ანჯელინა ჯოლი უახლოეს მომავალში ჰოლივუდის დატოვებას გეგმავს, რათა ბრედ პიტთან სკანდალური განქორწინების შემდეგ, ამერიკის შეერთებული შტატებიდან წავიდეს და „ცხოვრების ახალი ეტაპი დაიწყოს“ -. ამის შესახებ დასავლური ტაბლოიდები წერენ.
Page Six–ის ინფორმაციით, 50 წლის მსახიობი თავისი 25 მილიონ დოლარად შეფასებული მამულს ყიდის, რომელსაც ულამაზესი ბაღები, საცურაო აუზი და სტუდია აქვს და სადაც ექვს შვილთან ერთად 2016 წლიდან ცხოვრობს. გამოცემა წერს, რომ ჯოლიმ უკვე პოტენციური მყიდველებისთვის სახლის ფარულად ჩვენება დაიწყო.
მსახიობთან დაახლოებული წყაროების ცნობით, ჯოლი ახალი ცხოვრების დაწყებისთვის ემზადება, რომელიც აშშ-სთან და ბრედ პიტთან დაკავშირებული არ იქნება.
„იმის გათვალისწინებით, რისი გადატანაც ბრედთან მოუწია, თან ამდენი წლის მანძილზე გამუდმებული ყურადღების ცენტრში ყოფნა ძალიან დამღლელია. ასეთ დროს დასვენების ერთადერთი გზა წასვლაა“, — განუცხადა ჟურნალისტებს მსახიობმა, პროდიუსერმა და ჯოლის ძველმა მეგობარმა ჯეი ბენჯამინმა.
არსებული ინფორმაციით, მსახიობი განიხილავს შესაძლებლობას, მონაცვლეობით გაატაროს დრო კამბოჯაში, საფრანგეთსა და აფრიკის რამდენიმე ქვეყანაში. ვარაუდობენ, რომ მისი მთავარი საცხოვრებელი ადგილი კამბოჯა გახდება – ქვეყანა, სადაც 2002 წელს თავისი უფროსი ვაჟი, მედოქსი, იშვილა.
„ეს ადგილები მისთვის განსაკუთრებულია. იქ ჰყავს ახლო მეგობრები, რომლებსაც სანდო ადამიანებად და ოჯახის წევრებად მიიჩნევს“, — უთხრა წყარომ გამოცემა People-ს.
ჯოლიმ უკვე აღიარა, რომ ძალიან სურს ლოს-ანჯელესის დატოვება, სადაც იგი იძულებული იყო ეცხოვრა მანამ, სანამ მისი ექვსივე შვილი 18 წლის გახდებოდა. მსახიობის უმცროსი შვილები – ტყუპები ვივიენი და ნოქსი სრულწლოვანები 2026 წლის 12 ივლისს გახდებიან, რის შემდეგაც ანჯელინა საბოლოოდ შეძლებს ლოს-ანჯელესის დატოვებას – აღნიშნავენ გამოცემები.
ბრედ პიტმა და ანჯელინა ჯოლიმ ერთმანეთი 2005 წელს, “მისტერ და მისის სმიტების” გადაღებაზე გაიცნეს და 2014 წელს დაქორწინდნენ. ქორწინება 2024 წლის 30 დეკემბერს – რვაწლიანი სასამართლო დავის შემდეგ, ოფიციალურად დასრულდა. მსახიობებს სამი ნაშვილები შვილი ჰყავთ: 24 წლის მედოქსი კამბოჯიდან, 22 წლის პაქსი ვიეტნამიდან და 20 წლის ზაჰარა ეთიოპიიდან, ასევე სამი ბიოლოგიური შვილი: 19 წლის შაილო, რომელიც ჯოლიმ ნამიბიაში გააჩინა, და 17 წლის ტყუპები ვივიანი და ნოქსი, რომლებიც ნიცაში დაიბადნენ.
ჯოლიმ განქორწინებაზე განაცხადი 2016 წელს, მას შემდეგ შეიტანა, რაც ცოლ-ქმარს შორის კერძო თვითმფრინავის ბორტზე, რომელიც საფრანგეთიდან ლოს-ანჯელესის მიმართულებით მიფრინავდა, კონფლიქტი მოხდა. მაშინ ანჯელინამ მეუღლეს ბრალი ფიზიკურ ძალადობაში და ერთ-ერთ ვაჟზე თავდასხმაში დასდო, რასაც პიტი სრულად უარყოფდა.
მაშინ ფედერალურმა საგამოძიებო ბიურომ (FBI) შემოწმება ჩაატარა და საქმე ბრედ პიტისთვის რაიმე ბრალდების წარდგენის გარეშე დახურა, ხოლო ბავშვთა და ოჯახის საქმეთა დეპარტამენტმა ძალადობის ფაქტები ვერ გამოავლინა.
აღსანიშნავია, რომ ცოლ-ქმრის დავაში ბავშვები დედის მხარეს დადგნენ, რომელიც მათი მთავარი მეურვეა. პიტის მცდელობა, რომ შვილებთან ურთიერთობა დაელაგებინა, უშედეგოდ დასრულდა. საბოლოოდ, შაილომ თავისი 18 წლის იუბილეზე მამის გვარზე ოფიციალურად უარითქვა, ზაჰარა და ვივიანი კი ოფიციალურ დოკუმენტებში საკუთარ თავს პიტის გვარის გარეშე უთითებენ.
დეკემბრის ბოლოს ცნობილი გახდა, რომ მსახიობმა ჯორჯ კლუნიმ ჰოლივუდი დაყოვა და თავისი ცხოვრება საფრანგეთს დაუკავშირა. სააგენტო AFP-ის ცნობით, მან მეუღლესთან და ორ შვილთან ერთად აშშ დატოვა და საფრანგეთის მოქალაქეობა მიიღო.
ასევე დაგაინტერესებთ
#OK! მშვიდობით, ჰოლივუდო – ჯორჯ კლუნი საფრანგეთის მოქალაქე გახდა
