეპრენერად დასახელდა, დღეს კი ის საერთაშორისო დონეზე აღიარებული მოდის დიზაინერია.
