#OK! ბუტიკი სასტუმრო „კვირია“ - ადგილი, სადაც დაუვიწყარი მოგონებები იბადება

ზაფხულის ცხელი დღეების გასატარებლად კახეთი ერთ–ერთი საუკეთესო არჩევანია. სუფთა ჰაერი და კავკასიონის ულამაზესი ხედი კი ყველა სტუმარს პირველივე ჩასვლისას ხიბლავს. ბევრი რომ არ გავაგრძელოთ, ჟურნალი OK! კახეთის დედაქალაქში მდებარე სასტუმრო „კვირიას“ შესახებ გიამბობთ, რომელიც აშშ-ში 17-წლიან ემიგრაციაში ყოფნის შემდეგ დაბრუნებულმა ცოლ–ქმარმა, ალექსანდრე მელაშვილმა და მაია ჭინჭარაულმა გახსნეს. „კვირიას“ დამფუძნებლები 6 წელია რაც საქართველოში დაბრუნდნენ და რამდენიმეწლიანი თავდაუზოგავი შრომის შედეგად თელავის ერთ–ერთ ძველ უბანში ქალაქური, ბუტიკური ტიპის სასტუმრო ააშენეს.

მაიას და ალეკოს მიზანი სწორედაც რომ ქართული სულისა და ტრადიციების ამერიკულ სერვისთან და მაღალ სტანდარტთან კომბინირება გახლდათ. მათი პრიორიტეტი თავიდანვე ისეთი სივრცის შექმნა იყო, სადაც თბილადაც დახვდებოდნენ ყველა სტუმარს, მაგრამ ყველა ნაბიჯში გაგრძნობინებდნენ, რომ ხუთვარსკვლავიანი სერვისის შექმნა პატარა სივრცეშიც შესაძლებელია. აქ დაგხვდებათ ლამაზი ვერანდები, გემოვნებით და ლამაზად მოწყობილი ეზო, საკონფერენციო დარბაზი, მარანი, საუნა, ჯაკუზი, რესტორანი, ღია აუზი და ბარი.

სასტუმროში სულ 14 ნომერია, აქედან 12 სტანდარტული, ერთი საოჯახო და ერთი ლუქსი. ოროთახიან საოჯახო ტიპის ნომერში 5-6 სტუმარი კომფორტულად თავსდება და ნამდვილად იდეალურია ოჯახთან ან მეგობრებთან ერთად დასვენებისთვის. ლუქსის ტიპის ნომერს განსხვავებული აბაზანა და ყველაზე დიდი აივანი აქვს, საიდანაც კავკასიონის ულამაზესი ხედები იშლება. ეს ნომერი იდეალურია ახალდაქორწინებული წყვილებისათვის ან უბრალოდ მათთვის, ვინც განსაკუთრებულ დღეს აღნიშნავს. აქვეა ადაპტირებული ნომერი შშმ-პირებისთვის, სადაც აბაზანაც და საწოლიც საკმაოდ მოსახერხებელი და კომფორტულია.

არ შეიძლება არ ვისაუბროთ „კვირიას“ უგემრიელეს სამზარეულოზე, სადაც თქვენ დაგხვდებათ უმაღლესი ხარისხის პროდუქტებისაგან შექმნილი კერძების მრავალფეროვანი არჩევანი. ადგილობრივი შეფი, რომელიც სასტუმროს გახსნის პირველი დღიდანაა ჩართული მის წარმატებაში, არა მარტო ამზადებს კერძებს, არამედ ამავდროულად ყველა სტუმარს გულისხმიერად აკვირდება, რათა დარწმუნდეს, რამხელა მოწონებას იმსახურებს მისი სიყვარულით შექმნილი კერძები. საყვარელ ადამიანებთან სასიამოვნო საღამოს გასატარებლად აქ ნამდვილად დაგხვდებათ განსაკუთრებული გარემო.

