საბავშვო სამოსის შერჩევა საკმაოდ რთულია − უნდა მოეწონოს მშობელს, ბავშვს და ამავდროულად უნდა იყოს ლამაზი, კომფორტული და ხარისხიანი. სწორედ ამ ყველაფრის ერთობლიობას გთავაზობთ მაღაზიათა ქსელი bebe+. აქ დაგხვდებათ ევროპული ბრენდების დიდი არჩევანი ხელმისაწვდომ ფასად. კომპანიის განვლილ გზაზე და სიახლეზე ჟურნალ OK!-ის „ბებე+“-ის დამფუძნებელი ნანა ჭითავა ესაუბრა.
რა იყო ის მთავარი, რის გამოც bebe+ გახდა ასეთი მოთხოვნადი?
ამ ბიზნესში 2000 წლიდან ვარ, თუმცა პირველი მაღაზია bebe+-ის სახელით 2007 წელს გავხსენით. ჩემი დიდი ხნის ოცნება, მქონოდა საკუთარი ბიზნესი, განხორციელდა. ყველა დეტალი ჩემი მოფიქრებულია − სახელი, ლოგო, მაღაზიის დიზაინი. სახელი მინდოდა მარტივი და დასამახსოვრებელი ყოფილიყო, ბევრი ხმოვნით.
მომხმარებელი თავიდანვე დაინტერესდა ევროპული ბრენდების არჩევანითა და მისაღები ფასებით და ჩვენც დავიწყეთ ბიზნესის გაფართოება. კიდევ ერთი მიზეზი, რის გამო მომხმარებელმა შეგვიყვარა, არის ის, რომ ხშირად ვითვალისწინებთ მათ მოთხოვნებს. თითოეული კომენტარი თუ შეტყობინება ჩვენს ვებგვერდზე, ჩვენს კონსულტანტებთან არის მნიშვნელოვანი და ხდება მათზე მყისიერი რეაგირება. ოთხი შვილის დედა ვარ და რა თქმა უნდა, ჩემი მთავარი ინსპირაცია ყოველი კოლექციის შეთავაზებისას არიან ჩემი შვილები. პროდუქციას მუდამ იმ ფიქრით ვარჩევ, ჩავაცმევდი თუ არა ამას საკუთარ შვილს. ალბათ პირადი და ჩემი გუნდის ასეთი თავდაუზოგავი შრომის შედეგია ჩვენს მაღაზიებში მომხმარებელთა სიმრავლე და მათი კმაყოფილება.
COVID-19-მა მსოფლიო დღის წესრიგი შეცვალა. როგორ მოერგო თქვენი ბრენდი ამ ახალ რეალობას?
პანდემიამდეც სხვადასხვა კრიზისული პერიოდი გავიარე, რამაც გამზარდა და გამაძლიერა. შესაბამისად, პანდემიას შევხედე როგორც ახალ გამოწვევას, და არა როგორც პრობლემას. მყისიერი რეაგირება მოვახდინე – სრულად ონლაინგაყიდვებზე გადავედით; რა თქმა უნდა, მთლიანად მოგვიწია ახალ რეალობაზე გადაწყობა, ლოგისტიკური დაგეგმვა, შინ მიწოდების სისტემის გამართვა, მაგრამ ამ ყველაფერმა შედეგი გამოიღო. ბევრი მომხმარებელი გვიხდიდა მადლობას, ამბობდნენ, რომ ჩაკეტილობისას „ბებე+“-ის პარკების დანახვა მათ სიხალისეს, იმედს უბრუნებდა და რაც მთავარია, შინ მყოფი ბავშვის დაპატარავებული სამოსის პრობლემას უგვარებდა.
ჩვენთვის ცნობილია, რომ ახალი ფილიალი გახსენით…
პანდემიის პერიოდში, „ლოკდაუნის“ მოხსნის შემდეგ, პირველი მაღაზია გავხსენით საზღვარგარეთ, დუბაიში. მაღაზიას „ბებე გალერი“ ეწოდება. შემდეგ უკვე მისი ფილიალი აღმაშენებლის 91 ნომერში გაიხსნა, სადაც ახალ გამოწვევას შევეჭიდეთ, დავამატეთ ქალისა და მამაკაცის კოლექცია. რა თქმა უნდა, არ ვუღალატეთ ჩვენს მთავარ უპირატესობას − ხელმისაწვდომ ფასებს და როგორც ჩვენს ყველა მაღაზიაში, აქაც, მომხმარებელს დახვდება სხვადასხვა ევროპული ბრენდის ხარისხიანი ტანსაცმელი ხელმისაწვდომ ფასად.
„ბებეს“ გუნდი…
ჩემი მთავარი მონაპოვარი ჩემსავე გუნდის ერთგულებაა. „ბებე+“-ის მენეჯერების უმეტესობა კომპანიაში გახსნის დღიდან მუშაობს. მათთან მაქვს მუდმივი კომუნიკაცია, განვიხილავთ ყოველდღიურ პრობლემებს, მომხმარებელთა მოლოდინს, საჭიროებებს და ერთად ვცდილობთ საზოგადოებას შევთავაზოთ არა მხოლოდ ხარისხიანი ტანსაცმელი, არამედ ხარისხიანი მომსახურება. მომხმარებელთა გამოხმაურება და მათი პოზიტიური შეფასებები ჩვენთვის მთავარი სტიმულია და კიდევ უფრო მეტი შრომის, თავდადებისა და განვითარების სურვილს აღგვიძრავს. ვრჩებით ერთგული მთავარი პრინციპისა − მეტი კმაყოფილი მომხმარებელი.
ფოტო: ალექსეი სეროვი