რა გვაძლევს ყველაზე დიდ მოტივაციას სწავლაში? ალბათ რწმენა საკუთარი შესაძლებლობების და ის ადამიანები, რომლებიც ჩვენ გვერდით არიან და სჯერათ ჩვენი. სწორედ ასეთი ადამიანი გვინდა დღეს გაგაცნოთ – ფილოლოგიის მეცნიერებათა დოქტორი, „განათლების აკადემია TSG“-ის ერთ-ერთი დამფუძნებელი და ხელმძღვანელი, სოფო ფეტელავა. მისთვის ეს საქმე მხოლოდ პროფესია არაა, ეს არის გზა, რომლითაც ადამიანებს განვითარებაში ეხმარება. პატარა გუნდით დაწყებული დიდი მისია, მრავალი მოსწავლის წარმატება, ეს ყველაფერი სოფოს ამბის ნაწილია. მისთვის სწავლება თანაბრად ნიშნავს როგორც აკადემიურ წარმატებას, ისე ადამიანურ განვითარებას, შრომის სიყვარულს და რწმენას, რომ სწორ გარემოში და მხარდაჭერით თითოეულ ჩვენგანს შეუძლია ოცნების რეალობად გადაქცევა.
სოფო, უპირველესად, მოუყევით ჩვენს მკითხველს თქვენ შესახებ…
მე გახლავართ „განათლების აკადემია TSG“-ის ერთ-ერთი დამფუძნებელი და ხელმძღვანელი. პროფესიით ინგლისური ენის სპეციალისტი – საქართველოს ტექნიკურ უნივერსიტეტში ვკითხულობ ლექციებს. 30 წლის ასაკში დავიცავი დისერტაცია, გახლავართ ფილოლოგიის მეცნიერებათა დოქტორი. დღეს, მე თუკი რამეს წარმოვადგენ, ეს ჩემი ოჯახის და მშობლების დამსახურებაა, რომლებიც მუდმივად სწავლაზე და განათლების მიღებაზე იყვნენ ორიენტირებულნი. მეც და ჩემს და-ძმასაც ყოველთვის გვაძლევდნენ იმის საშუალებას, რომ ჩვენი ცხოვრების პრიორიტეტად განათლება გვექცია. მყავს მეუღლე ამბროსი აბუთიძე და ერთი შვილი – ანდრია აბუთიძე.
რატომ გადაწყვიტეთ „განათლების აკადემია TSG“-ის შექმნა? რა იყო მიზანი?
„განათლების აკადემია TSG“-ის შექმნის იდეაც სწორედ ჩემს ოჯახს, კერძოდ კი ჩემს და-ძმას უკავშირდება. გვინდოდა შეგვექმნა ისეთი სასწავლო სივრცე, სადაც თითოეული მოსწავლე იგრძნობდა, რომ მისი მიზანი მიღწევადი და ასრულებადია. ძალიან მალე ჩვენი სურვილი რეალობად ვაქციეთ.
„განათლების აკადემია TSG“ 2018 წლიდან ფუნქციონირებს, თავდაპირველად ცენტრში მხოლოდ რამდენიმე მოსწავლე გვყავდა, მაგრამ ნელ-ნელა გაიზარდა – ალბათ იმიტომ, რომ საზოგადოებამ დაინახა ის პროფესიონალიზმი, ენერგია და სითბო, რაც ჩვენს გუნდს გამოარჩევს. დღეს ჩვენი ცენტრი ერთიანდება საერთო იდეის გარშემო: სწავლა ნებისმიერი ასაკის მსურველისთვის უნდა იყო სიამოვნება და ინსპირაციის წყარო და არა სტრესი. წარმატება ნამდვილად არ მოდის სწრაფად, მის უკან დიდი შრომა და ძალისხმევა დევს, თუმცა თუკი გაქვს მიზანი და ნამდვილად იცი, რისი გაკეთება გსურს, შედეგს აუცილებლად მოიმკი. დღესდღეობით სწავლება ჩემი ცხოვრების ერთ-ერთი ყველაზე დიდი მოწოდებაა – შესაძლებლობა, შევეხო ადამიანების განვითარებას და მათში გავაღვივო საკუთარი ძალების მიმართ რწმენა.
