სურვილი აიხდინა და დღეს საკუთარი საოჯახო ტიპის სასტუმრო აქვს. სურს ბიზნესი გააფართოოს და უკეთ შეძლოს ვიზიტორებისთვის აჭარის რეგიონის, აქაური ადათ-წესების გაცნობა-წარმოჩენა. „OK! ბათუმს“ თავის მიზნებსა და მისწრაფებებზე სასტუმროს, Anna sun-ის მფლობელი, მაკა კახიძე ესაუბრა.
ფლობთ საოჯახო სასტუმროს. როგორ გაჩნდა იდეა და როგორ მოახერხეთ მისი განხორციელება?
მოგეხსენებათ, ქობულეთი ტურისტული ქალაქია, ყველა სეზონზე სტუმრობს ტურისტების გარკვეული ნაკადი, რაც ამა თუ იმ ბიზნესის განვითარებისთვის ხელშემწყობი ფაქტორია. აღნიშნულიდან გამომდინარე, სულ მქონდა საკუთარი სასტუმროს ქონის სურვილი, რაც დამატებით შემოსავალი იქნებოდა ჩემთვის. იდეის განხორციელებაში პროგრამა „აწარმოე საქართველოში“ დამეხმარა. სწორედ მათი საშუალებით გადავდგი პირველი ნაბიჯები აღნიშნულ ბიზნესში და გავხსენი მყუდრო და კომფორტული საოჯახო სასტუმრო Anna sun-ი, რომელიც მუდმივად ზრუნავს ვიზიტორების სასიამოვნო დასვენებაზე.
რა სერვისს სთავაზობთ მომხმარებელს?
პირველ რიგში, თბილ და მყუდრო ატმოსფეროს, ნატურალურ პროდუქციას, საინტერესო ექსკურსიებს და, რაც მთავარია, უსაფრთხო გარემოს. ვარ მეფუტკრე და ჩემთან მოსულ ტურისტებს მეფუტკრეობის შესახებ ვუტარებ მასტერკლასებს. მათ აქვთ შესაძლებლობა, მონაწილეობა მიიღონ თაფლის ამოღების პროცეში, რაც დიდ ინტერეს იწვევს და მათ დასვენებას კიდევ უფრო ეგზოტიკურს ხდის.
როგორ ფიქრობთ, რა ხდის ამა თუ იმ ბიზნესს წარმატებულს?
აჭარა ტურისტულად მზარდი რეგიონია. ყოველწლიურად იზრდება ვიზიტორთა რაოდენობა, რომლებისთვისაც, რა თქმა უნდა, მნიშვნელოვანია დახვდეს გამართული სერვისი, ასევე უზრუნველყო მათი კომფორტული დასვენება. თუ აღნიშნულს მოახერხებ, წარმატებაც არ დააყოვნებს. არსებობს სტანდარტები, რომელსაც უნდა აკმაყოფილებდეს ტურისტული ადგილები, ამისთვის კი ხელშეწყობა ყველაზე მნიშვნელოვანია. აჭარის რეგიონის ზოგადი განვითარებაც კი თითოეული მცირე ბიზნესის პოპულარიზაციას უწყობს ხელს.
მომხმარებლის ნდობა რომ დაიმსახურო…
მომხმარებლის ნდობისთვის აუცილებელია გაამართლო მათი იმედები. მათ სასტუმროში, Anna sun-ი, ნამდვილად ხვდებათ მყუდრო გარემო და ხშირად აღნიშნავენ, რომ თავს ისე გრძნობენ, როგორც საკუთარ სახლში.
როგორია თქვენი სამომავლო გეგმა?
როგორც ზემოთ აღვნიშნე, ვინაიდან აჭარაში მრავლად არიან ტურისტები, რომლებსაც სურთ დაათვალიერონ მაღალმთიანი აჭარა, გაეცნონ იქაურ ტრადიციებს, სამზარეულოს, გამიჩნდა სურვილი, მაღალმთიან აჭარაშიც გავაკეთო მყუდრო, კომფორტული, დასასვენებელი კოტეჯები, სადაც ზაფხულობით ამყავს ფუტკრის ოჯახი. საბოლოოდ, ვაპირებ ჩემი საოჯახო სასტუმრო ეკოტურიზმის მიმართულებით გავაფართოო. წინ არაერთი გეგმა და მიზანი მაქვს, ვფიქრობ, ეტაპობრივად მოვახერხებ მათ განხორციელებას.