სასტუმროს პირველ სართულზე წარმოდგენილია მარანი და ღვინის ბარი, სადაც ტარდება ღვინის დეგუსტაციები და ასევე წარმოდგენილია გასართობი სივრცე სხვადასხვა სამაგიდო თამაშით (ბილიარდი, ჭადრაკი) და პატარა საოჯახო მუზეუმი.

ბუტიკი სასტუმრო „კვირია“ დამსვენებლებს საკუთარ ღვინოს სთავაზობს, რომელიც ლიმიტირებული რაოდენობით მზადდება და მხოლოდ სასტუმროში იყიდება. სახელი „მათისი“-ც მათ ისტორიას უკავშირდება, როცა მაიამ („მა“) და თინამ („თი“) ქისის („სი“) ზონაში მიწის ძიება დაიწყეს, რათა სტუმრებს თავიანთი ღვინით გამასპინძლებოდნენ. თინა ახალბედა მეღვინეა, რომელმაც ღვინის დაყენება 2019 წლიდან დაიწყო. სასტუმროს მშენებლობის პირველი დღეებიდან აქტიურად იყო ყველა პროცესში ჩართული, შესაბამისად მაიამ და ალეკომ თუ ვერ გიმასპინძლათ, გული არ დაგწყდეთ – თინა იკითხეთ თქვენი სტუმრობისას. მარანში ისტორიული ჭაა რომელსაც უკავშირდება საინტერესო ფაქტები. როცა თინას შეხვდებით, ეს ამბავი აუცილებლად მოაყოლეთ.

საკონფერენციო დარბაზი გათვლილია 25 სტუმარზე და ძალიან კომფორტულია პატარა სამუშაო ჯგუფებისთვის, რომელიც აღჭურვილია მაღალი ხარისხის ტექნიკით. უნიკალურობა და მაღალი სტანდარტი ყველა სივრცეში იგრძნობა. მაგალითად, საუნა აქ ინდივიდუალურად იჯავშნება და შესაბამისად, ჰიგიენური ნორმებიც მაქსიმალურად არის დაცული.

უფრო ადრე უნდა აღგვენიშნა, რომ ეს პირველი ე.წ. „ჭკვიანი“ სასტუმროა ამ რეგიონში და ალბათ საქართველოშიც. სასტუმროს ტექნიკური დეტალები კონტროლირებადია დისტანციურად. ნებისმიერ დროსაა შესაძლებელი განათების, კონდიცირების, გათბობის, მორწყვის სისტემის, სახანძრო სიგნალიზაციის და ასევე, წყლის მარაგის დონის მონიტორინგი. სასტუმროს ერთ-ერთი მთავარი მიზანი გარემოზე ზრუნვაა, ამიტომ აქ შეხვდებით ელექტროსკუტერებს და მზის ბატარეებს სასტუმროს სახურავზე.

სასტუმროს სახელწოდება „კვირია“ დამფუძნებლის, მაია ჭინჭარაულის მამის სახელს უკავშირდება და ასევე, ქართული მითოლოგიის თანახმად, სამართლიანობისათვის მებრძოლი ღვთაების სახელია. გარდა ამ სიმბოლური დატვირთვისა, ყველასათვის საყვარელ უქმე დღესთან – კვირასთან ასოცირდება. მათი ლოგო კი სიცოცხლის სპირალია, მდედრობითი სიძლიერისა და სიახლისთვის მზადყოფნის აღსანიშნავად.

ბევრი რომ არ გავაგრძელოთ, გირჩევთ თავად გამოსცადოთ. ესტუმრეთ და დაიტვირთეთ დადებითი ემოციებით ბუტიკ სასტუმროში „კვირია“. როცა დარწმუნდებით, რომ მათი სლოგანი „როცა ყველასგან გამოირჩევი“ მხოლოდ სიტყვები არაა, გთხოვთ არ დაგავიწყდეთ და თქვენი ემოციები ჩვენც გაგვიზიარეთ.