რუბრიკა OKმენეჯერის! სტუმარია მარკეტერი და მოყვარული მოგზაური გიორგი ცუცქირიძე. 15 წელია ამ სფეროში მოღვაწეობს და ამ წლების მანძილზე საკმაოდ დიდი გამოცდილება დააგროვა. როგორც თავად აღნიშნავს განვლილი წლები, იყო უამრავი საინტერესო გამოწვევითა და წარმატებით სავსე. ბევრი რომ არ გავაგრძელოთ გთავაზობთ ინტერვიუს, სადაც უკეთ გაიცნობთ ჩვენი რუბრიკის რესპოდენტს.
გიორგი, უპირველესად გაგვეცანით.
გამარჯობა, მე ვარ გიორგი ცუცქირიძე, მარკეტერი და მოყვარული მოგზაური. მყავს მეუღლე და ვარ ორი შვილის მამა.
მიყვარს ჩემი პროფესია, განსაკუთრებით, შემოქმედებითი პროცესი, რომელიც ჩვენი სფეროს ყველაზე საინტერესო და სახალისო ნაწილია. სწორედ ამიტომ, ავირჩიე მარკეტინგი.
ზოგადად, მიტაცებს ყველაფერი, რაც შემოქმედებას მოითხოვს: მუსიკა, ფილმები, ფოტოგრაფია ან უბრალო ხელსაქმე, რაიმე ახლის შექმნა და ძველის შეკეთება.
გვიამბეთ თქვენი გამოცდილების შესახებ.
15 წელია მარკეტინგის სფეროში ვარ და ამ წლების მანძილზე საკმაოდ დიდი გამოცდილება დავაგროვე. ჩვენი სფერო იმდენად სწრაფად იცვლება და ვითარდება, რომ მიუხედავად დიდი გამოცდილებისა, ყოველდღიურად, ვხვდები უამრავ სიახლეს, რაც უფრო საინტერესოს ხდის საქმიანობას.
განვლილი წლები კი, იყო უამრავი საინტერესო გამოწვევით და წარმატებით სავსე. მახსოვს ყველა ბრენდინგი თუ რებრენდინგი, სარეკლამო კამპანიები და პროექტები, რაც ამ პერიოდში განმიხორციელებია კოლეგებთან ერთად. ყველა პროექტს აქვს დასაწყისი და დასასრული, თუმცა, არა ადამიანებს, და ყველაზე დიდი გამოცდილებაც, სწორედ ამ დროის მანძილზე შეძენილი ადამიანები და ურთიერთობებია.
რა გზა გაიარეთ დღევანდელ დღემდე კარიერული თვალსაზრისით?
2007 წელს, ჯერ კიდევ სტუდენტობისას, დავიწყე სტაჟირება ალდაგის მარკეტინგის განყოფილებაში და იქ მივხვდი, რომ მარკეტინგი სწორი არჩევანი იყო. ალდაგში ყოველთვის ხვდებოდნენ მარკეტინგის მნიშვნელობას და მხარდაჭერაც საკმარისი გვქონდა, რომ კარგი პროექტები გვეკეთებინა. სტაჟირების შემდეგ, გავხდი გუნდის სრულფასოვანი წევრი და უამრავი წლის განმავლობაში გაგრძელდა ჩვენი მეგობრობა.
ალდაგში 12 წელი გავატარე, რაც ყველაზე დიდი გამოცდილება იყო ჩემთვის. ამ პერიოდში, გვქონდა ბევრი საინტერესო პროექტი, შევხვდი უამრავ კარგ ადამიანს, ვისთანაც დღემდე ვმეგობრობ და ვთანამშრომლობ.
2018 წელს, შევუერთდი სმარტის გუნდს, სადაც მარკეტინგის ძალიან კარგ გუნდთან ერთად, რამდენიმე საინტერესო პროექტის განხორციელების საშუალება მქონდა.
2019 წლიდან კი, ემბისისთან ერთად, დაიწყო ახალი ეტაპი ჩემ კარიერაში. სამწუხაროდ, სწორედ ამ პერიოდს დაემთხვა კოვიდ პანდემია და ლოქდაუნი, რაც ყველასთვის შემაფერხებელ ბარიერად იქცა.
2021 წლიდან, ვარ ლენდმარკ-ჯორჯიას მარკეტინგის მენეჯერი. კომპანიის საქმიანობა, საქართველოში უცხოური ფრენჩაიზების ოფიციალურად შემოყვანაა.
ამ ეტაპზე რა წარმოადგენს თქვენს ძირითად საქმიანობას?
დღეს წარმოვადგენ კომპანია ლენდმარკ-ჯორჯიას, რომელიც 2017 წელს დაარსდა. ჩვენი კომპანია საცალო და F&B სექტორში ცდილობს გზის გაკვლევას. აქტიური ბიზნეს საქმიანობა 2020 წელს, პანდემიის დროს დავიწყეთ. ქვეყანაში, ჩვენი პირველი პარტნიორი, პორტუგალიური პრემიუმ ხარისხის ბრენდი – Sacoor Brothers-ია. 2 მაღაზია უკვე გავხსენით და ამ ეტაპზე, მე-3 ლოკაციის დამატებაზე ვმუშაობთ.
ძალიან მალე, ჩვენს პორტფელს ახალი ბრენდი შეემატება, რომლის მაღაზიის გახსნაც მომავალი წლის პირველ ნახევარშია დაგეგმილი. ასევე, ვაწარმოებთ მოლაპარაკებას რამოდენიმე ტოპ ბრენდთან და იმედი გვაქვს, რომ მათაც მალე ვიხილავთ ჩვენს ქვეყანაში.
რა არის თქვენი მთავარი მოტივატორი?
მთავარი მოტივატორი ჩემი ოჯახია. მეუღლე და შვილები რომლებიც ყოველდღე, ძალიან დიდ ენერგიას მაძლევენ. როცა მათგან დიდ მხარდაჭერას გრძნობ, ყველაფერი უფრო მარტივი ხდება.
ასევე, მნიშვნელოვანია ის ხალხი, ვისთანაც ყოველდღიურად გაქვს ურთიერთობა. მეგობრული და პოზიტიური სამუშაო გარემო, ყოველდღიურ რუტინასა და სტრესს მნიშვნელოვნად ამარტივებს, რაც თავისთავად, გინარჩუნებს საქმის კეთების მოტივაციას
და ბოლოს… სად ხედავთ საკუთარ თავს 10 წლის შემდეგ?
რთულია იფიქრო, 10 წლის შემდეგ რა გველის, განსაკუთრებით ახლა, ასეთ არასტაბილურ პერიოდში. 3 წლის წინ ალბათ უფრო მეტს და თავისუფლად ვფიქრობდით მომავალზე. დღეს კი, მომავალზე ფიქრისას, ისეთი ფაქტორების გათვალისწინება გვიწევს, როგორიც პანდემიის შედეგები და რეგიონში ომია.
თუმცა, მიუხედავად ყველაფრისა, ჩემთვის, ყოველთვის მნიშვნელოვანი იყო ხალხი და ის საქმე რასაც ვაკეთებ. 10 წლის შემდეგაც, ჩემს თავს საინტერესო ადამიანების გარემოცვაში ვხედავ, მეტი გამოცდილებით, უფრო დიდი გამოწვევებითა და საინტერესო საქმით.
