LUR ორი მეგობრის და თანამშრომლის, პროფესიით ფინანსისტების, ნია კუჭუხიძისა და სალომე ნასარიძის სტარტაპია. პანდემიის დროს მეგობრებს გაუჩნდათ იდეა შეექმნათ ღამის სამოსის ბრენდი. ლური მომხმარებელს სთავაზობს მაღალი ხარისხის ქსოვილით შექმნილ დახვეწილ, ელეგანტურ, კომფორტულ და მრავალფეროვან ღამის სამოსს.
როგორია თქვენი სტარტაპის შექმნის ისტორია?
ორი წლის წინ, როდესაც პანდემია დაიწყო და ადამიანებს უმეტესი დროის გატარება სახლში მოუწიათ, სახლის სამოსიც უფრო აქტუალური გახდა, ამიტომაც გადავწყვიტეთ გაგვეკეთებინა ღამის სამოსის ბრენდი. გვინდოდა ქართულ ბაზარზე გამოჩენილიყო ძვირფასი ქართული ბრენდი, რომელიც არ ჩამოუვარდებოდა ხარისხით საერთაშორისო ბრენდებს. უშუალოდ კომპანია დაარსდა 2021 წლის ოქტომბრის თვეში, ხოლო სოციალურ ქსელებში გამოვჩნდით დეკემბრის დასაწყისში.
როგორ ქსოვილს იყენებთ?
ბევრი კონსულტაცია გავიარეთ ქსოვილებთან დაკავშირებით, რადგან გვინდოდა ყოფილიყო ყველაზე ხარისხიანი პროდუქტი. საბოლოო არჩევანი აბრეშუმზე შევაჩერეთ და შესაბამისად ჩვენი ძირითადი ხაზი არის სხვადასხვა ტიპის მაღალი ხარისხის ნატურალური აბრეშუმი. ჩვენთვის მნიშვნელოვანია ჩვენ მომხმარებლებს ძილის დროს ეცვათ ნატურალური ქსოვილისგან შეკერილი საღამური, რაც თავის მხრივ უზრუნველყოფს ადამიანის ჯანმრთელობას, მშვიდ და სასიამოვნო ძილს.
როგორ იქმნება და როგორი დიზაინი უფრო ჭარბობს თქვენს კოლექციაში?
სიტყვა „Lur“-ი თავის თავში მოიაზრებს მომხიბვლელობას, მიმზიდველობას. შესაბამისად, მისი მიზანია, მომხმარებლებს შეუქმნას კომფორტული, ხარისხიანი და ამასთანავე ელეგანტური სახლის სამოსი.
თითოეული ჩვენი საღამურის ესკიზი არის შექმნილი ჩვენ მიერ, ქსოვილი, ფერი, სტილი, დიზაინი, დეტალები და ა.შ. არის შერჩეული და მოფიქრებული ინდივიდუალურად ყოველი პროდუქტისთვის, რათა შეიქმნას საბოლოოდ მაქსიმალურად სრულყოფილი სახლის სამოსი. ზუსტად ამიტომაც, ბრენდის სლოგანიც შესაბამისი მოვიფიქრეთ „სრულყოფილების კვალდაკვალ“ („Following Perfection”). ჩვენი სურვილია, რომ ყოველთვის გვქონდეს განსხვავებული სტილი, რათა მომხმარებლებს ჰქონდეთ უფრო მრავალფეროვანი არჩევანი.
რატომ ლური?
როდესაც გადავწყვიტეთ რომ საღამურების ბრენდი შეგვექმნა, თავიდანვე ვთქვით რომ გვინდოდა ყოფილიყი დახვეწილი და ელეგანტური. სახელი Lure – ნიშნავს მომხიბვლელსა და მიმზიდველს, სწორედ ამ სახელის შესაბამისი შემოდგომა-ზამთრის კოლექციით შემოვედით ქართულ ბაზარზე. ლური მუდმივად ზრუნავს მომხმარებლების სურვულებზე, შესაბამისად ქმნის მაქსიმალურად ხარისხიან და დეტალებზე ორიენტირებულ სახლის სამოსს, რათა დააკმაყოფილოს ყველა მომხმარებლის მოთხოვნა.
სამომავლო გეგმები..
ჯერ-ჯერობით გვაქვს მხოლოდ ონლაინ მაღაზია, მიწოდება ხდება არა მარტო საქართველოს, არამედ მთელი მსოფლიოს მასშტაბით. ახლო მომავალში ვგეგმავთ საკუთარი ბრენდის მაღაზიის გახსნას.
იქიდან გამომდინარე, რომ კომპანია დაარსდა ოქტომბერში, ამჯერად აქცენტი გავაკეთეთ შემოდგომა-ზამთრის კოლექციაზე, თუმცა ძალიან ბევრი გეგმა გვაქვს სამომავლოდ. წარმოგიდგენთ, როგორც ამ ხაზს, ასევე სხვა რადიკალურად განსხვავებულ მიმართულებას. ამ ეტაპზე უკვე ვმუშაობთ შემდეგი კოლექციის ესკიზებზე და მალე ბევრი სასიამოვნო სიახლე ელოდება ჩვენს მომხმარებლებს. გვსურს ადგილის დამკვიდრება არა მარტო საქართველოს არამედ საერთაშორისო ბაზარზეც.
