„ველედა“ არის ნატურალური კოსმეტიკისა და წამლების წამყვანი მწარმოებელი მსოფლიოში. კომპანია 1921 წელს დაარსდა შვეიცარიაში, ცნობილ ფილოსოფოს რუდოლფ შტაინერისა და ექიმ იტა ვეგმანის მიერ. ეს არის ბრენდი, რომელსაც საზოგადოება ენდობა, რაც ბრენდის გამჭვირვალობის დამსახურებაა. „ველედას“ სამი ძირითადი საწარმო აქვს გერმანიაში, შვეიცარიასა და საფრანგეთში. ასევე, ფლობს 8 მეურნეობას, სადაც მოჰყავთ მცენარეები, რომლებიც გამოიყენება „ველედას“ პროდუქტების დასამზადებლად. აღსანიშნავია, რომ „ველედა“ ნედლეულს, სამკურნალო მცენარეებს მოიპოვებს ველურ ბუნებაშიც. „ველედას“ ბაღები, მსოფლიო მასშტაბით, დაახლოებით 60 000 ჰექტარს მოიცავს. სწორედ ამ 8 ბაღიდან ერთ-ერთში იმყოფებოდა კომპანიის ახალი აღმასრულებელი დირექტორი, ნათია ჭინჭარაული, რომელმაც ჟურნალ OK!-ის თავისი შთაბეჭდილებები გაუზიარა.
OK!-ის მკითხველი „ველედას“ კარგად იცნობს, რომელიც ერთ-ერთი ყველაზე სანდო ბრენდია. თქვენი აზრით, ეს ნდობა რის დამსახურებაა?
მადლობა ასეთი შეფასებისთვის. „ველედას“ სამი ძირითადი საწარმო აწარმოებს კომპანიის ათასობით სამკურნალო და ასობით კოსმეტიკურ პროდუქტს, რომლებიც ბიო და ნატურალური ბეჭდებითაა სერტიფიცირებული. მათი მახასიათებლებია: 100%-ით სერტიფიცირებული ბუნებრივი კოსმეტიკა, რომელიც არ შეიცავს მინერალურ ზეთებს, პარაბენებს, პოლიეთილენგლიკოლს და სილიკონებს. ასევე, მის შემადგენლობაში არ არის სინთეზური არომატიზატორები, გენმოდიფიცირებული და მიკროპლასტიკური ინგრედიენტები. „ველედას“ პროდუქცია არ არის ცხოველებზე გამოცდილი, მცენარეული ნედლეულის 80% სერტიფიცირებული ორგანული მეურნეობიდანაა და მისი მოპოვება ხორციელდება კორპორაციული სოციალური პასუხისმგებლობით.
რაც ყველაზე მნიშვნელოვანია, „ველედა“ არ ამზადებს განსხვავებული ხარისხის პროდუქციას სხვადასხვა ქვეყნისთვის, რაც იმას გულისხმობს, რომ საქართველოში, აშშ-სა და გერმანიაში ერთი და იგივე პროდუქტი იყიდება.
ნათია, ჩვენთვის ცნობილია, რომ თქვენ იმყოფებოდით გერმანიაში, კერძოდ Schwabisch Gmund-ში, სადაც მოინახულეთ „ველედას“ მეურნეობა და საწარმო. გაგვიზიარეთ თქვენი შთაბეჭდილებები.
მინდა აღვნიშნო, სანამ წავიდოდი, ბევრი ისტორია მქონდა მოსმენილი „ველედას“ ბაღების შესახებ, თუმცა რეალობამ მოლოდინს გადააჭარბა. წარმოუდგენელია, რომ ამ მასშტაბის კომპანია ახერხებს შეინარჩუნოს 100-წლიანი ტრადიცია, შექმნას ასეთი მაღალი ხარისხის ბუნებრივი და ნატურალური პროდუქცია და თან თავად დააწესოს სტანდარტი.
