„ტოსკანას მზის ქვეშ“ (Under the Tuscan Sun)
წიგნის რედაქტორი, 35 წლის ფრენსისი მძიმე განქორწინების შემდეგ ტოსკანაში გაემგზავრება. ერთ-ერთ სოფელში ის ვილას შეიძენს, სადაც დასახლდება და აღმოაჩენს, რომ ხანდახან ცხოვრება უცნაური ხერხებით აძლევს ყველაფერს, რაც ასე ძალიან სჭირდებოდა. ამ ფილმით ნამდვილად ისიამოვნებთ, რადგან გარდა ძალიან საინტერესო სცენარისა, თქვენ აქ გადაგეშლებათ ტოსკანას ულამაზესი პეიზაჟები. რეგიონი მდიდარია თავისი შესანიშნავი დასასვენებელი ადგილებით, რომლებიც ფილმში საოცრად კარგადაა ასახული და რთულია თვალი მოწყვიტოთ ასეთ არაჩვეულებრივ სანახაობას.
„მხევლის წიგნი“ (The Handmaid’s Tale)
წარმოიდგინეთ სამყარო, სადაც ქალებს ეკრძალებათ მუშაობა, საკუთრების ფლობა, სიყვარული, ოჯახის შექმნა, ქუჩაში სიარული. ეკრძალებათ, გამოიყურებოდნენ ისე, როგორც თავად სურთ, ისაუბრონ და მოიქცნენ ისე, როგორც საჭიროდ მიიჩნევენ… სამყარო, სადაც ქალები კასტებად არიან დაყოფილნი და მხოლოდ მამაკაცების მიერ დადგენილ, მათთვის მკაცრად განსაზღვრულ ფუნქციებს ასრულებენ, ეს ყველაფერი კი ღმერთისა და რელიგიის სახელით ხდება. ეს გახლავთ მარგარეტ ეტვუდის ამავე სახელწოდების დისტოპიური რომანის ეკრანიზაცია. ფილმის შინაარსიდან გამომდინარე შერჩეული მძიმე ინტერიერი და შუქ-ჩრდილი კიდევ უფრო ამძაფრებს შეგრძნებებს.
„დიდებული გეტსბი“ (The Great Gatsby)
ირლანდიური წარმოშობის ფრენსის სკოტ ფიცჯერალდი XX საუკუნის ერთ-ერთ უდიდეს ამერიკელ მწერლად მიიჩნევა. კრიტიკოსთა ნაწილი მის რომანს „დიდი გეტსბი“ ამავე პერიოდის ინგლისურენოვან 100 საუკეთესო წიგნს შორის მეორე ადგილზე აყენებს. ეს არის მამაკაცისა და ქალის დიდი ამბავი, ანუ უჩვეულო სიყვარულის ისტორია. მილიონერი ჯეი გეტსბი წლების განმავლობაში ეძებს დაკარგულ საყვარელ ქალს და სჯერა მისი ერთგულებისა. იპოვის კიდეც, მაგრამ იგი ამ დროს უკვე სხვისი მეუღლეა. ქარაფშუტა ქალი, თუმცა კი შეყვარებული გეტსბისთვის კვლავ ერთადერთი და განუმეორებელია. ჯეი არაფერს იშურებს მისი გულის მოსაგებად… ამ ერთგულებასა და უანგარობას სწორედ საყვარელი ქალის სანაცვლოდ ეწირება − თანაც ისე, რომ ქალის ცრემლსაც ვერ ეღირსება. ასე სრულდება დიდი გეტსბის ტრაგიკული სიყვარული. კაცისა, რომელსაც თან ყველაფერი ჰქონდა და თან − არაფერი! „დიდი გეტსბი“ იმ რომანებს განეკუთვნება, ერთი ამოსუნთქვით რომ იკითხება და ბევრ საფიქრალსაც უჩენს მკითხველს.
