ქართული ბრენდი „თანი“ მომხმარებელს სთავაზობს ძველი ტრადიციული ორნამენტების გათანამედროვებულ ვარიაციებს ტყავის აქსესუარების სახით. აქ წარმოდგენილი პროდუქცია გამოირჩევა დახვეწილი და ნებისმიერი გემოვნების მქონე ადამიანზე მორგებული სტილით. „თანი“ ღირსეულ მეგზურობას გაგიწევთ ქვეყნის გარეთაც და წარმოაჩენს ქართული ხელოვნების ძირითად ფასეულობებს. დეტალური ინფორმაციისთვის OK! გაესაუბრა „თანის“ დამფუძნებელს, თამუნა დურგლიშვილს.
გვიამბეთ „თანის“ შექმნის ისტორია.
ბავშვობიდან გატაცებული ვიყავი ქარგვით, ვამზადებდი პატარ-პატარა აქსესუარებს და ნელ-ნელა, დროთა განმავლობაში გადავედი ტყავზე. როდესაც ჩემი ხელით პირველად შევქმენი ჩანთა, გადავწყვიტე აღნიშნული ჰობი საქმიანობად გარდამექმნა და შედარებით ფართო მასშტაბის გამეხადა. ბრენდი ოფიციალურად 2017 წელს შევქმენი, სადაც წარმოდგენილი იყო და არის ტყავის აქსესუარები და ჩანთები. რაც შეეხება სახელს, მის ინსპირაციას ანბანი წარმოადგენს, ვინაიდან ჩემ მიერ დამზადებული აქსესუარები ქართული ნაქარგებით არის გაფორმებული.
გვესაუბრეთ თქვენთან წარმოდგენილი პროდუქციის შესახებ.
აღსანიშნავია ის ფაქტი, რომ ჩვენთან წარმოდგენილი პროდუქცია ძალიან მრავალფეროვანია. „თანში“ წარმოდგენილია ჩანთები, ყველა სახის აქსესუარი. ისეთები, როგორებიც არის ქამრები, საფულეები, სამაჯურები, ბაფთები და კიდევ მრავალი სხვა. ახლა უკვე ფეხსაცმელზე მუშაობაც დავიწყე ჩემს მეუღლესთან ერთად, რითაც ნელ-ნელა გავაფართოვებ ბრენდს.
მთავარი ნიშა, რომელიც თქვენს პროდუქციას გამოარჩევს…
ჩვენს პროდუქციას გამოარჩევს ის ძველი ორნამენტები, რომლებსაც ახლებურად გადმოვცემთ და ვაწვდით მომხმარებლებს ტყავის სახით. აგრეთვე უნდა აღინიშნოს, რომ თითოეული აქსესუარი გამოირჩევა მაღალი ხარისხით და დამუშავების ტექნიკით.
სად არის „თანის“ პროდუქციის შეძენა შესაძლებელი?
ჯერჯერობით, ჩვენი პროდუქციის შეძენა შესაძლებელია ონლაინ, Facebook-გვერდის საშუალებით. სულ მალე კი მომხმარებელს შევთავაზებთ „თანის“ ოფიციალურ ვებგვერდსაც.
რა სახის სირთულე ახლდა ბრენდის შექმნას?
ერთადერთ სირთულეს წარმოადგენდა ის, რომ სხვა პროფესიის ვიყავი და არ მქონდა განათლება მიღებული ამ მიმართულებით. თუმცა თვითნასწავლი გახლდით და ვფლობდი იმ ზუსტ ხედვას, რომელმაც მიბიძგა, შემექმნა საკუთარი ბრენდი და საზოგადოებისთვის წარმედგინა.
სამომავლო გეგმები…
ძალიან დიდი სურვილი მაქვს, გავხსნა ჩემი სახელოსნო, რომელიც სალონის ტიპის იქნება და დაიტვირთება ინფორმაციული თვალსაზრისითაც. ამის შემდეგ კი, ვფიქრობ დამხმარეების დამატებას და ვინაიდან მაისურებსა და ქურთუკებზეც ვმუშაობ, ვაპირებ „თანის“ პროდუქციას ესეც შევმატო.
საკონტაქტო ინფორმაცია:
Facebook: Tani • თანი