მე ვიმყოფებოდი „ველედას“ 8 ბაღიდან ერთ-ერთში − შვებიშ გმუნდთან მდებარე ვეცგაუს სამკურნალო მცენარეთა ბაღში. აღნიშნული მეურნეობა მოიცავს დაახლოებით 23 ჰექტარს და 800-მდე სახეობის მცენარეს, რომელთაგან 160 სამკურნალოა. თუ როგორ მოჰყავთ, უვლიან და ზრუნავენ ამ მცენარეებზე, იყო ჩემი აღფრთოვანების მიზეზი. პერსონალი მკაცრად მიჰყვება ბიოდინამიური მეურნეობის პრინციპებს, რაც საკმაოდ რთული პროცესია, მით უმეტეს, თუ გავითვალისწინებთ, რა მასშტაბის მეურნეობასთან გვაქვს საქმე.
მცენარეებზე ზრუნვა იწყება ნიადაგზე ზრუნვით: ნიადაგი მუშავდება სპეციალურად მომზადებული ბუნებრივი კომპოსტით, ნათესები ირგვება მონაცვლეობითი პრინციპით; აუცილებლად არის შერეული კულტურები, რადგან ეს მცენარეები ერთმანეთს „ეხმარებიან“. გარდა ამისა, ბაღში არის მწერების „სასტუმრო“ − ამით ისინი იზიდავენ მწერებს, რომლებიც ამტვერიანებენ მცენარეებს ან ანადგურებენ მავნებლებს. ასევე, აქვთ სპეციალური ფრინველების სახლები, სადაც შექმნილია ყველანაირი კომფორტი იმ ფრინველებისთვის, რომლებიც სასურველია ბინადრობდნენ აღნიშნულ ბაღში.
თითოეული მცენარის ღერს, ფოთოლს, ყვავილს, აქვს თავისი დანიშნულება, ამიტომ, როგორც წესი, მოსავალი იკრიფება ხელით, რათა მოხდეს მათი სწორი გადარჩევა. მნიშვნელოვანია მოსავლის აღება მოხდეს დღის იმ კონკრეტულ მონაკვეთში, როცა მცენარე სრულფასოვანია. აღსანიშნავია, რომ „ველედას“ ოფისის თანამშრომლებიც იღებენ მონაწილეობას მოსავლის აღებაში. აღებული მოსავალი გადაირჩევა და მხოლოდ საუკეთესო ხარისხის მქონე ნაწილი მყისიერად მუშავდება, რათა არ დაკარგოს საკუთარი ბუნებრივი თვისებები და ბენეფიტები.
მართალია რთული დასაჯერებელია, თუმცა რეალობაა, რომ „ველედა“ ასეთი არაინდუსტრიული და ბუნებრივი მეთოდებით ახერხებს აწარმოოს მოთხოვნადი პროდუქტების მსგავსი რაოდენობა, რათა დააკმაყოფილოს 50 ქვეყნის მომხმარებელი და ამავდროულად გააოცოს ხარისხით. სწორედ ეს ყველაფერი გამოარჩევს „ველედას“ სხვა კომპანიებისგან და ეს იწვევს ნდობას მომხმარებლის თვალში.
თქვენი ნაამბობიდან ვრწმუნდებით, რომ „ველედას“ მიზანია უფრო მეტად დააახლოოს ადამიანი და ბუნება ერთმანეთს…
„ველედას“ მიზანია, ჯანმრთელობისა და სილამაზის გამოვლენა ბუნებასა და ადამიანთან ჰარმონიაში. ეს ბრენდი ნამდვილად ზრუნავს ადამიანების კეთილდღეობაზე, რაც ასევე გულისხმობს დედამიწასა და გარემოზე ზრუნვას, რისთვისაც კომპანია ყოველწლიურად გამოყოფს ბიუჯეტს.
წელს „ველედა“ აწარმოებს კამპანიას Save the Earth Skin, რომლის ფარგლებში მან არაერთი საქველმოქმედო პროექტი განახორციელა დედამიწის ნიადაგის დასაცავად. საქართველოშიც აღნიშნული კამპანიის ფარგლებში დაგეგმილია ღონისძიებები. ნოემბერში საქართველოში ჩამოვა მიხაელ შტრაუბი, რომელიც 1998 წლიდან 2021 წლამდე იყო შვებიშ გმუნდის ბაღის ხელმძღვანელი. ის გაგვიზიარებს ბიოდინამიური მეურნეობის პრინციპებს, კომპოსტის მომზადების სხვადასხვა ტექნიკასა და სამკურნალო მცენარეთა შესაძლებლობებს სამედიცინო სემინარის ფარგლებში.
