2023 წელი, მოთხოვნილი დიზაინისა და ფერების გათვალისწინებით, საკმაოდ თამამი, ფერადი და ექსტრავაგანტური იყო. გასულ წლებში თუ ძირითად ფერს მწვანე, თეთრი და ვარდისფერი წარმოადგენდა, წელს მოთხოვნადი იყო მკვეთრი ფერები, სიჭრელითა და სიხასხასით დატვირთული დეკორაციები, ასევე მუქი ტონები, როგორიც არის შავი, ლურჯი, იისფერი და ა.შ. თუმცა კლასიკურ მწვანესა და თეთრს აქტუალობა არ დაუკარგავს. ადრე თუ იშვიათობას წარმოადგენდა ფლორისტიკაში ხილის, ბოსტნეულის გამოყენება, წელს, შეიძლება ითქვას, წლის თემატიკაც კი იყო.
ჩატარდა ღონისძიებები, სადაც კომპოზიციები მხოლოდ ბოსტნეულითა და ხილით იყო აწყობილი.
გასულ წლებში ძირითადი ყურადღება ეთმობოდა პრეზიდიუმისა და სტუმრის მაგიდების დიზაინს. წელს თითქმის ყველა ღონისძიებაზე აქტუალურია ჭერის, იატაკის, მაგიდის გადასაფარებლის, ნაჭრის ხელსახოცების, მაგიდის სერვირების, სამადლობელი ბარათებისა და მსგავსი დეტალების დიზაინი.
აქტუალური და მოთხოვნადი გახდა ქორწილებისა და წვეულებების მოწყობა არასარესტორნო ტერიტორიებზეც, ღია სივრცეებში, ლამაზ სასტუმროებსა და შატოებში.
მოგეხსენებათ, რთულია მხოლოდ ორმა ადამიანმა დაგეგმოს მთელი ქორწილი და ეს გეგმა 100%‑იანი გარანტიით და შედეგით შეასრულოს, ამიტომ გააქტიურებულია ორგანიზატორის, როგორც აუცილებელი ფიგურის, ყოლა ქორწილში, მეტად წამოწეულია წამყვანის როლი, რომელიც უძღვება და აწესრიგებს ყველა აქტივობას და სტუმრების განწყობას, ასევე მომატებულია ბენდებისა და სოლო მომღერლების მრავალფეროვნება, რაც რეალურად გარანტიაა იმისა, რომ ქორწილი იყოს მოწესრიგებული, მხიარული და დაუვიწყარი.
ფართო ფანტაზიის შედეგად, 2023-ში საოცრად ლამაზი, განსხვავებული და დახვეწილი ტორტების მომსწრეები გავხდით, რაც არც სოციალურ ქსელს არ გამოჰპარვია და დავტკბით ამ ხელოვნების ნიმუშებით, იყო როგორც გრანდიოზული, ასევე მინიმალისტური, მაგრამ ძალიან ექსტრავაგანტური დიზაინები.
საბოლოო ჯამში, შეიძლება ითქვას, რომ 2023 წელი ფერადი, დახვეწილი და ექსტრავაგანტური ქორწილებისა და წვეულებების წელი იყო.