ტრეისი ემინი ინგლისელი ხელოვანია, რომელიც ცნობილია ავტობიოგრაფიული ხელოვნების ნიმუშებით. ემინი ნამუშევრებს სხვადასხვა მედიუმში ქმნის, რაც მოიცავს ხატვას, ქანდაკებას, ფილმს, ფოტოგრაფიას, ნეონის ტექსტებსა და ქსოვილს, რომლის საშუალებითაც ის ამჟღავნებს პირად აზრებს სიყვარულზე, მიზიდულობასა და ურთიერთობებზე.
2000-იან წლებში ტრეისი ემინმა ნეონის განათებებით დაიწყო მუშაობა, რომელიც სხვადასხვა ფრაზისა და სიტყვებისგან შედგება. ისინი ხელნაწერებს წააგავს. ნეონის (neus − ახალი) ყველაზე დიდი კონცენტრაცია მზესა და ვარსკვლავებზეა, დედამიწაზე კი, მის სიმცირეს იმით ხსნიან, რომ ის პირველად ატმოსფეროსთან ერთად დავკარგეთ. ემინის ნეონის ნამუშევრის მოულოდნელმა და ირეალურმა ფრაზამ – you forgot to kiss my soul დაატყვევა მნახველი და ხელოვანთან ემოციურად დააკავშირა.
ნეონის გამოყენება არტისტმა იმიტომ დაიწყო, რომ ეს მასალა ყოველთვის იქცევს ყურადღებას. მის ნამუშევრებს უნიკალურად სიტყვები აქცევს, რომელთა გამოყენება არტისტს განსაკუთრებით კარგად შეუძლია.
გამორჩეულია ტრეისი ემინისა და ლუიზ ბურჟუას ერთობლივი სერიაც − Do Not Abandon Me, რომელშიც არტისტებმა ფიზიკური შეგრძნებები და იდენტობის, სექსუალობისა და დანაკარგის შიშის თემები გამოიკვლიეს. მუშაობის დასაწყისში ბურჟუამ გუაშის ტილოები შექმნა და ისინი დასამთავრებლად ემინს გაუგზავნა, რომელმაც, თავის მხრივ, ტილოებს მინიატიურული ფიგურები და წარწერები დაუმატა.
არტისტის კიდევ ერთი მნიშვნელოვანი გამოფენაა The Last Great Adventure is You, რომელმაც დიდი ზომის ნაქარგები, ბრინჯაოს ქანდაკებები, გუაშის ტილოები და ნეონი გააერთიანა. გამოფენა „დროის წარმავლობისა და იმ მარტივი იდეის გააზრებას იკვლევს, რომ ჩვენ ყველანი მარტოები ვართ“.
აქ ნაჩვენები შიშველი ფიგურები ძალიან დახვეწილი ფორმისაა და გარკვეული აზრით, ახალ განზომილებას ქმნის იმ სახელოვნებო სამყაროში, რომელშიც ქალის შიშველ ფიგურას მხოლოდ მამაკაცები ხატავდნენ.
ტრეისი ემინი სახელოვნებო სამყაროს ერთ-ერთ ყველაზე მნიშვნელოვან ფიგურად მიიჩნევა. მან არტისტული ფორმების გამოყენებისა და მუდმივი თვითრეფლექსიის გზით, საკუთარი შინაგანი სინამდვილის გულწრფელად, ცხადად და შეულამაზებლად გადმოცემა შეძლო.
