ხშირად გვსმენია − „ასაკი მხოლოდ ციფრებია“. რა თქმა უნდა, ადამიანი ნებისმიერ ასაკში უნდა ვითარდებოდეს, წინ მიდიოდეს და საკუთარ გამოცდილებას უზიარებდეს მასზე ახალგაზრდებს. არასდროსაა გვიანი, შეიძინო ახალი ცოდნა, დაიწყო ახალი საქმე, მიაღწიო წარმატებას, და ყოველთვის შესაძლებელია საკუთარი თავის რეალიზება. უფროსი ადამიანების ღვაწლი და გამოცდილება, მათი პოტენციალის რეალიზება, ძალიან მნიშვნელოვანია საზოგადოების ჰარმონიული განვითარებისთვისა და ეკონომიკის ხელშეწყობისთვის. უკეთესი საზოგადოების მშენებლობისთვის აუცილებელია ყველა ასაკის ადამიანის სრულფასოვანი თანამშრომლობა და თანამონაწილეობა. 1 ოქტომბერი ხანდაზმულთა საერთაშორისო დღეა. წინამდებარე პროექტი განხორციელდა „გაეროს მოსახლეობის ფონდის“ (UNFPA) საქართველოს ოფისთან თანამშრომლობით და „ლიბერთი ბანკის“ მხარდაჭერით.
ლელა ბაქრაძე, გაეროს მოსახლეობის ფონდის (UNFPA) საქართველოს ოფისის ხელმძღვანელი
უკვე მრავალი წელია, რაც გაეროს მოსახლეობის ფონდი ჯანსაღი და აქტიური დაბერების პოპულარიზაციისთვის მუშაობს არაერთ ქვეყანაში, მათ შორის, საქართველოში. აღსანიშნავია, რომ ჯანსაღი და აქტიური დაბერება, ერთი მხრივ, უნდა გახდეს სოციალური პოლიტიკის, ხოლო მეორე მხრივ – ჩვენი ყოველდღიური ცხოვრების ნაწილი. გასულ წელს ჩვენს პარტნიორებთან ერთად დავიწყეთ 60+ კლუბების პილოტირება ქუთაისსა და რუსთავში. 60+ კლუბები წარმოადგენს სოციალიზაციის, გამოცდილების გაზიარების, ახალი ცოდნისა და უნარ-ჩვევების შეძენის სივრცეს ხანდაზმული მოქალაქეებისთვის. ვიმედოვნებთ, რომ ეს ინიციატივა მალე საქართველოს სხვა ქალაქებშიც გადაინაცვლებს და მნიშვნელოვანი ცვლილებების საფუძველი გახდება ჩვენს საზოგადოებაში.
ნინი ბუკია, „ლიბერთის“ კომუნიკაციებისა და CSR-მენეჯერი
ვამაყობთ გაეროს მოსახლეობის ფონდთან პარტნიორობით, რომელიც კიდევ უფრო ხაზს უსვამს „ლიბერთის“ მიერ აღებულ პასუხისმგებლობას უფროსი თაობის მომხმარებლებზე ზრუნვის მიმართულებით.
განსაკუთრებით დღეს, როცა უფროსი თაობის უსაფრთხოებისთვის, ინფორმაციის გავრცელება და ცნობადობის ამაღლება სასიცოცხლოდ მნიშვნელოვანია. 2018 წლიდან „ლიბერთი“ უწყვეტად ახორციელებს 60+ ადამიანებისთვის სპეციალურ საგანმანათლებლო და შემეცნებით პროგრამებს. დარწმუნებული ვარ, „ლიბერთისა“ და გაეროს მოსახლეობის ფონდის ერთიანი ძალისხმევით, კიდევ უფრო გავზრდით ჯანსაღი დაბერებისა და აქტიური ცხოვრების მნიშვნელოვნებას და ასევე, განვაგრძობთ ჩვენს თანამშრომლობას ქალების გაძლიერებისა და გენდერული თანასწორობის მიმართულებით.
ჟურნალმა OK! გადაწყვიტა, კიდევ ერთხელ შეგახვედროთ იმ ადამიანებს, ვისთვისაც ასაკი დაბრკოლება კი არა, ახალი გამოწვევების მიღებისა და ახალი მიზნების მიღწევის საშუალებაა: თამარ სხირტლაძე, ლამარა აბჟანდაძე, მედეა ლორთქიფანიძე, მერი გელაშვილი, შუშანა ბალაშვილი.
