მას ბევრი იცნობს, ბევრსაც მის მიერ გაკეთებული სიკეთის შესახებ სმენია…
ეხმარება ყველას, თუ შეუძლია, ზოგს საქმით, ზოგსაც ტკბილი სიტყვით.
ქალბატონი ნანა სარიშვილი სიკეთის ელჩი და ფონდ „კეთილსოფლის“ სულისჩამდგმელია.
გურიაში, ლანჩხუთის რაიონის ერთ პატარა, მთაგორიან სოფელში დავიბადე… სადაც, თავის დროზე, თამარ მეფეს თავისი ამალით ჩამოუვლია და დამხვდურთა გამბედაობითა და სტუმართმოყვარეობით აღფრთოვანებულს, გულით კეთილი ხალხის სოფლისთვის „გ უ ლ ი ა ნ ი“ დაურქმევია…
იქ გავატარე ბავშვობა და ყრმობა, სოფელში, მეტად გავლენიან და შრომისმოყვარე ოჯახში. ჩემი მშობლების აღმზრდელობითი, ოჯახური ტაქტიკით, წიგნთან ერთად სიკეთის ანბანიც შევისწავლე. მოსწავლეობისა და სტუდენტობის წლები სხვისი დახმარებით ვიყავი დამუხტული. მაბედნიერებდა სხვებზე ზრუნვა და სიკეთის კეთება.
წლები არ იცდის, უნდა მიჰყვე ნაბიჯ-ნაბიჯ, უნდა გაიარო შუქ-ჩრდილიანი ფართო და ვიწრო გზები, საფეხურებივით გამოკვეთილი ტერასებით და ასაკში შესულს უკან მიხედვისა არ უნდა შეგეშინდეს… დიახ, გავიარე გასავლელი გზები, მოსწავლეობა, სტუდენტობა… ხელოვნებისა და პედაგოგის დიპლომიანმა შევქმენი ოჯახი, მყავს 2 შვილი და 5 შვილიშვილი, მართლმადიდებელი ქრისტიანები. სხვა ადამიანებზე ზრუნვა როდის დავიწყე, არ მახსენდება, რადგან ამას არ აქვს დასაწყისი… ეს გრძნობა ჩემი სულის თანმდევი და განუყოფელი ნაწილია. რაც შეეხება „სიკეთის სახლის“, „კეთილსოფლის“ მშენებლობას, წლებია ვაშენებთ კეთილი ადამიანებისა თუ მთავრობის დახმარებით.
დღეისთვის 4 სართულია აშენებული, დასრულების შემდეგ ოცამდე უბინაო პირს, გადაეცემა საცხოვრისი. მიზნამდე ბევრი აღარ არის დარჩენილი… მშენებლობის აქამდე მოყვანა, დიდი მონდომებისა და დაუღალავი შრომის, სპონსორთა მოძიების, საქველმოქმედო კონცერტებისა და კეთილგანწყობილი ადამიანების დამსახურებაა. დიდი მადლობა ყველას, სათითაოდ ჩამოთვლა გამიჭირდება, ვისაც კი ერთი აგურით შეუვსია მშენებარე კედლები, ვისაც შუამდგომლობის მისია უკისრია, ვისაც კი სიტყვითაც სტიმული მოუცია ჩემთვის…
მადლობა თქვენ, ამ ფონდით დაინტერესებისთვის. სიკეთე გადამდებია, უკვალოდ არაფერიჩაივლის, „კეთილსოფელი“ კი ქვეყნის სავიზიტო ბარათი იქნება, რადგან სხვებზე ზრუნვა, სიყვარული, დათმენა, ერთგულება, მეგობრობა გადაგვარჩენს.
