ჰოლივუდის ლეგენდა, ბრიუს უილისი პროგრესირებადი დემენციის გამო ოჯახისგან მოშორებით, ცალკე სახლში იცხოვრებს, სადაც სპეციალისტების მუდმივი დაკვირვების ქვეშ იქნება. მსახიობის ახალი სახლი ერთსართულიანია და მთლიანად მისი საჭიროებების შესაბამისად არის მოწყობილი.
„ეს იყო ერთ-ერთი ყველაზე რთული გადაწყვეტილება, რომელიც ცხოვრების განმავლობაში მიმიღია, მაგრამ ვიცოდი, რომ ბრუსს სურდა, რომ ჩვენს ქალიშვილებს ისეთ სახლში ეცხოვრათ, რომელიც მათ საჭიროებებს უფრო მეტად მოერგებოდა და ვიდრე მისას,“ — განაცხადა მსახიობის მეუღლემ, 47 წლის ბრიტანელმა მოდელმა ემა ჰემინგ უილისმა ტელეკომპანია ABC-თან ინტერვიუში.
ბრიუს უილისის ახალი სახლი ისეა დაპროექტებული, რომ ხმაურის დონე მინიმუმამდე შეამციროს და მსახიობს გადაადგილება გაუადვილოს. ოჯახის წევრები მსახიობთან დიდ დროს ატარებენ: ისინი ერთად საუზმობენ, სადილობენ და საუბრობენ.
„სახლი სავსეა ზრუნვით, სიყვარულით და სიცილით,“ — ასე აღწერა უილისის ახალი სახლის ატმოსფერო კინოვარსკვლავის მეუღლემ. მისი მონაყოლიდან ასევე ირკვევა, რომ მსახიობი ფიზიკურად ჯერჯერობით ჯანმრთელია, მოძრაობს და მეუღლეს ცნობს, მაგრამ ტვინი უკვე ღალატობს.
როგორც მოსალოდნელი იყო, ბრიუს უილისის ცალკე სახლში გადაყვანის გამო ემა ჰემინგ-უილისს კრიტიკის ქარცეცხლი დაატყდა. ემამ კრიტიკოსებს ინსტაგრამის პირად გვერდზე უპასუხა და აღნიშნა, რომ მხოლოდ ოჯახმა იცის, რა არის უკეთესი მის ქმრისთვის.
„ვიცოდი, რომ როგორც კი საზოგადოებას ჩვენს პირად ინფორმაციას გავუზიარებდით, ორ ბანაკს დავინახავდით: ადამიანები საკუთარი აზრით და ადამიანები რეალური გამოცდილებით. აი, რას აწყდებიან მომვლელები — მხოლოდ კრიტიკასა და განკითხვას. თუნდაც ვიღაც ახლოს იყოს დემენციასთან ან სხვა დაავადებასთან, ის მაინც არ ცხოვრობს შენს სახლში და არ იცის, როგორია ურთიერთობები შენს ოჯახში. თუ ადამიანებს მსგავსი გამოცდილება არ აქვთ, მათ ამაზე საუბარი არ შეუძლიათ“ — აღნიშნა მოდელმა.
