როგორც ჩვენი გარდერობი იცვლება ზამთარში, ჩვენი კანის მოვლის რუტინაც საჭიროებს კორექტირებას, რადგან ტემპერატურის ცვლილება ჩვენს კანზე მოქმედებს და შესაძლოა სხვადასხვა პრობლემა გამოიწვიოს, მაგალითად, კანის სიმშრალე, ქავილი, ეგზემა და სხვ.
აღსანიშნავია, რომ მიუხედავად ზამთრის სეზონისა, განსაკუთრებული ყურადღება სჭირდება მზის სხივებისგან დაცვას, რადგან ისინი ძალიან უარყოფითად მოქმედებს ჩვენს კანზე, რაც ნაადრევ დაბერებას იწვევს. თუ როგორი უნდა იყოს ჩვენი თავის მოვლის რუტინა ზამთარში და რა სახის anti aging-პროცედურებს გვთავაზობს ესთეტიკური ცენტრი PRESTIGE LUXE’, ამის შესახებ უფრო ვრცლად ცენტრის დამფუძნებელი და დირექტორი, ირინა სააკაშვილი და ექიმი-კოსმეტოლოგი, მაია ჭიკაძე გვიამბობენ.
ირინა, როგორ მოვუაროთ სახის კანს ზამთარში?
როგორც შემოდგომაზე, ისე ზამთარში სიცივე და ქარი უარყოფითად მოქმედებს სახის კანის მდგომარეობაზე. ამ დროს ცხიმოვანი ჯირკვლები ნაკლებ კანქვეშა ცხიმს გამოიმუშავებს. გარდა ამისა, ამ სეზონზე ხშირად გვიწევს მშრალი ჰაერით გახურებულ ოთახებში ყოფნა, რაც აძლიერებს მგრძნობელობას და იწვევს ისეთ პრობლემებს, როგორიცაა სახის კანის სიწითლე, აქერცვლა და მუდმივი დისკომფორტის შეგრძნება.
ჩემი უპირველესი რეკომენდაციაა, არ მიიღოთ ცხელი შხაპი, შეეცადეთ არ დაიბანოთ სახე ცხელი წყლით, რადგან დასაშვებ ტემპერატურაზე მეტი წყალი ხსნის ფორებს, რაც ტენის დაკარგვას იწვევს.
ჩაიცვით ამინდის შესაბამისად, ზამთარში შეგიძლიათ თბილი შარფის ან ქუდის საშუალებით ყინვისგან დაიფაროთ სახე და თავი. შენობაში ყოფნისას კი შეეცადეთ თავი აარიდოთ გამათბობლებს, რომლებიც აშრობენ კანს ან გამოიყენოთ ჰაერის დამატენიანებელი.
მიუხედავად იმისა, რომ ზამთარში ნაკლებად ვგრძნობთ წყურვილს, საჭიროა საკმარისი სითხის დალევა და ორგანიზმში წყლის ბალანსის შენარჩუნება.
ეს სეზონი კარგია პილინგისთვის, ამიტომ დელიკატური აქერცვლა ზამთრის კანის მოვლის რუტინაში ჩართეთ. ეს ხელს შეუწყობს მკვდარი უჯრედებისგან გაწმენდას და საცხის ეფექტურობის გაზრდას.
ასევე, გახსოვდეთ, რომ სახის კანის გარდა, ტუჩებსაც სჭირდება განსაკუთრებული მოვლა, რადგან ზამთარში ერთ-ერთი ყველაზე გავრცელებული პრობლემა ტუჩის კანის დახეთქვაა. რეგულარულად წაისვით დამატენიანებელი ან მკვებავი. ის შესანიშნავად არბილებს კანს და აუმჯობესებს ფერს.
რა სახის ესთეტიკური პროცედურების ჩატარებაა რეკომენდებული ზამთარში?
ნაბიჯი 1: გაწმენდა – უმჯობესია სახის კანი გაიწმინდოთ C და E ვიტამინების შემცველი რბილი პროდუქტებით, ქაფით ან ჰიდროფილური ზეთით. რეკომენდებულია, რომ ნებისმიერი პროდუქტი ჩამოიბანოთ თბილი წყლით. ასევე მნიშვნელოვანია, თუ სახეს ერთჯერადი პირსახოცით, ნაზი მოძრაობით გაიმშრალებთ.
