მეან-გინეკოლოგი, რომლის ყოველდღიური საქმიანობა, არა მხოლოდ პროფესიული ცოდნისა და გამოცდილების, არამედ ემოციური კავშირისა და უდიდესი პასუხისმგებლობის სინთეზია. ნინო ოქროპირიძე იმ სპეციალობას ემსახურება, რომელიც თითოეული ქალის ცხოვრებაში გადამწყვეტ როლს თამაშობს. მისი მისია იმ მომენტიდან იწყება, როდესაც პაციენტი ექიმთან სიხარულით მიდის, რადგან მის ცხოვრებაში ახალი სიცოცხლე იბადება. სწორედ ამ ემოციის გაზიარება და რთულ, ხშირად, კრიტიკულ სიტუაციებში სწორი გადაწყვეტილების მიღება ქმნის იმ პროფესიულ გზას, რომელზეც ნინო ოქროპირიძემ OK!-სთან ინტერვიუში ისაუბრა.
როგორ აღმოჩნდით ამ სფეროში და რა იყო მთავარი მოტივაცია, რომ ეს გზა აგერჩიათ?
ბავშვობიდან ვიცოდი, რომ აუცილებლად ექიმი გავხდებოდი. ყოველთვის მიზიდავდა ადამიანების დახმარება და ეს იყო ჩემთვის ყველაზე დიდი მოტივაცია. როცა მეკითხებოდნენ, რატომ მინდოდა ექიმობა, პასუხი მუდამ ერთი და იგივე მქონდა – „იმიტომ, რომ ადამიანები გადავარჩინო“. მედიცინაში უამრავი სპეციალობა არსებობს, თუმცა მეანობა ერთადერთია, სადაც პაციენტი ექიმთან სიხარულით მიდის. ყველაზე ემოციურია, როდესაც ბედნიერი ქალი ჩემთან მოდის, რათა სამყაროში ახალი სიცოცხლე მოავლინოს.
თქვენს კარიერაში რომელ გამოცდილებას თვლით გარდამტეხად?
თითოეული ექიმის პროფესიულ გზაზე არსებობს შემთხვევები, რომლებიც განსაკუთრებით გვამახსოვრდება და ჩვენს ხედვებს ცვლის. ჩემს კარიერაშიც ბევრჯერ შემხვედრია ისეთი იშვიათი და რთული შემთხვევები, რომლებიც მანამდე მხოლოდ ლიტერატურიდან ვიცოდი. ასეთ მომენტებში გრძნობ, რამდენად დიდი მნიშვნელობა აქვს გადაწყვეტილების სისწრაფესა და პროფესიულ ცოდნას. რა თქმა უნდა, ემოციურად რთულია მძიმე გამოცდილების გადატანა, მაგრამ ექიმი ის ადამიანია, რომელიც უკან არ იხევს და პასუხისმგებლობას ბოლომდე იღებს.
რა არის ყველაზე მნიშვნელოვანი პაციენტის ემოციური კომფორტისთვის?
პაციენტის ნდობის მოპოვება მთავარი ნაბიჯია. როცა ქალი გრძნობს, რომ ექიმი მას ინდივიდუალურად უდგება, როგორც ახლობელს, ეს უკვე ქმნის იმ ემოციურ კომფორტს, რაც აუცილებელია. მეანობა მხოლოდ სამედიცინო პროცედურა არ არის – ეს არის სითბო, მხარდაჭერა და მჭიდრო კავშირი, რომელიც ქალს ახალ ეტაპზე გადასვლის საშუალებას აძლევს.
საკმაოდ სენსიტიურ და რთულ სფეროს ემსახურებით. როგორ ინარჩუნებთ ემოციურ ბალანსს?
პროფესიისადმი სიყვარული და პაციენტის ერთგულება ჩემთვის მთავარ საყრდენად იქცა. ექიმიც ისეთივე ადამიანია, როგორც სხვები – ჩვენც გვაქვს სირთულეები და სისუსტეები, თუმცა, ამ სფეროში მიღებული გამოცდილება და სხვადასხვა საყვარელი საქმიანობისთვის დროის გამონახვა – სპორტი, მხატვრული ლიტერატურა, ოჯახის წევრებთან და მეგობრებთან ურთიერთობა, გვეხმარება ემოციურად რთული დღეების განეიტრალებასა და ენერგიულად ყოფნაში.
რას ნიშნავს თქვენთვის პროფესიული წარმატება?
მეანობა მედიცინის ერთ-ერთი ყველაზე საპასუხისმგებლო დარგია. ჩვენ ხელში არა მხოლოდ ერთი, არამედ ორი სიცოცხლეა – დედის და შვილის. სწორედ ამიტომ, თითოეული გადაწყვეტილება ორმაგად მნიშვნელოვანია. ჩემი პროფესიული წარმატება პირდაპირ უკავშირდება იმ უკუკავშირს, რასაც პაციენტებისგან ვიღებ. თითოეული კმაყოფილი ქალი, თითოეული ახალშობილი, რომელიც ჯანმრთელად იბადება, ჩემთვის უდიდესი მოტივაციაა. ეს არის ენდორფინის ყველაზე ძლიერი წყარო, რაც მაძლევს ძალას, განვაგრძო გზა და არასოდეს დავთმო ეს პროფესია.
ჩემთვის წარმატება მხოლოდ პროფესიული მიღწევებით არ განისაზღვრება. ეს არის ყოველდღიური შესაძლებლობა, რომ ადამიანების ცხოვრებაში ერთ-ერთი ყველაზე ბედნიერი მომენტის თანამონაწილე გავხდე. როდესაც პაციენტი წლების შემდეგაც კი მადლობას გიხდის და სიხარულს გიზიარებს – სწორედ ეს არის ნამდვილი გამარჯვება, რომელიც ყველა ტიტულსა თუ სტატუსზე მაღლა დგას.
ტექსტი: მარიამ ჩოქური
ფოტო: ალექსეი სეროვი
