#OK! თანამედროვე სილამაზის ფორმულა

ყველა ქალის სურვილია გამოიყურებოდეს ლამაზად და ამაში ნაკლები დრო და რესურსი დახარჯოს. პერმანენტული მაკიაჟი გვაძლევს საშუალებას, რომ ნებისმიერ დროს უბადლოდ გამოვიყურებოდეთ. 6D-მიკრობლეიდინგი − ასე ჰქვია პროცედურას, რომელიც გვეხმარება შევცვალოთ ჩვენთვის არასასურველი წარბის ფორმა, გავასწოროთ ასიმეტრია და გვქონდეს ისეთი წარბი, რომელიც ჩვენს სახეს უფრო მოუხდება. რა უნდა ვიცოდეთ, თუ მიკრობლეიდინგის გაკეთებას გადავწყვეტთ და რას უნდა მივაქციოთ ყურადღება? − უფრო დეტალური ინფორმაციის მისაღებად ჟურნალი OK! მიკრობლეიდინგის სპეციალისტსა და ტრენერს, ნინო ახობაძეს ესაუბრა.

ქალბატონო ნინო, თქვენ გაქვთ ესთეტიკის კაბინეტი microblanding-geo-tb. როგორ მოხვედით ამ ეტაპამდე?

როცა ვირჩევდი პროფესიას, რა შემესწავლა, ჩემთვის მნიშვნელოვანი იყო საკუთარი თავის რეალიზება მომეხდინა და თვითდასაქმებული ვყოფილიყავი. საქართველოს ნაკრების ფრენბურთელობიდან მიკრობლეიდინგის სპეციალობამდე საკმაოდ გრძელი და რთული გზა გავიარე. 2019 წელს შევისწავლე კურსი 6D-მიკრობლეიდინგი, უცხოელ ტრენერთან. იმ დროს საქართველოში ასეთი აქტიური არ იყო ეს კონკრეტული მიმდინარეობა. არცერთი წუთით არ შემიჩერებია საკუთარი თავის განვითარება, ვესწრებოდი სხვადასხვა ონლაინკონფერენციას, ვიყავი მიწვეული დუბაიში, როგორც ერთ-ერთი სპეციალისტი, და ამ გამოცდილებებით შემიძლია ვთქვა, რომ დღეს ჩემს კაბინეტში მოსულმა პაციენტმა უკვე იცის, რომ მე ვარ ხარისხსა და ბუნებრიობაზე ორიენტირებული.

რას ნიშნავს წარბის 6D-მიკრობლეიდინგი და რამდენ ხანს ნარჩუნდება ეფექტი?

წარბის 6D-მიკრობლეიდინგი დღეს ერთ-ერთი ყველაზე მოთხოვნადი პროცედურაა. microblanding-geo-tb გთავაზობთ 6D-მიკრობლეიდინგს. ამ პროცედურის დროს ორიენტირება ხდება სახის ოვალის შესაფერის წარბის ფორმაზე, შემდეგ კი ტექნიკის არჩევა ინდივიდუალურად ხდება. მიკრობლეიდინგით შესრულებული წარბი ნატურალური წარბის 100%-იანი იმიტაციაა. ეს პროცედურა მოითხოვს გაცილებით ნაკლებ დროს − საშუალოდ 40 წუთი-1 საათი გრძელდება. ამ პროცედურის შემდეგ არ იცვლის ფერს და აქვს ხანგრძლივი ეფექტი. რაც ყველაზე მნიშვნელოვანია, პროცედურის შემდეგ არ ტოვებს იარებს კანზე. პროცედურა ტარდება მექანიკური აპარატით − მიკრო თმის პიგმენტაცია. პიგმენტს ვარჩევთ ინდივიდუალურად, კანის ტიპისა და თმის ფერის შესაბამისად. რა თქმა უნდა, ვითვალისწინებთ პაციენტის სურვილსაც.

რაც შეეხება ეფექტის ხანგრძლივობას, ეს ძალიან ინდივიდუალურია: მინიმალური დრო წელიწადია, ხოლო მაქსიმალური − 2 წელი.

რამდენი პროცედურაა საჭირო სასურველი შედეგის მისაღებად? რამდენად მტკივნეული პროცედურაა?

