ჟურნალი OK! ახალ ციფრულ პროექტს სახელად „ბიზნესსელებრითი“ იწყებს. ეს იქნება ძალიან საინტერესო ვიდეო ინტერვიუების ციკლი, რომელიც წარმატებული ადამიანების ბიზნეს ისტორიებსა და მათ მრავალმხრივ გამოცდილებაზე გვიამბობს.
როგორც პროექტის მენეჯერი ანი ჯიქია ამბობს, „OK!-ის გუნდს დიდი გამოცდილება აქვს წარმატებული ადამიანების პორტრეტების შექმნისა და გავრცელების როგორც ბეჭდვით, ისე ონლაინ პლატფორმებზე, მაგრამ დღეს ვიდეო კონტენტის წარმოება ჩვენი პრიორიტეტია და ამიტომაც, გადაცემა „ბიზნესსელებრითის“ ნახვა მხოლოდ ვიდეო ინტერვიუს ფორმატში იქნება ხელმისაწვდომი, რომელიც OK!-ის ყველა ოფიციალურ ელექტრონულ პლატფორმაზე განთავსდება“.
რაც შეეხება შინაარს და იმას, თუ ვის დაუთმობს რედაქცია გადაცემა „ბიზნესსელებრითის“ საეთერო სივრცეს, ესენი იქნებიან ძირითადად ქალები, მაგრამ არა მხოლოდ, ვინც შესაძლოა წარმოადგენდნენ ბიზნესის დამფუძნებლებს, დირექტორებს, წამყვანი პოზიციების მენეჯერებს – ადამიანებს, ვისაც ყოველდღიურად უწევს შეხება მნიშვნელოვან ბიზნეს პროცესებთან, სარისკო გადაწყვეტილებების მიღებასთან, გუნდების მართვასთან, მარკეტინგთან, ბრენდინგთან და არა მხოლოდ.“
„ბიზნესსელებრითი“ იქნება წარმატების ისტორიების ციფრულ სამყაროში გავრცელების საუკეთესო პლატფორმა. OK!-ის გუნდში ამბობენ, რომ ამ გადაცემების ნახვის შემდეგ ათასობით ადამიანს გაუჩნდება მოტივაცია, რომ თავადაც სცადოს, არ დანებდეს, არ შეუშინდეს მარცხს, დაიჯეროს საკუთარი შესაძლებლობების და შექმნას რაიმე ახალი, რაც სასარგებლო იქნება მისთვისაც და სხვა ბევრი ადამიანისთვისაც.
გადაცემა „ბიზნესსელებრითი“ ყოველ ხუთშაბათს, საღამოს 9 საათზე OK!-ის ფეისბუქ გვერდზე გავა.
პირველი გადაცემის პრემიერა ფეისბუქ ლაივში 1 ივნისსაა დაგეგმილი.
