თუკი ქუთაისში, გალაკტიონ ტაბიძის ქუჩაზე ჩაივლით, №51 -ში აუცილებლად შეამჩნევთ გამორჩეულ და მიმზიდველ შენობას, დღეს ის კულტურული მემკვიდრეობის ძეგლთა ნუსხაშია. მე-19 საუკუნის მიწურული – ამ თარიღიდან იწყება შენობის ისტორია, რომელშიც უკვე 9 წელია სასტუმრო „არგო“ ფუნქციონირებს. ხაზგასმით შეიძლება ითქვას, რომ იდეალურად არის შენარჩუნებული ყველა ძველი დეტალი, ფერებიც კი. ახალი ნაწილიც იდეალურად ერწყმის ძველს. კედლების, ჭერის თუ ფასადის ხიბლი სწორედ მის სიძველესა და აღდგენილ იერსახეშია. ექსტერიერითა და ინტერიერით მოხიბლულ ადამიანებს სასტუმროს კონცეფციაც და სტუმარმასპინძლობაც აღაფრთოვანებთ, ამიტომ „არგოში“ ერთხელ სტუმრობა საკმარისი არასდროსაა. ჟურნალი „OK! ქუთაისი“ „არგოს“ მენეჯერს, ნათია კახიანს ესაუბრა, რომელიც სასტუმროსთან დაკავშირებულ ბევრ საინტერესო დეტალს გვიმხელს.
ნათია, უპირველესად, გაგვაცანით სასტუმრო „არგო“. რამდენი ხანია, რაც ქუთაისის ბაზარზე გამოჩნდა?
„არგო“ 2015 წლის ნოემბერში გაიხსნა და კოვიდ-19-მდე წარმატებით ფუნქციონირებდა. პანდემიის შემდეგ სასტუმრომ 2023 წლის ივნისში განაახლა მუშაობა და ჩვენთვის წელს უკვე პირველი სრული სეზონია.
რა არის „არგოს“ კონცეფცია? რა გამოარჩევს სასტუმროს?
სტატუსიდან და, რა თქმა უნდა, მატერიალური ბაზიდან გამომდინარე, ჩავთვალეთ, რომ „არგოს“ სახით ქალაქს გაცილებით უფრო საინტერესო და ფუნქციური ობიექტი შეიძლება ჰქონოდა, ვიდრე მხოლოდ ღამისთევის ობიექტია. ამიტომ დღეს სასტუმრო „არგო“ არის ადგილი, სადაც კარგი სტუმარმასპინძლობის გარდა, წარმოდგენილია თანამედროვე მხატვართა ნამუშევრები. მუდმივად ტარდება სხვადასხვა სახის პრეზენტაცია, აპრილში სასტუმრომ რიგით მეორე გამოფენას უმასპინძლა. განსაკუთრებული პატივით მინდა აღვნიშნო, რომ დედაენის დღესთან დაკავშირებით ქალბატონ ნინო ჩაკვეტაძის პერსონალურ გამოფენას ვუმასპინძლეთ.
„არგო“ გახლავთ „სამოქალაქო თეატრის“ დაბადების ადგილი. გვახარებს, რომ გარკვეული წვლილი შეგვიძლია შევიტანოთ ჩვენი საამაყო თანაქალაქელების წამოწყებაში და გვერდით დავუდგეთ მათ. პირველი, საკმაოდ წარმატებული პრემიერა ოქტომბერში გაიმართა. შემდგომი პერფომანსისა და სპექტაკლისთვის მზადება მიმდინარეობს. ასევე სიამაყით მინდა ვთქვა, რომ „არგო“ გახლავთ ახალდაარსებული პრემიის „თავისუფალი“ რეგიონული პარტნიორი.
მოვიპოვეთ ევროკავშირის მიერ დაფინანსებული პროექტით დოკუმენტური ფილმების ჩვენების ოფიციალური უფლება. 8 მარტს, ფონდ „სოხუმთან“, „ჩაიხანასა“ და kinedoc-თან ერთად გავმართეთ „ანას პროცესის“ ჩვენება. ვემზადებით შემდეგი ჩვენებისთვის.
Boutique Hotel Argo – რატომ ეს სახელწოდება? ასევე, გვიამბეთ გარემოსა და გუნდზე, რომელიც ადგილზე მოსულ სტუმრებს ხვდებათ.
„არგოს“ უკავშირდება მსოფლიოში ყველაზე ცნობილი მოგზაურობის ისტორია…
„არგოს“ გუნდი ერთი დიდი ოჯახია, ერთმანეთის გვერდით მდგომი. ჩვენ ყველას ერთი მიზანი და საზრუნავი გვაქვს, სტუმარს შევუქმნათ მაქსიმალური კომფორტი, პირობა და განწყობა, რომ აქ კვლავ დაბრუნების სურვილი გაუჩნდეს.
რას სთავაზობთ მომხმარებლებს და რა ხიბლავთ მათ ყველაზე მეტად?
ყველაზე მეტად რაც სტუმარს ხიბლავს, შენარჩუნებული ავთენტური გარემოა, სადაც ქალაქის ესთეტიკა, კულტურა, გემოვნება და ისტორია იკითხება.
რამდენი და რა ტიპის ნომრებისგან შედგება სასტუმრო?
სასტუმროს 23 ნომერი აქვს ამ ეტაპზე, სტანდარტული ნომრები, ლუქსი და ნახევრად ლუქსი. ასევე 100 სტუმარზე გათვლილი საკონფერენციო დარბაზი, შეხვედრების ოთახი.
როგორ შეაჯამებდით 2023 წელს? რა სიახლეები შესთავაზეთ საზოგადოებას?
2023 წელი იყო ჩვენთვის განახლების და თავიდან ფეხის ადგმის წელი. სიახლე გახლდათ სასტუმროს კონცეფცია, რომელზეც ზემოთ ვისაუბრეთ.
როგორც ვიცით, ბევრი საინტერესო სამომავლო გეგმა გაქვთ. გაგვიმხილეთ…
სამომავლო გეგმები, რა თქმა უნდა, გვაქვს როგორც მატერიალური ბაზის, ასევე მომსახურების გაზრდის მიმართულებით. თანამშრომლობა შევთავაზეთ რამდენიმე კომპანიას, რომლებიც სიამოვნებით დაგვთანხმდნენ წინადადებაზე. სასტუმროს სახელიდან გამომდინარე, მიზანი გვაქვს, „არგოდან“ დაიწყოს ყველაზე შთამბეჭდავი მოგზაურობა, როგორც ადგილობრივი, ასევე უცხო ქვეყნის სტუმრებისათვის.
ტექსტი: მარიამ ირემაძე
ფოტო: ლანა ვახტანგაძე
