სამზარეულოს მოწყობისას ყველაზე მნიშვნელოვანი კომფორტის უზრუნველყოფაა. სივრცე ისე უნდა იყოს გადანაწილებული, რომ კერძების მომზადებაში ხელი არ შეგეშალოს და ამავდროულად, მყუდრო გარემოში შეძლო სადილობა. ეს ყველაფერი კი იმაზეა დამოკიდებული, რამდენად სწორად შეარჩევ ავეჯს.
დღესდღეობით საკმაოდ პოპულარული არჩევანია ბარის კომპლექტი. ამ უკანასკნელს განსაკუთრებით ხშირად ირჩევენ სტუდიოს ტიპის ბინებში. თუ შენც იმ გადაწყვეტილების წინაშე დგახარ, რომელი აირჩიო – ბარის კომპლექტი თუ სასადილო მაგიდა და სკამები, ჩვენს რჩევებს მიჰყევი. დღეს ორივე მათგანის უპირატესობებს განვიხილავთ, რათა გადავწყვიტოთ, როდის, რომელია უკეთესი ალტერნატივა.
ოთახის პროპორციები
გადაწყვეტილება, სასადილო მაგიდა და სკამების შეძენა სჯობს, თუ ბარის კომპლექტის, მეტწილად სამზარეულოს მახასიათებლებზეა დამოკიდებული. გასათვალისწინებელია, ოთახის ზომა, წყობა, ტექნიკისა და სხვა დეტალების გადანაწილება. ამის მიხედვით, უკეთ მიხვდები, რომელი ალტერნატივაა შენთვის უფრო ოპტიმალური.
როდის სჯობს სასადილო მაგიდა და სკამების შეძენა
იმ შემთხვევაში, თუ სივრცეში შეზღუდული არ ხარ და ამავდროულად, საუზმობისას თუ სადილობის დროს სიმყუდროვეს ამჯობინებ, შეგიძლია, ტრადიციულად, სასადილო მაგიდა და სკამები შეიძინო. მაგიდა და სკამები ბართან შედარებით დიდ ადგილს იკავებს, თუმცა ხშირად უფრო კომფორტულია. განსაკუთრებით, მაშინ, თუ საოჯახო სადილების მოწყობა გიყვარს. ეს ერთგვარ თავშეყრის ადგილად შეიძლება იქცეს. გარდა ამისა, უფრო მშვიდ გარემოში, განმარტოებით შეძლებ საყვარელი კერძით სიამოვნების მიღებას. არც ოჯახის სხვა წევრებს შეაწუხებ და არც შენ შეგაწუხებენ, რადგან საუზმობისთვის, სადილობისას თუ ვახშამზე ცალკე კუთხე გექნება.
როდის არის ბარის კომპლექტი იდეალური არჩევანი
მეორე მხრივ, ბარის მაგიდა და სკამები პრაქტიკული და კომფორტული არჩევანია. დღეს ბევრი სწორედ ამ ალტერნატივას ირჩევს, რადგან არაერთი პლუსი აქვს. მაგალითად, სტუდიოს ტიპის ბინებში, სადაც სამზარეულო და მისაღები ოთახი გაერთიანებულია, ბარის კომპლექტი სოციალიზაციის საშუალებას იძლევა. შეგიძლია, კერძის მომზადების პარალელურად სტუმრებთან გქონდეს კომუნიკაცია და შენც წვეულების ნაწილად იგრძნო თავი. რაც ყველაზე მნიშვნელოვანია, ბარის მაგიდა და სკამები გაცილებით ნაკლებ ადგილს იკავებს და მეტ სივრცეს ტოვებს მოძრაობისთვის.
რა ფაქტორები უნდა გავითვალისწინოთ
როგორც უკვე აღვნიშნეთ, გადაწყვეტილების მიღებისას მთავარი განმსაზღვრელი ფაქტორი სამზარეულოს პროპორციებია, თუმცა, ასევე მნიშვნელოვანია, ვიზუალური მხარე. ინტერიერის მიხედვით, თავად განსაზღვრავ, რომელი ვარიანტი უფრო მოუხდება შენს სამზარეულოს. ამ შემთხვევაშიც, ისე როგორც ყოველთვის, მთავარი შენი პრეფერენციები და სურვილებია. არ არსებობს სტანდარტული პასუხი, რომელიც ყველა სიტუაციას მოერგება.
სასადილო მაგიდასა და ბარის კომპლექტს შორის არჩევანი დამოკიდებულია ოთახის პროპორციებზე, ინტერიერის სტილსა და პირად პრეფერენციებზე. თუ დიდი სამზარეულო გაქვს და მყუდრო, ოჯახური სადილების მოწყობა გიყვარს, სასადილო მაგიდა და სკამები საუკეთესო არჩევანია. ხოლო თუ სივრცეში შეზღუდული ხარ, ამ შემთხვევაში, ბარის კომპლექტი უფრო პრაქტიკული გადაწყვეტა შეიძლება იყოს. მთავარია, ავეჯი არა მხოლოდ ვიზუალურად უხდებოდეს შენს ინტერიერს, ასევე კომფორტული და მოსახერხებელი იყოს ყოველდღიურობაში.
პარტნიორი კომპანიის კონტენტი