პირველი პროცედურის ჩატარების შემდეგ 24-40 დღის განმავლობაში უნდა მოხდეს განმეორებითი კორექცია, რათა გავამყაროთ ფერი და იყოს უფრო მდგრადი. პროცედურა ადგილობრივი ანესთეზიით კეთდება და პროცესში ვუმატებთ განმეორებით ანესთეზიას. შესაბამისად, არის სრულიად უმტკივნეულო. პროცედურა მიმდინარეობს უსისხლოდ, როგორც წესი, 40 წუთიდან 1.10 წუთამდე.

რამდენად ხარისხიანი და უსაფრთხოა მასალა, რომლითაც მუშაობთ?

ძირითადად, რუსული და ამერიკული სერტიფიცირებული პიგმენტებით ვმუშაობთ. უნიკალურია იმ მხრივ, რომ აქვს ნატურალური ფერის ტონები. პიგმენტები ბუნებრივ მინერალებზეა დამზადებული, რომელიც ანტიალერგიულია.

რა შემთხვევაში არ უნდა გაიკეთოს ადამიანმა 6D-მიკრობლეიდინგი და რა სახის გვერდითი მოვლენები აქვს ამ პროცედურას?

არ შეიძლება კანის სხვადასხვა დაავადების დროს, მათ შორის აკნეს მკურნალობის პროცესშიც. შაქრიანი დიაბეტის მქონე ადამიანებისთვის, ორსულობისა და ლაქტაციის დროს. ზოგადად, მე რეკომენდაციას ვაძლევ ადამიანებს, რომელთაც აქვთ ნორმალური კანის ტიპი. რაც შეეხება გვერდით მოვლენებს, რაიმე სახის განსაკუთრებული უკუჩვენება არ გააჩნია. შედეგი პროცესის დასრულებისთანავე ჩანს, თუმცა აღსანიშნავია, რომ რეგენერაციის პროცესი 24 დღის განმავლობაში მიმდინარეობს და შესაძლოა გარკვეული რაოდენობის თმა გაქრეს ან გაფერმკრთალდეს.

პოსტ-„კოვიდის“ შემდეგ ძალიან ბევრი ადამიანი უჩივის თმის ცვენას. თქვენ გაქვთ სკალპის ტრიქოპიგმენტაციის პროცედურა. გვესაუბრეთ ამ პროცედურის შესახებ. რა ხანგრძლივობის ეფექტი აქვს?

სკალპის ტრიქოპიგმენტაცია დღეს საკმაოდ მოთხოვნადი პროცედურაა. პაციენტს, რომელსაც აქვს თხელი თმა ან კონკრეტულ ადგილზე საერთოდ არ აქვს თმა, ჩვენ ვუტარებთ ამ პროცედურას. იგი ადგილობრივი ანესთეზიით კეთდება და იქ, სადაც ნაკლებია თმა, ვუმატებთ თმის მიკროპიგმენტაციას. ამ პროცედურას აქვს ვიზუალური ეფექტი, შესახედავად უფრო ლამაზია და აღარაა გაცვენილი თმა. შედეგი ნარჩუნდება 1-2 წლამდე.

ქალბატონო ნინო, გარდა იმისა, რომ ბრძანდებით 6D-მიკრობლეიდინგის სპეციალისტი, ასევე ხართ ტრენერიც. რა ეტაპებს გადის თქვენთან მოსული სტუდენტი?

სწავლების პროცესი ჩემთვის ძალიან საინტერესო და მნიშვნელოვანია. მე მეამაყება თითოეული ჩემი მოსწავლე. ისინი ძალიან წარმატებით საქმიანობენ უკვე როგორც საქართველოში, ასევე მის ფარგლებს გარეთ. ჩვენი შემსწავლელი კურსი სამი ეტაპისგან შედგება. უპირველესად, თეორიით ვიწყებთ, შემდეგ პრაქტიკას ხელოვნურ კანზე გადიან, წარბის არქიტექტურა და მთავარი ტექნიკა − 6D-მიკრობლეიდინგი. შემდეგი, მესამე ეტაპი უკვე დამოუკიდებელი პროცედურაა მოდელებზე, სადაც ამ პრაქტიკულ ცოდნას ამჟღავნებენ.