რა კურსებს სთავაზობთ თქვენთან მოსულ ადამიანებს?
„განათლების აკადემია TSG“-ში ინგლისური და გერმანული ენების შესწავლა ყველასთვის ხელმისაწვდომია – დაწყებული დაწყებითი კლასების მოსწავლეებიდან, დამთავრებული აბიტურიენტებითა და ზრდასრულებით, რომლებიც კარიერულ განვითარებასა და საერთაშორისო გამოცდების ჩაბარებას ისახავენ მიზნად.
რა გამოგარჩევთ ბაზარზე არსებული სხვა ცენტრებისგან?
ჩვენს ცენტრში თითოეული მოსწავლე ინდივიდუალურად ფასდება – ვეძებთ მის ძლიერ მხარეებს და ვეხმარებით საკუთარი შესაძლებლობების აღმოჩენასა და რწმენის გაღვივებაში.
ვცდილობთ, თითოეულ მოსწავლეს დავეხმაროთ, იპოვოს თავისი სტილი და გზა ცოდნისკენ. სწორედ ამიტომ ჩვენს ცენტრში მთავარი არის არა მხოლოდ შედეგი, არამედ ის გზა, რომელსაც მოსწავლე გადის სწავლის პროცესში, რათა მეტად თავდაჯერებულ, დამოუკიდებელ და მოტივირებულ პიროვნებად ჩამოყალიბდეს.
ჩვენთვის სწავლება მხოლოდ პროფესია არაა – ეს არის გზა, რომლითაც ვეხებით ადამიანის ცხოვრებას და ვეხმარებით მას ახალი შესაძლებლობების აღმოჩენაში. მჯერა, რომ სწორი მიდგომა და ინდივიდუალური ყურადღება მოსწავლეს საკუთარ შესაძლებლობებს აჯერებს და მეტ რწმენას აძლევს.
რა გაძლევთ მოტივაციას?
ჩემთვის ყველაზე დიდი მოტივაციაა, როდესაც ჩემი და ჩემი გუნდის წევრების შრომის შედეგად მიღებულ შედეგს ვხედავ – მოსწავლეები, რომლებიც ნაბიჯ-ნაბიჯ იზრდებიან, იძენენ ცოდნას და ახერხებენ მიზნის მიღწევას. უდიდესი წარმატებაა, როდესაც ვხედავ, დაწყებითი კლასის ბავშვები როგორი სიამოვნებით მოდიან ჩვენს ცენტრში და განიცდიან სიხარულს, როდესაც თავიანთ თავში აღმოაჩენენ უცხო ენის შესწავლის უნარს. თითოეული მოსწავლის ან მშობლის გულწრფელი მადლობა ყველაზე დიდი გამარჯვებაა.
სამომავლო გეგმები
ჩემი მიზანი მხოლოდ დღევანდელი წარმატება არაა – ჩვენ მუდმივად ვცდილობთ განვითარებას და ახალი იდეების განხორციელებას. სამომავლოდ ვგეგმავთ სწავლების ფორმატების კიდევ უფრო გამრავალფეროვნებას, რათა თითოეულ ჩვენთან მოსულ მოსწავლეს შევთავაზოთ მის საჭიროებებზე მორგებული პროგრამა. ჩემი მიზანია ისეთი სასწავლო სივრცის და გარემოს შექმნა, სადაც ცოდნის მიღება არა მხოლოდ აუცილებლობა, არამედ სიამოვნებაა. მჯერა, რომ წინ ბევრი ახალი ნაბიჯი გველის – მეტი გამოცდილება, ბევრი წარმატებული დღე და, რაც მთავარია, კმაყოფილი მოსწავლეები.
ტექსტი: სოფიო მალანია
ფოტო: ალექსეი სეროვი
