საქართველო უამრავი საინტერესო და ღირსშესანიშნავი ადგილით არის გარემოცული. ქვეყანა გამოირჩევა შესანიშნავი და მდიდარი ბუნებით, აქ თქვენ შეგიძლიათ დაისვენოთ როგორც მთაში, ასევე ზღვაზე, რადგან ჩრდილოეთით კავკასიონის მთებია გადაჭიმული, დასავლეთით კი შავი ზღვა. საქართველოზე საუბრისას, წარმოუდგენელია არ ვახსენოთ ქართული სამზარეულო, ღვინო და კულტურა, რომელიც გულგრილს არცერთ ტურისტს არ ტოვებს. ბევრი რომ არ გავაგრძელო, გთავაზობთ რამდენიმე მიზეზს, თუ რატომ უნდა ვიმოგზაუროთ საქართველოს სხვადასხვა კუთხეში.
ღვინის სამშობლო
საქართველო მსოფლიოში ღვინის უძველესი რეგიონია, სადაც ვაზის ასობით ძირძველი ჯიშია შენარჩუნებული. აქ თქვენ შეხვდებით ღვინის არაერთ სახეობას, მათ შორის: საფერავს, ქინძმარაულს, რქაწითელს, წინანდალს… ქვეყნის უძველესი ტრადიცია, რომელიც ღვინის ქვევრში დაყენებას გულისხმობს, იუნესკოს არამატერიალური კულტურული მემკვიდრეობის ძეგლად არის აღიარებული.
ქართული სტუმართმოყვარეობა და ტრადიციული სუფრა
ქართული სტუმართმოყვარეობა და ტრადიციული სუფრა ყველა იმ ადამიანისთვისაა ცნობილი, ვისაც ერთი სიტყვა მაინც სმენია საქართველოს შესახებ. ეს ტერმინი კავკასიელებისთვის ერთ-ერთი ყველაზე დამახასიათებელი ტრადიციაა, რადგან სტუმარი ღვთის საჩუქრად მიაჩნიათ და ცდილობენ, სტუმრად მოსულ ადამიანს მაქსიმალურად ასიამოვნონ. მასპინძლები ყველაფერს აკეთებენ იმისათვის, რომ ქვეყანა, კუთხე თუ წარმომავლობა, საუკეთესო მიმართულებით წარმოაჩინონ.
კურორტები და გეოგრაფია
საქართველოში წელიწადის ნებისმიერ დროს შეგვიძლია შევარჩიოთ კურორტი დასასვენებლად. ზამთარში თხილამურებით ვისრიალებთ, ზაფხულში კი ზღვაში ვიცურავებთ. წელიწადის ნებისმიერი დრო შეგვიძლია განსაკუთრებული და დაუვიწყარი გავხადოთ ქვეყნის მრავალფეროვანი ბუნებით.
საქართველოს ჩრდილოეთით მდებარეობს მთა ყაზბეგი, რომლის სიმაღლე ზღვის დონიდან 5000 მეტრზე მეტია, ასევე, საქართველოს არაჩვეულებრივი სამხედრო გზა და ზამთრის მხიარული კურორტი გუდაური. ქვეყნის დასავლეთი − შავი ზღვის 308 კმ-იანი სანაპირო, რომელშიც შედის ანაკლიის ქვიშიანი ნაპირი, ურეკის შავი მაგნიტური ქვიშა, აჭარის კენჭებიანი სანაპირო ქობულეთიდან სარფამდე, ბათუმის გავლით… საქართველოს აღმოსავლეთით კი კავკასიონის მთები მოჩანს, სადაც ბორჯომი, იქვე ახლოს კი, ამ ადგილების ყველაზე ძველი სამთო-სათხილამურო კურორტი − ბაკურიანი მდებარეობს.
ხევსურეთსა და თუშეთში უმშვენიერესი შუასაუკუნოვანი სოფლები მდებარეობს. აქ შემორჩენილი მოსახლეობა კვლავ ინარჩუნებს უძველეს ტრადიციებს. აქ უამრავი უძველესი კოშკი და ეკლესიაა.
უძველესი ეკლესიები და კლდეში ნაკვეთი ქალაქები
საქართველოში უამრავი ტაძარია, რომლებიც ქვეყნის ულამაზეს ადგილებში მდებარეობს. მათ შორისაა იუნესკოს მსოფლიო მემკვიდრეობის ძეგლები: სვეტიცხოველი მცხეთაში, ბაგრატის ტაძარი ქუთაისში, გერგეტის სამება ყაზბეგის მუნიციპალიტეტში და კიდევ არაერთი.
გარდა ამისა, საქართველო კლდეში ნაკვეთი ქალაქების სამშობლოა. მათ შორისაა უფლისციხე, რომლის ზედაპირი მთვარის ლანდშაფტს ჰგავს; დავით გარეჯის სამონასტრო უდიდესი კომპლექსი კლდეშია გამოკვეთილი, თვალწარმტაც ვარძიაში კი ერთ დროს 2000 ბერი ცხოვრობდა.
თბილისი
დაბოლოს… რასაკვირველია, ქვეყნის დედაქალაქი – თბილისი, რომელიც დაკიდებული აივნებითა და სპარსული სტილის გოგირდის აბანოებით არის ცნობილი. მისი ეკლექტური არქიტექტურა დღევანდელ თბილისზეც ნათლად აისახება.
იმისათვის, რომ ქალაქი საფუძვლიანად დაათვალიეროთ, აუცილებლად უნდა იაროთ ფეხით, იმიტომ, რომ ნამდვილი თბილისი დეტალებშია. სხვანაირად ვერ მოახერხებთ მის შესწავლასა და სრულყოფილად შეგრძნებას. თბილისში ძალიან ბევრია სანახავი და შეუძლებელია ერთი ვიზიტით ყველაფრის დათვალიერება, მაგრამ თუ ჩვენს რჩევას გაითვალისწინებთ და ქალაქს ფეხით შემოივლით, მაშინ ნამდვილად მოახერხებთ მის შეცნობას სულ მცირედით მაინც.