ნაბიჯი 2: მატონიზებლის გამოყენება – ზამთარში კანს ნამდვილად სჭირდება დატენიანება, ამიტომ ეს არის მიზეზი, დაიწყოთ ტონერების გამოყენება, მაშინაც კი, თუ ისინი აქამდე არასდროს გამოგიყენებიათ. ტონერების უმეტესობას აქვს ნორმალური pH ბალანსი. პროდუქტის გამოყენებამდე დარწმუნდით, რომ ის არ შეიცავს ალკოჰოლს ან სულფატებს.
ნაბიჯი 3: დატენიანება და მკვებავი – ამ ეტაპზე მნიშვნელოვანია აირჩიოთ პროდუქტები, რომლებსაც შეუძლიათ კანის სრულად დატენიანება და კვება. უფრო მეტიც, კვება არ არის მხოლოდ მკვრივი ტექსტურის მქონე საცხები, ის გულისხმობს რაციონში ვიტამინების დამატებას შრატების, ესენციებისა და გამაძლიერებლების სახით. მნიშვნელოვანია, კოსმეტიკური პროდუქტები შეიცავდეს სამ ძირითად ვიტამინს: A (რეტინოლი) – აქტიურად გამოიყენება სილამაზის ინდუსტრიაში დაბერების პროცესთან და აკნეს წინააღმდეგ საბრძოლველად; B3 (ნიაცინამიდი) – ასევე მაღალეფექტურია ასაკთან დაკავშირებულ ცვლილებებთან საბრძოლველად, აქვს ანთების საწინააღმდეგო ეფექტი და ეხმარება ჰიპერპიგმენტაციასთან ბრძოლაში; C (ასკორბინის მჟავას ფორმა) არის ანტიოქსიდანტი, რომელიც აქრობს თავისუფალ რადიკალებს, ჰიპერპიგმენტაციას და ათანაბრებს კანის ტონს.
ნაბიჯი 4: UV დაცვა უნდა გვახსოვდეს, რომ ზამთარშიც განსაკუთრებული ყურადღება სჭირდება მზის სხივებისაგან დაცვას, რადგან ისინი ძალიან უარყოფითად მოქმედებს კანის მდგომარეობაზე, რაც ნაადრევ დაბერებას იწვევს. მზისგან დამცავი საცხები მოვლის ბოლო ეტაპია, ამიტომ ტექსტურა საუკეთესოდ უნდა მოერგოს თქვენს კანის ტიპს.
დღეს anti aging-პროცედურების პოპულარობა მსოფლიო მასშტაბით უფრო და უფრო პოპულარული ხდება. რა სახის anti aging-პროცედურებს სთავაზობთ მომხმარებელს?
მაია ჭიკაძე: დღეს მედიცინასა და კოსმეტოლოგიაში ერთ-ერთი ყველაზე მნიშვნელოვანი პრობლემა ახალგაზრდობის შენარჩუნება და დაბერების შენელებაა. დაბერების საწინააღმდეგო კოსმეტოლოგიური პროცედურები მიზნად ისახავს კანისა და მთლიანად ორგანიზმის ასაკთან დაკავშირებული ცვლილებების თავიდან აცილებას და სიცოცხლის გახანგრძლივებას. ეს კი მიიღწევა სხვადასხვა პროცედურით. არის ორი მიმართულება: გარეგანი გაახალგაზრდავება და შინაგანი.
PRESTIGE LUXE-ში არაქირურგიულ გარეგანი გაახალგაზრდავების მეთოდსა და ტექნოლოგიას ვიყენებთ, რაც ინიექციების მიმართულებას მიეკუთვნება:
- მეზოთერაპია არის ვიტამინებისა და მიკროელემენტების სპეციალური კოქტეილების კანქვეშ შეყვანა, რომლებიც ასტიმულირებენ ნაოჭების გასწორებას.
- ლაზერული გაახალგაზრდავება – ლაზერული მოქმედება კანის ზედაპირზე, ნაოჭების, ნაწიბურებისა და ასაკობრივი ლაქების მოცილება.
- ბოტოქსი არის ინიექცია, რომელიც გამოიყენება აქტიური კუნთების დასასვენებლად, რომლებიც ნაოჭებს ქმნიან.
