იმისათვის, რომ თქვენთვის მნიშვნელოვანი დღე იყოს დაუვიწყარი, გემოვნებით და უნაკლოდ გაფორმებული, საჭიროა იპოვოთ ისეთი ადამიანი, რომელსაც ბოლომდე ენდობით და რომელიც ამ ყველაფერს დაგიგეგმავთ. ედემ გვარმიანი უკვე 25 წელია ამ სფეროშია და მის სახელს უკავშირდება არაერთი ცნობილი ქორწილი თუ ღონისძიება. თამამად შეიძლება ითქვას, რომ ის ასოცირდება გემოვნებასთან და ხარისხთან. თუ რა ევალება ქორწილის ორგანიზატორს და რომელი ყვავილია ამ სეზონზე ყველაზე მოთხოვნადი, ამის შესახებ ედემ გვარმიანი ჟურნალ OK!-ის ესაუბრა.
პროფესიით ფლორისტ-დიზაინერი ბრძანდებით. რატომ აირჩიეთ ეს პროფესია და რამდენად მოთხოვნადია დღეს საქართველოში?
დაახლოებით 25 წლის წინ, როდესაც პროფესიას ვირჩევდი, ამ სფეროზე მოთხოვნა ნაკლებად იყო, ახლა კი პირიქით, საოცრად პოპულარული გახდა ფლორისტ-დიზაინერის საქმე, ძალიან გაიზარდა მოთხოვნა ღონისძიებების ორგანიზატორზე.
ვხატავდი და ყოველთვის მიტაცებდა დიზაინერობა, ასევე ძალიან მიყვარდა ყვავილები და მისგან სხვადასხვა კომპოზიციის შექმნა. იმპროვიზაციის ნაკლებობას არასოდეს ვუჩიოდი და ასე მოხდა ჩემი დაინტერესება ამ სფეროთი.
რა არის თქვენი მთავარი ხელწერა?
უპირველესად, გემოვნება. ვცდილობ ჩემს შექმნილ კომპოზიციებში იგრძნობოდეს თავისუფლება, ინდივიდუალური ხასიათი. რა თქმა უნდა, ჯერ ვითვალისწინებ მომხმარებლის სურვილს და შემდეგ ვთავაზობ ჩემი გემოვნებითაც. ასევე, ვცდილობ არ ჩამოვრჩე ტენდენციებს. ამ სფეროში მთავარია, მომხმარებელს შესთავაზო მუდმივად ახალი იდეები. მაქვს მიზანი, რომ ჩემ მიერ ორგანიზებული ღონისძიებები ერთმანეთს არ ჰგავდეს. წინას უნდა სჯობდეს, ანუ ვცდილობ ყოველ ჯერზე საკუთარ თავს ვაჯობო.
გვესაუბრეთ Lux Flowers • ყვავილების სალონის შესახებ. რა იყო შექმნის იდეა?
პანდემიის პერიოდში, როდესაც მოქმედებდა შეზღუდვები, თითქმის არ ტარდებოდა ქორწილები და მასშტაბური ღონისძიებები, გადავწყვიტე შემექმნა ყვავილების სალონი და ჩემი შექმნილი ყვავილების კომპოზიციები შემეთავაზებინა მომხმარებლისთვის, რასაც საზოგადოების დიდი მოწონება მოჰყვა. პანდემიის დასრულების შემდეგ კი უფრო მეტი ფუნქცია შევძინეთ აღნიშნულ სალონს. ეს არის სივრცე, სადაც პროფესიონალი დიზაინერები და ფლორისტები დაგეხმარებიან ქორწილის ორგანიზებაში − იქნება ეს ლოკაციის შერჩევა, საკუთარი გემოვნებით თაიგულის შექმნა, მაგიდის თუ მანქანის გაფორმება და სხვ. ყველა ეს ნიუანსი ქორწილის ორგანიზატორმა უნდა მოაგვაროს. სწორედ ამიტომაა საკმაოდ შრომატევადი და საპასუხისმგებლო პროფესია.
ამ სფეროში, გემოვნებასთან ერთად, რომელი თვისებაა მთავარი?
მუდმივი განვითარება, საკუთარ თავზე მუშაობა. მაქვს ამბიცია, რომ ამ სფეროში საქართველო იყოს მოწინავე პოზიციებზე და არ ჩამორჩებოდეს მეზობელ ქვეყნებს.
ამ სეზონზე რომელი ყვავილია ყველაზე აქტუალური?
ამ სეზონზე ყველაზე მოთხოვნადია მინდვრის ყვავილები, თუმცა პიონები და ტიტები მაინც რჩება ქართველების საყვარელ ყვავილებად.
სამომავლო გეგმები…
ამჟამად ჩემი სამომავლო გეგმები უკავშირდება Lux Flowers • ყვავილების სალონს. მინდა ბევრი საინტერესო იდეა შევთავაზო საკუთარ მომხმარებელს და ჩემი სალონი ასოცირდებოდეს ხარისხთან და ინოვაციურ იდეებთან.
ტექსტი: სოფიო მალანია
ფოტო: ალექსეი სეროვი
