დიდი და რთული ზამთარი დასრულდა და წინ უკეთესი დღეების მოლოდინი გვაქვს ყველას.
ქალებზე მინდა დავწერო, საქართველოში მცხოვრებ არაჩვეულებრივ, უნიჭიერეს, ძლიერ, მშრომელ, ლამაზ ქალებზე. მინდა თავს უფლება მივცე და ვუთხრა, რომ აკეთონ ზუსტად ის, რაც სურთ; ის, რაზეც ოცნებობენ. მთავარია, საკუთარ თავთან იყვნენ მართლები, იყვნენ გულწრფელნი. გამოიყენონ ყველა მცირე თუ დიდი შანსი წინსვლისა და განვითარებისთვის. იყვნენ თავისუფლები, რადგან თავისუფლების შეგრძნება უსაზღვრო შესაძლებლობებს გვიხსნის.
მინდა ყველა ქალს ვუსურვო ლანა ღოღობერიძის შემართება და მისი ოპტიმიზმი. მინდა ყველა გოგოს ვუთხრა, რომ ნინო ზამბახიძემ თავის წარმატებას მხოლოდ საკუთარი შრომით – 24/7 რეჟიმით მიაღწია. შრომა და ოპტიმიზმი ყოველთვის იძლევა შედეგს. მინდა გაგაცნოთ გასაოცარი სპორტსმენი გოგონები. სპორტს შეუძლია სასწაულების მოხდენა, ჩვენს ყდას ამ გამოშვებაში ულამაზესი, ახალგაზრდა, გაბედული ფეხბურთელი გოგონების გუნდი ამშვენებს. ასეთი მრავალფეროვანია ჩვენი ნომერიც და ასეთები არიან ჩვენი გოგონებიც.
ყოველთვის, როდესაც ქალებს ვახსენებ, უპირველესად ემიგრანტი ქალები მახსენდებიან. საქართველოსგან შორს მყოფი, თავდადებული დედები, ბებიები თუ შვილები. სწორედ ისინი არიან უდიდესი პატრიოტები.
მათ საკუთარი შრომით არჩინეს და დღემდე არჩენენ რამდენიმე ასეულ ათას ოჯახს საქართველოში. მათი დამსახურება და წვლილი ქვეყნის გადარჩენაშიც დიდია. ყველამ ვიცით, რომ ჩვენს ემიგრანტებს არ აქვთ მარტივი ცხოვრება. ყველამ ვიცით ასევე მათი გრძნობების შესახებ, მათი სირთულეებით სავსე ყოფის შესახებ. ვიცით, და სამწუხაროდ, ვერაფერს ვთავაზობთ სანაცვლოდ. მადლობას თუ ვეტყვით მხოლოდ, იმისთვის, რასაც საქართველოსთვის აკეთებენ.
ჩემს სარედაქტორო სვეტში მინდა საჯარო მხარდაჭერა გამოვხატო ყველა მშრომელი ქალის მიმართ, ვინც საკუთარ მხრებზე ატარებს უამრავი ადამიანის სატარებელს. მინდა ჩემი მხარდაჭერა გამოვუცხადო ყველა სტუდენტს, მოსწავლეს, ვისაც დიდი მიზნები აქვს… არაფრის შეგეშინდეთ, გოგონებო, იფიქრეთ დიდ მიზნებზე, იოცნებეთ დიდ იდეებზე, რადგან მალე მოვა ის დღე, როცა ამ მიზნებს ხორცს შეასხამთ.
ყველა გოგომ უნდა ვიცოდეთ, სულ პატარაობიდან, რომ პირველი, ვინც უნდა გვიყვარდეს, ჩვენი თავია. ვიზრუნოთ, გავუგოთ, ვაპატიოთ, მოვუაროთ და გავუფრთხილდეთ მას… შეუცდომელი ადამიანი არ არსებობს, პატარა და დიდ შეცდომებზე ვსწავლობთ ყველა და გამოგვაქვს დასკვნებიც. არ არსებობს სიტუაცია, შემთხვევა, რომელსაც ჩვენ ვერ მოვერევით. სწავლით და შრომით კი იმასაც მივაღწევთ, რაც ერთ დროს შეუძლებელი გვეგონა!
გაზაფხულია უკვე გარეთ. ყველას ბედნიერ და სიხარულით სავსე გაზაფხულს გისურვებთ, გოგონებო!
სიყვარულით,
ნინო ჯიბლაძე
ჟურნალ OK!-ის მთავარი რედაქტორი
