ფიქრობს, რომ თავისუფლება საკუთარ თავზე გამარჯვებას მოაქვს, უწყვეტი ძიების პროცესს, რომელიც სამყაროს უკეთ შეცნობაში გეხმარება. მისთვის მუსიკა ბრძოლის საშუალებაა, რომელიც არასოდეს აძლევს მოდუნების შესაძლებლობას და მისგან მოგვრილი ენერგიით ცდილობს იმ ადამიანებს დაუდგეს გვერდით, ვინც ამას ნამდვილად საჭიროებს. „Ok! ბათუმის“ სტუმარი დიჯეი, ლაივ შემსრულებელი, მოძრაობა Secret Garden Moves-ის დამფუძნებელი, კატიშა დაშნიანია, რომელიც თავის შემოქმედებაზე, მოძრაობის დაფუძნების
იდეასა და მიზნებზე გვესაუბრა.
იყო ხელოვანი, ნიშნავს…
კეთილად აღიქვამდე სამყაროს. გქონდეს სიყვარულისა და მიტევების განსაკუთრებული უნარი.
მუსიკისადმი სიყვარული…
ჩემი სიყვარული მუსიკისადმი მაძლევს საშუალებას, ვიბრძოლო ყოველდღიურად. უკეთესად გავიცნო სამყარო და ჩემი თავი.
ხართ სამი შვილის დედა, წარმატებული ქალი პროფესიაში. რას მიიჩნევთ თქვენს ძლიერ თვისებად, რომელიც არასდროს გაძლევთ მოდუნებისა და დანებების საშუალებას?
მებრძოლი ვარ, არ ვნებდები არასდროს. არანაირი შეცდომა და წარუმატებლობა არ მიმაჩნია შეჩერებისთვის საკმარისად. საკუთარი თავის მუდმივად განვითარების სურვილი მაძლევს ძალას, რომ არ მოვდუნდე.
მოგვიყევით მოძრაობაზე, რომელიც დააფუძნეთ ქალთა გასაძლიერებლად…
Secret Garden Moves-ი კულტურულ-საგანმანათლებლო მოძრაობაა, რომელიც დავაფუძნეთ ქალების და, უპირველესად, დედების მხარდასაჭერად, მათ ყოველდღიურ სირთულეებზე ცნობიერების ამაღლებისთვის. პანდემიის პერიოდში მომწიფებული იდეა მალე 2 წლის ხდება და მუსიკალური ღონისძიებების გარდა, პოდკასტების, ცოცხალი შეხვედრებისა და ვორქშოპების სერიას მოიცავს.
მუსიკა, რომლის გარეშე არ არსებობს თქვენი დღე…
Lay – seeds.
კადრი, რომელიც არასოდეს წაიშლება თქვენი მეხსიერებიდან…
კადრები ჩემი ბავშვობიდან.
როგორც შემოქმედ ადამიანს, რა ინსპირაციას გაძლევთ ბათუმი?
ბათუმი შესაძლებლობების ქალაქია. დიდია და, ამავდროულად, უამრავი რამ აკლია. მისი სილამაზისა და უნიკალურობის გადასარჩენად მოქალაქეებს ყოველდღიური ბრძოლა გვიწევს. ეს ბრძოლა კი მაძლევს ინსპირაციას, ვაკეთო ჩემი საქმე.
რას მოაქვს თქვენში თავისუფლება და როგორია თქვენი თავისუფალი დრო?
თავისუფლება საკმაოდ ძვირი ღირს. თავისუფლება ჩემთვის საკუთარ თავზე გამარჯვებას მოაქვს, როცა კომფორტის ზონას ტოვებ. საკუთარ სინდისთან კომპრომისზე წასვლა თავისუფლებასაც გაშორებს.
ჩემი თავისუფალი დრო მთლიანად ოჯახსა და მუსიკას ეთმობა. პერიოდულად კი ვცდილობ, თავისუფალი დრო მხოლოდ ჩემს თავს მოვახმარო. ეს აუცილებელია ყველა მშობლისთვის.
ხართ ივენთების ორგანიზატორი, როგორია ეს წვეულებები?
secret garden-ის ღონისძიებათა სერია უპირველესად თითოეული ადამიანის უსაფრთხო გართობას გულისხმობს. ეს არის თანამოაზრეების შეკრების ადგილი, სადაც ერთ სივრცეში ერთმანეთისთვის სრულიად უცხო ადამიანებსაც კი ერთმანეთი გვიყვარს და მთელ ღამეებს ცეკვაში ვატარებთ.
სიკეთე, როგორც…
უანგარო ქმედება, როცა თავად გაქვს კმაყოფილების შეგრძნება, რომ შეგიძლია სხვას დაეხმარო. ოდნავ მაინც შეუმსუბუქო ყოველდღიურობა და ეს შენ განიჭებს სიამოვნებასა და თვითკმაყოფილებას.
ოჯახი, სიყვარული და მათგან მიღებული ენერგია…
ოჯახი უდიდესი ძალაა ადამიანისთვის. მათი არსებობისთვის ბევრ რამეს თმობ და ეს სიამოვნებასაც კი განიჭებს. ბავშვები ყველაფერს მიითვისებენ. ზაფხულისა და ზამთრის არდადეგები მხოლოდ შენ აღარ გეკუთვნის. მათთვის უნდა გამოყო ძალიან ძვირფასი რამ, დრო. და ამ დროს სიამოვნებით უძღვნი მათ, ვინც გიყვარს, ვინც ზურგს გიმაგრებს.
ამ ყველაფერს უძილო ღამეები და დაღლაც ახლავს თან. ამიტომაც საკუთარი თავისთვის დროის გამოყოფა და პირადი სივრცე აუცილებელია.
ის, რისიც ყველაზე მეტად გჯერათ…
სამყარო, რომელიც მუდმივად გიგზავნის მინიშნებებს.
მუსიკოსი, რომელთან ერთადაც სიამოვნებით გააკეთებდით კოლაბორაციულ პროექტს…
Christina Vantzou.
ბათუმის რიტმი დღეს…
სამწუხაროდ, ახლა უკვე ძალიან ქაოსური, უწესრიგო, გატეხილი, მაგრამ ჩემთვის მაინც ჰარმონიული და შეუცვლელი.