- ბიორევიტალიზაცია ჰიალურონის მჟავათი – არაჯანსაღი სახის, კანის გაუწყლოების პიგმენტაციისთვის.
- კონტურული პროცედურები – სახისა და სხეულის კონტურების არაქირურგიული მოდელირება ფილერის გამოყენებით.
- ძაფების ლიფტინგი მეზოთრედებით – კანის ჩარჩოს გამაგრება სპეციალური სინთეტიკური ძაფებით.
- და პლაზმური ლიფტინგის მეთოდი.
შინაგანი გაახალგაზრდავება სხვა სპეციალისტების ჩართულობას საჭიროებს, როგორიცაა დიეტოლოგები, იმუნოლოგები და გენეტიკოსები. ამ მიმართულების მთავარი მიზანია ორგანიზმიდან ტოქსინების გამოდევნა, ჰორმონალური ბალანსის აღდგენა, იმუნიტეტის ამაღლება და ნივთიერებათა ცვლის გაუმჯობესება.
როგორც ვიცით, ერთ-ერთი ესთეტიკური ცენტრია PRESTIGE LUXE, სადაც შაკიკს საინიექციო მეთოდით მკურნალობთ. როგორ მუშაობს პროცედურა?
დღეს ბოტულინოთერაპია არის შაკიკის აღმოფხვრის პირველადი სამკურნალო და პროფილაქტიკური მეთოდი. ბოტულინის აქტიური მოქმედება მიზნად ისახავს კუნთების მოდუნებას და ბლოკავს ნივთიერებებს, რომლებიც ასტიმულირებენ თავის ტვინში ტკივილის ცენტრს. ძლიერი თავის ტკივილი თავისა და კისრის კუნთებში გამავალი სისხლძარღვების გაფართოების შედეგია. შაკიკის დროს ბოტოქსის შეყვანისას კუნთები მოდუნდება, სისხლძარღვების კედლები გარკვეულწილად ვიწროვდება ფიზიოლოგიურ ზომამდე და მცირდება თავის ტკივილის ინტენსივობა, რადგან ტოქსინი ბლოკავს სატრანსპორტო ცილებს, რომლებიც ატარებენ აცეტილქოლინს, ნეიროტრანსმიტერს, რომელიც გადასცემს ნეირომუსკულურ იმპულსებს კალციუმის არხებში. ეს უკანასკნელი პასუხისმგებელია ნერვული იმპულსის ფორმირებაზე და თავად კუნთების შეკუმშვაზე. ამრიგად, პრეპარატი ხელს უშლის კუნთების სპაზმს, აქრობს ტკივილს და, შედეგად, არბილებს კანს.
თავის ტკივილის საწინააღმდეგო ბოტოქსის ყველაზე გამოხატული ეფექტი შეინიშნება მე-3 პროცედურის შემდეგ. კლასიკურად, პრეპარატი ინიშნება ყოველ 12 კვირაში, მაგრამ თერაპიის სიხშირე და ეფექტის ხანგრძლივობა პირდაპირ დამოკიდებულია ადამიანის მეტაბოლიზმზე.
პირველი პროცედურის შემდეგ შეიმჩნევა შემდეგი ეფექტი: ტკივილის სინდრომის აღმოფხვრა, შაკიკის შეტევების სიხშირისა და ინტენსივობისა და ტკივილგამაყუჩებლების მიღების სიხშირის შემცირება. პროცედურა აბსოლუტურად უმტკივნეულოა, რადგან ხდება ინიექციის ადგილის ადგილობრივ ანესთეზია.
დაბოლოს, რას ეტყოდით ქალებს?
ირინა სააკაშვილი: ვფიქრობ, ყველა ასაკს თავისი ხიბლი აქვს, განსაკუთრებით ქალებისთვის, რადგან ისინი ყოველთვის მშვენიერები არიან, თუნდაც 70 ან მეტ წლის ასაკში და თანამედროვე მედიცინის მიღწევები ჩვენს მხარეზეა. დაუთმეთ საკუთარ თავს დრო, არ გაჩერდეთ მიზნისკენ მიმავალ გზაზე, გააკეთეთ ის, რაც გიყვართ, ბევრი გაიღიმეთ და გიყვარდეთ, გიყვარდეთ და გიყვარდეთ…
ტექსტი: სოფიო მალანია
ფოტო: ალექსეი სეროვი
